Read Jinghpaw Common Language Bible 2009 SHAKAWN KUNGDAWN 119 Bible Online

SHAKAWN KUNGDAWN 119 - Jinghpaw Common Language Bible 2009 bible

SHAKAWN KUNGDAWN 119

¹Dai MADU a hkang da ai tara hte maren, mara n kap ai hku asak hkrung nga ai ni gaw a lu ma ai.

²Shi a hkang da ai tara ni hpe hkan nang nna, myit masin mahkra hte shi hpe madat mara hkan sa ai ni gaw a lu ma ai.

³Shanhte gaw galoi mung shut hpyit ai amu hpe galaw nga ma ai n rai; shanhte gaw dai MADU a lam ni hta ahkawm nga ma ai.

⁴MADU e, nang anhte hpe na a hkang da ai tara ni hpe jaw ya nhtawm; dai ga matsun ni hpe kangka ai hte madat mara hkan sa na matu, nang anhte hpe tsun da nit dai.

⁵Na a ga matsun ni hpe hkan shatup lu hkra ngai sadi sahka rai nga lu na hpe, ngai kade wa myit mada nga a hka!

⁶Na a hkang da ai tara ni yawng hpe ngai madat mara lu ai rai yang ngai kaya kahpa hkrum na nngai n rai.

⁷Na a ding hpring ai tara dara lam ni hpe sharin la lu nna, san seng ai myit hte nang hpe ngai shakawn na nngai.

⁸Ngai gaw na a tara ni hpe madat mara hkan nang nga na nngai; ngai hpe galoi mung hkum kau da nga et!

⁹Shabrang wa gaw shi a asak hkrun lam hpe san seng nga u ga, kaning rai shadik lu na rai nga a ta? Dai gaw na a hkang da ai tara ni hpe madat mara hkan sa ai hte sha shadik lu nga ai.

¹⁰Nye a myit masin mahkra hte, ngai nang hpe daw jau na matu shakut na nngai; na a hkang da ai tara ni hpe lale kau ai kaw nna ngai hpe makawp da e.

¹¹Na a tara hpe nye a myit masin hta ngai kyem da nga nngai rai nna, ngai nang hpe yubak n galaw na nngai.

¹²MADU e, ngai nang hpe shakawn nga nngai; na a lam ni, ngai hpe sharin ya e.

¹³Nang jaw ya sai hkang da ai tara ni yawng hpe, nsen ja ja hte ngai kahtap tsun nga na nngai.

¹⁴Sut gan nlang hkam la lu ai hta, na a hkang da ai tara ni hpe hkan nang nga na, ngai grau ra sharawng nga nngai.

¹⁵Ngai gaw na a ga matsun ni hpe sharin la nngai, na a sharin achyin ai lam hpe mung ngai sawk dinglik yu nngai.

¹⁶Na tara ni hta ngai kabu awng sharawng nga nngai; na a hkang da ai tara ni hpe ngai malap kau na nngai n rai.

¹⁷Na a shangun ma wa ngai hpe mai kaja ai lam madun dan e; shaloi, ngai na a sharin achyin ai ga ni hpe madat mara hkan sa nna, asak hkrung nga na nngai.

¹⁸Nye a myi ni hpe hpaw ya e, shaloi, na a tara hta na mauhpa teng man ai lam ni hpe ngai mu lu na nngai.

¹⁹Ngai gaw ndai mungkan ga ntsa e, jahkring jahkra a matu sha, nga nga nngai; na a hkang da ai ga ni hpe ngai kaw na hkum makoi da et.

²⁰Aten shagu, na a tara dara ai lam hpe ngai chye mayu nga nngai majaw; nye a myit masin marit ai hte ndawt nga li ai.

²¹Nang gaw gumrawng gumtawng ai ni hpe daru sharin nga ndai; na a hkang da ai tara ni hpe tawt lai ai ni gaw dagam kau ai hkrum nga ma ai.

²²ngai gaw na a tara ni hpe shadik shatup nga ni ai majaw, shanhte a shatan nhkan re ai hte n kaw n law re ai kaw na ngai hpe shalawt la e.

