Read Jinghpaw Common Language Bible 2009 SHAKAWN KUNGDAWN 118 Bible Online

SHAKAWN KUNGDAWN 118 - Jinghpaw Common Language Bible 2009 bible

SHAKAWN KUNGDAWN 118

¹Dai MADU gaw mai kaja nga ai majaw, shi hpe chyeju dum mu; shi a tsaw ra myit htani htana agrin nga ai.

²“Shi a tsaw ra myit htani htana agrin nga ai,” nga nna Israela amyu masha ni tsun nga mu ga.

³“Shi a tsaw ra myit htani htana agrin nga ai,” nga nna Karai Kasang a hkinjawng ni tsun mu ga.

⁴“Shi a tsaw ra myit htani htana agrin nga ai,” nga nna shi hpe nawku daw jau ai ni yawng hte mung tsun nga mu ga.

⁵Ngai ru yak kyindut hkrum nga yang, dai MADU hpe ngai hpyi jahtau ni ai; shi ngai hpe htan ya nna ngai hpe shalawt dat ni ai.

⁶Dai MADU ngai hte rau rai nga ai rai nna, ngai hpa hpe mung n hkrit nga nngai; Kadai wa ngai hpe hpa di lu na rai nga a ta?

⁷Dai MADU ngai hpe karum ai wa rai nga ai majaw; nye a gumlau hpyen ni sum mat ai hpe ngai mu lu na ring ngai.

⁸Masha hta shamyet shanat ai hta, dai MADU hpe kam hpa ai gaw grau nna mai kaja nga ai.

⁹Masha a ningbaw ni hpe shamyet shanat ai hta dai MADU hpe kam hpa ai gaw grau nna mai kaja nga ai.

¹⁰Gumlau hpyen law law wa, ngai hpe wang shinggrup da nga ma ti mung; dai MADU a daru magam n-gun hte shanhte hpe ngai shamyit kau lu nga nngai!

¹¹Shanhte ngai hpe jut shagu de nna wang da nga ma ti mung: dai MADU a daru magam n-gun hte shanhte hpe ngai shamyit kau lu nga nngai.

¹²Shanhte gaw lagat ni zawn, ngai hpe ginjup shatsang nga ma ti mung; ju hpun hkru ai wan zawn, shanhte tin tin hkru krawp mat nga ma ai. Dai MADU a n gun atsam hte ngai shanhte hpe shamyit kau nngai.

¹³Ngai gaw laja lana gasat ai hkrum nna, sum hkrum nga nngai; rai ti mung dai MADU ngai hpe karum la nga sai.

¹⁴Dai MADU ngai hpe daru magam n-gun hte atsam marai jahpring ya nna; shi ngai hpe hkye hkrang la ni ai.

¹⁵“Dai MADU gaw chyahtum chyalai n-gun hte mauhpa magam amu ni hpe galaw nu ai!

¹⁶Shi a daru magam atsam hte anhte hpe awng padang lam jaw ya sai; shi a chyahtum chyalai n-gun hte majan hpe dang kau nu ai,” nga nna Karai Kasang a amyu masha ni shanu nga ai sum ni kaw nna kabu gara jahtau ai awng padang nsen ni hpe madat mu.

¹⁷Ngai si wa na nngai n rai, de a malai, ngai hkrung nga nna, dai MADU galaw dan sai magam amu ni hpe htawn tsun dan nga na nngai.

¹⁸Shi ngai hpe laja lana di nna ari jaw nga ti mung: shi ngai hpe si shangun nga ai n rai.

¹⁹Nawku Htingnu chyinghka ni e, nye a matu hpaw malang nga u; ngai shang wa nna dai MADU hpe chyeju sa dum na nngai.

²⁰Da ndai gaw MADU a chyinghka rai nga nna, ding hpring ai ni chyu sha shang lu nga ai.

²¹MADU e, nang ngai hpe htan ya nna, ngai hpe awng padang jaw ya nit dai majaw, ngai nang hpe shakawn na nngai.

²²Nta gaw ai ni lata kau sai nlung gaw, yawng hta grau ahkyak htum ai ningjut nlung tai wa ai.

²³Dai gaw MADU e galaw ai amu rai sai; dai gaw anhte a man na mauhpa amu rai nga sahka!

²⁴Dai ni na nhtoi gaw dai MADU a awng padang lu ai shani rai nga ai; anhte kabu gara nga let, masat poi galaw nga ga ai.

²⁵MADU e, anhte hpe hkye hkrang la mi, anhte hpe hkye hkrang la mi! MADU e, anhte hpe awng padang jaw ya mi!

²⁶MADU a mying nsang hte du sa ai wa hpe Karai Kasang shaman ya nga u ga! MADU a Htingnu kaw nna, anhte nang hpe shakawn ga ai.

²⁷Dai MADU gaw Karai Kasang rai nga ai, shi gaw anhte hpe chyeju jaw ya mani ai. Nanhte a lata ni hta hpun lakung ni hpe lang nna, poi hpang ai hte tawn hkungri hpe hkawm shinggrup nga mu.

²⁸Nang gaw nye a Karai Kasang rai nga ndai ngai nang hpe chyeju shakawn nga na nngai; na a galu kaba ai lam hpe ngai htawn tsun nga na nngai.

²⁹Shi mai kaja nga ai majaw, dai MADU hpe chyeju shakawn nga mu; shi a tsaw ra myit htani htana agrin nga ai law.