²³Mung up du ni ngai hpe gumlau na matu, maw mawn ai hte hpawng nga ma ti mung; ngai gaw na a sharin achyin ai lam ni hpe sharin la nga na nngai.

²⁴Na a ga matsun ni ngai hpe myit shapyaw ya nna; dai gaw ngai hpe hpaji jaw, lam madun ai ni rai nga ai.

²⁵Ngai gaw sum kadawng mat nna, ga nhpu hta galeng taw mat ni ai; na a ga sadi hte maren, ngai hpe n-gun nnan jaw ya nna bai sharawt la e.

²⁶Ngai galaw shut kau sai lam mahkra hpe ngai yin la sai majaw, nye a hpyi nem ai ga hpe htan ya nit dai, na a lam ni hpe mung, ngai hpe sharin ya e.

²⁷Na a tara ni hpe chye na lu na matu, ngai hpe karum la e; na a mauhpa sharin achyin ai lam ni hpe ngai myit aru yu nga na nngai.

²⁸Ngai gaw yawn hkyen ai hte dip da hkrum nga nngai majaw; na a ga sadi hta maren, ngai hpe n-gun ban ya e.

²⁹Shut ai lam hta hkawm sa nga ai kaw na ngai hpe sharai la e; na a mai kaja ai lam hta, ngai hpe na a tara sharin ya e.

³⁰Na a tara hpe madat mara na matu ngai lata la ni ai; na a tara dara ai lam ni hpe ngai madat hkam la ni ai.

³¹MADU e, ngai gaw na a ga matsun ni hpe hkan sa nga ni ai; ngai hpe kaya kahpa hkum, jahkrum et.

³²Nang ngai hpe chye na lu ai myit nyan hpaji hpe grau jaw ya na rai nga ndai majaw, na a hkang da ai tara ni hpe sharawng awng ai myit hte ngai madat mara hkan sa nga na nngai.

³³MADU e, na a tara ni a lachyum, ngai hpe sharin achyin ya e; dai lam ni hpe aten shagu ngai madat mara hkan sa nga na nngai.

³⁴Na a tara, ngai hpe shaleng dan et, shing rai, dai hpe ngai madat mara nga na nngai; nye a myit masin mahkra hte, dai hpe ngai mazing bang da na nngai.

³⁵Na a hkang da ai tara ni hta, kabu gara ai lam hpe ngai mu nngai majaw, dai ga matsun ni hpe chye madat mara nga shangun rit.

³⁶Sut su ngamu ngamai wa na hta, na a tara ni hpe madat mara hkan sa na hpe grau ra sharawng ai myit ngai hpe jaw bang ya e.

³⁷Kaman lila hpe myit manoi nga ai kaw nna ngai hpe shatsan kau ya e; na a ga sadi nga ai hte maren, mai kaja ai lam, ngai hpe madun dan e.

³⁸Nang hpe hkrit hkungga ai ni hpe jaw ya ai ga sadi, na a shangun ma wa, ngai hpe mung jaw ya e.

³⁹Ngai hkrit kahpra ai hpe asawng asang re ai ni kaw na ngai hpe hkye mawai la e; na a tara dara ai lam ni gaw kade wa mauhpa rai nga a hka!

⁴⁰Ngai gaw na a hkang da ai tara ni hpe madat mara mayu nga nngai; nang ding hpring nga ndai majaw, ngai hpe asak ningnan jaw ya e.

⁴¹MADU e, nang ngai hpe kade wa tsaw ra nga ndai gaw ngai hpe madun dan e; na a ga sadi hte maren, ngai hpe hkye hkrang la e.

⁴²Na a ga hta ngai kam hpa nga nngai majaw, ngai hpe n kaw n law re ai ni hpe ngai htan lu na nngai.

⁴³Na a tara dara ai lam ni hta nye a myit mada ai lam nga nga li ai majaw, teng man ai ga hpe aten shagu tsun shaga lu na matu ngai hpe karum la e.

⁴⁴Na a tara hpe n hprai ai sha, htani htana prat dingsa ngai hkan nang nga na nngai.

⁴⁵Na a sharin achyin ai hpe ngai madat mara hkan nang shakut nga nngai majaw, hkum tsup ai shanglawt ahkaw ahkang hta ngai hkawm sa nga na nngai.

⁴⁶Na a hkang da ai ga ni hpe hkawhkam ni a man e, ngai tsun ndau na nngai rai nna, kaya kahpa ngai hkrum na nngai n rai.

⁴⁷Hkang da ai tara ni hpe ngai tsaw ra nga nngai majaw, dai lam ni hpe madat mara hkan sa ai hta kabu awng sharawng ai lam hpe ngai mu tam nngai.

⁴⁸Na a hkang da ai tara ni hpe ngai tsaw ra hkungga nngai; na a ga matsun ni hpe ngai myit aru yu nga na nngai.

⁴⁹Na a shangun ma wa ngai hpe jaw ai ga sadi hpe adum nga u; dai gaw ngai hpe myit mada shara jaw ya nga sai.

⁵⁰Na a ga sadi gaw ngai hpe asak jahkrung ya nga nit dai majaw; nni nkri hkrum sha nga ai aten hta pyi, shalan shabran ai ngai hkrum nga ni ai.

⁵¹Gumrawng gumtawng ai ni ngai hpe tut nawng e, jahpoi asawng nga ma ti mung; na a tara hpe ngai n kau da na nngai.

⁵²Lai mat wa sai aten na, na a tara dara ai lam ni hpe ngai dum nga nngai; MADU gaw dai lam ni ngai hpe shalan shabran ya nga ai.

⁵³Tara n lang ai ni na a tara hpe n hkan ai sha, jahten nga ma ai hpe ngai mu ai shaloi; ngai masin kahtet nga nngai.

⁵⁴Kadun la ai dinghta ga na nye a asak hkrun lam hta hkawm sa nga ai laman; na a hkang da ai ga hte seng ai mahkawn ga ni hpe ngai ka jahtuk shalat da nga nngai.

⁵⁵MADU e, shana na aten ngai nang hpe myit dum nga nna; na a tara lam ni hpe ngai myit sumru yu nga nngai.

⁵⁶Na a hkang da ai ga ni hpe madat mara hkan sa ai hta; nye a kabu gara ai lam hpe ngai mu tam la nga nngai.

⁵⁷MADU e, ngai ra sharawng ai lam yawng mayawng gaw nang rai nga ndai; na a tara ni hpe madat mara hkan sa lu na matu, ngai ga sadi jaw nga nngai.

⁵⁸Na a ga sadi hte maren, ngai hpe matsan dum la na matu, nye a myit masin mahkra hte nang kaw ngai hpyi nem nga nngai.

⁵⁹Ngai gaw nye a asat lawat ni hpe myit sawn yu ni ai; na a ga matsun ni hpe hkan nang na matu, nang hpe ngai ga sadi jaw we ai.

⁶⁰N kanung nga ai sha, na a hkang da ai ga ni hpe ngai tin tin madat mara hkan sa nga nngai.

⁶¹N hkru n shawp ai ni nye a matu mahkam hkam da nga ma ti mung; na tara ni hpe ngai malap kau na nngai n rai.

⁶²Ngai gaw shana yup tung e hprang wa nna, na a ding man ai tara dara lam a matu mara nang hpe ngai shakawn nga na nngai.

⁶³Ngai gaw nang hpe daw jau nga ai ni hte na a tara ni hpe hkan sa nga ai ni yawng a jinghku wa rai nga nngai.

⁶⁴MADU e, ginding aga gaw na a dinggrin tsaw ra myit hte hpring nga ai; ngai hpe na a hkang da ai tara ni sharin ya e.

⁶⁵MADU e, na a ga sadi hpe nang shatup nit dai; na a shangun ma wa, ngai hpe mung mai kaja ai lam galaw nga ndai.

⁶⁶Na a hkang da ai ga ni hpe ngai kam hpa nga nngai majaw; nyan hpaji hte machye machyang hpaji ngai hpe jaw ya e.

⁶⁷Nang ngai hpe ari garai n jaw yang pyi, ngai gaw lam dam mat mat rai nngai, rai ti mung, ya chyawm gaw na a ga hpe ngai madat nga nngai.

⁶⁸Nang gaw kade wa mai kaja nga ai hte kade wa matsan dum nga a hka! Ngai hpe na a hkang da ai ga matsun ni sharin ya e.

⁶⁹Gumrawng gumtawng ai ni nye a lam hpe masu magaw ga ni hte tsun shatan nga ma ti mung; nye a myit masin mahkra hte na a ga matsun ni hpe ngai madat mara hkan sa nga nngai.

⁷⁰Ndai masha ni myit hkawn hkrang ai lam n nga ma ai rai tim, ngai gaw na a tara hta awng sharawng nga nngai.

⁷¹Ngai hkrum sha ai ari gaw nye a matu kaja nga li ai; hpa majaw nga yang, dai gaw ngai hpe na a hkang da ai ga ni hpe sharin la shangun nga ai.

⁷²Nang ngai hpe jaw ya ai tara gaw mungkan ga na ja gumhpraw sut gan yawng mayawng hta grau nna manu dan nga li ai.

⁷³Nang ngai hpe hpan da nna shim lum ai hte tawn da nga ndai; na a tara ni hpe sharin la lu n ga, chye chyang ai nyan ngai hpe jaw ya e.

⁷⁴Na a ga sadi hpe ngai kam hpa nga nngai majaw, nang hpe hkrit kamyin nga ai ni, ngai hpe mu ma ai shaloi, kabu gara lu na mara ai.

⁷⁵MADU e, na a tara dara ai lam ding man nga ai hpe ngai chye nga nngai; nang sadi dung nga ndai majaw, ngai hpe ari jaw nga ndai.

⁷⁶Nang ngai hpe ga sadi jaw da nit dai hte maren na a shangun ma wa ngai hpe na a dinggrin tsaw ra myit hte shalan shabran ya nga rit.

⁷⁷Na a tara hta ngai sharawng awng nga nngai majaw, nye a ntsa e, matsan dum nga ya rit, ngai ahkrung nga lu na ring ngai.

⁷⁸Gumrawng gumtawng ai ni ngai hpe masu ai hku mara shagun nga ma ai majaw kaya kahpa hkrum sha nga mu ga; ngai chyawm gaw na a sharin matsun ai ga ni hpe myit aru yu nga na nngai.

⁷⁹Nang hpe hkrit kamyin nga ai ni hte na a hkang da ai ga ni hpe chye na ai ni yawng hte gaw ngai kaw du sa wa mu ga.

⁸⁰Ngai gaw na a hkang da ai ga ni hpe ra n rawng hkra madat mara hkan sa nga nngai majaw, kaya kahpa hte sum kadawng ai lam ngai hta n hkrum nga u ga.

⁸¹MADU e, ngai hki ba la nga nngai majaw, ngai hpe hkye hkrang la na matu, nang hpe ala nga nngai; na a mungga hta ngai kam hpa nga nngai.

⁸²“Nang ngai hpe galoi mi she, karum la na rai nga n ta?,” ngu nna san ai hte, nang tawn da sai ga sadi hpe mada azi yu ai majaw, nye a myi ni tsu nga li ai.

⁸³Ngai gaw kabai kau sai shanhpyi ndum zawn akyu n rawng nga nngai; rai ti mung, na a hkang da ai ga ni hpe ngai malap kau nga nngai n rai.

⁸⁴Gade daram na hkra, ngai ala ra na rai nga a ta? Ngai hpe zingri zingrat di ai ni hpe galoi aten hta, nang ari jaw na n ni?

⁸⁵Na a tara hpe hkan sa na matu lale ai gumrawng gumtawng masha ni ngai hpe mahkam hkam na matu, nhkun htu da nga masai.

⁸⁶Na a hkang da ai tara ni yawng myit du kam hpa mai nga ai; masha ni gaw masu magaw ga ni hte ngai hpe zingri zingrat di mi ai- ngai hpe karum la e law!

⁸⁷Shanhte ngai hpe ganoi noi sha lu sat kau ma ai; rai ti mung, na a hkang da ai ga ni hpe ngai n kau da nga nngai.

⁸⁸Na a dinggrin tsaw ra myit a majaw ngai hpe mai kaja ai lam madun dan e; shing rai, na a tara ni hpe ngai madat mara hkan sa lu n ga.

⁸⁹MADU e, na a mungga htani htana agrin nga na ra ai; dai gaw sumsing lamu hta e, prat dingsa agrin nga ai.

⁹⁰Na a sadi sahka prat mi hte prat mi agrin nga ai; ginding aga hpe nang shara masat da ya nit dai hte, dai gaw a nga nga ai.

⁹¹Arai yawng mayawng hte gaw na a shangun ma ni rai nga ma ai; na a hkang da ai ga ni a majaw, dai ni yawng dai ni du hkra anga nga ma ai.

⁹²Lama wa, na a hkang da ai tara gaw nye a matu kabu gara ai npawt nhpang n rai taw gaw, nye a nni nkri hta ngai si mat wa na nngai.

⁹³Ngai gaw na a ga matsun ni hte sha asak hkrung nga lu nga nngai majaw, dai lam ni hpe ngai galoi mung n sawn n sang di kau na we ai n rai.

⁹⁴Ngai gaw na a rai nga nngai, ngai hpe hkye hkrang la e! Ngai gaw na a hkang da ai ga ni hpe madat mara hkan sa na matu, shakut shaja ni ai.

⁹⁵N hkru n shawp ai masha ni ngai hpe sat na matu, hkap nga ma ti mung; na a hkang da ai tara ni hpe ngai myit aru yu nga na nngai.

⁹⁶Arai yawng mayawng hte gaw shadaw shadang a npu e nga nga ma ai; na a hkang da ai mungga gaw dam lada hkum tsup nga ai hpe, ngai sharin la lu ni ai.

⁹⁷Na a tara hpe ngai kade wa tsaw ra nga a hka! Dai lam hpe shani tup ngai myit sawn yu nga nngai.

⁹⁸Na a hkang da ai mungga gaw ngai hte rau aten shagu nga nga ai rai nna, dai mungga a majaw, nye a gumlau hpyen ni hta grau nna ngai hpe hpaji machye machyang lu la shangun nga ndai.

⁹⁹Ngai gaw na a ga matsun ni hpe myit aru yu nga nngai majaw; ngai hpe sharin ya ai sara ni yawng hta grau nna ngai chye chyap nga nngai.

¹⁰⁰Ngai gaw na a hkang da ai ga ni hpe madat mara hkan sa nga nngai majaw; asak kaba sai masha ni hta pyi grau nna ngai hpaji rawng nga nngai.

¹⁰¹Ngai gaw na a mungga hpe madat mara hkan sa mayu nga nngai majaw, n hkru ai sat lawat yawng hte hpe ngai koi yen kau ni ai.

¹⁰²Nang nan nye a sara rai nga ndai majaw, na a ga matsun ni hpe ngai hprai kau we ai n rai.

¹⁰³Nang sharin shaga ai ga matsun ni gaw kade wa dwi nga a hka! Dai gaw lagat jahku hta pyi grau nna dwi nga ai.

¹⁰⁴Ngai gaw na a tara mungga ni kaw nna hpaji byeng-ya lu la nga nngai majaw, n tsawm n htap ai arawn alai sat lawat mahkra hte hpe ngai n dawng nga nngai.

¹⁰⁵Na a mungga gaw ngai hpe lam woi ai pyengdin hte nye hkrun lam a matu, nhtoi rai nga ai.

¹⁰⁶Na a ding man ai ga matsun ni hpe madat mara hkan sa na matu, ngai dagam da ai ga sadi hte maren ngai hkan galaw shadik shatup nga na nngai.

¹⁰⁷MADU e, ngai hkrum sha nga ai nni nkri ni gaw teng teng hkrithpa wa rai nga li ai; na a ga sadi hte maren, ngai hpe asak jahkrung tawn e.

¹⁰⁸MADU e, nye a chyeju shakawn akyu hpyi ai ga hpe hkap la ya nna, na a hkang da ai lam, ngai hpe sharin ya e.

¹⁰⁹Ngai gaw hkrithpa asak hkrun lam hta asak dan hkawm sa na matu, tut nawng e jin jin rai nga nngai; na a tara hpe ngai malap kau we ai n rai.

¹¹⁰Tara n lang ai masha ni nye a matu mahkam hkam da nga ma ti mung, na a hkang da ai tara ni hpe ngai madat mara hkan sa nga nngai.

¹¹¹Na a hkang da ai tara ni gaw prat dingsa na nye a sut gan ni rai nga ai; dai ni gaw nye myit masin kabu gara ai lam rai nga ai.

¹¹²Ngai gaw si ai shani du hkra, na a tara ni hpe madat mara hkan sa na matu myit daw dan da se ai.

¹¹³Nang hta tsep kawp sadi n dung ai ni hpe ngai n ju n dawng nga nngai; rai ti mung, na a hkang da ai tara hpe chyawm gaw ngai tsaw ra nga nngai.

¹¹⁴Nang gaw nye a dahpran shara hte ngai hpe makawp maga ai wa rai nga ndai; na a ga sadi hpe ngai myit mada nga nngai.

¹¹⁵Yubak kap ai masha ni e, ngai kaw nna pru mat wa mu, nye a Karai Kasang a hkang da ai ga ni hpe ngai madat mara nga na nngai.

¹¹⁶Na a ga sadi hte maren, ngai hpe n-gun jaw ya e, shaloi ngai asak hkrung nga lu na nngai; nye a myit mada ai lam hta myit daw myit hten shara hkum tai shangun et.

¹¹⁷Ngai hpe jum da e, shing rai ngai shim nga na nngai; shaloi, na a hkang da ai ga ni hpe tut nawng e, ngai madat mara nga na nngai.

¹¹⁸Nang gaw na a hkang da ai tara ni hpe hkan sa na matu lale ai ni hpe ningdang kau nga ndai; shanhte a masu magaw ai maw mawn lam ni gaw kaman lila rai nga ai.

¹¹⁹N hkru n hkra re ai ni yawng hte hpe maza mala hpe zawn, nang kabai kau nga ndai; ngai chyawm gaw na a sharin matsun ai ga ni hpe tsaw ra nga nngai.

¹²⁰Na a majaw, ngai hkrit gari nga nngai, na a tara dara ai lam ni a majaw, ngai hta hkrit kamyin ai myit hpring nga nngai.

¹²¹Ding man ai hte mai kaja ai amu ni hpe ngai galaw se ai; nye a gumlau hpyen ni a lata de ngai hpe hkum kau da et!

¹²²Na a shangun ma wa hpe nang karum la na lam, ga sadi jaw e; myit tsaw myit dap ai masha ni ngai hpe hkum dip gamyet shangun et!

¹²³Hkrang shaw la na matu, nang ga sadi jaw da sai, na a hkye hkrang la ai karum la lam hpe azi yu nga ai nye a myi ni tsu nga li ai.

¹²⁴Na a dinggrin tsaw ra myit hte maren, ngai hpe chyeju galaw ya e, na a hkang da ai ga ni, ngai hpe sharin ya e.

¹²⁵Ngai gaw na a shangun ma wa rai nga nngai, na a sharin achyin ai lam ni hpe ngai chye lu n ga ngai hpe machye machyang jaw ya e.

¹²⁶MADU e, masha ni na a tara ni hpe hpa zawn n nawn ya nga ma ai majaw, ndai aten na a matu amu galaw na aten rai nga ai.

¹²⁷Aja hte jet ai aja hta grau nna, na a hkang da ai tara ni hpe ngai tsaw ra nga nngai.

¹²⁸Dai majaw na a ga matsun yawng hte hpe ngai hkan nang nga nngai; shut hpyit ai lam yawng hte hpe ngai n dawng nga nngai.

¹²⁹Na a sharin achyin ai ga ni gaw mauhpa wa rai nga ai; dai lam ni hpe, nye a myit masin mahkra hte ngai madat mara hkan nang nga nngai.

¹³⁰Na a sharin achyin ai mungga ni hpe tsun shaleng ai lam ni gaw nhtoi hpe jaw ya nga ai rai nna, n chye n chyang ai ni hpe kunghpan wa shangun nga ai.

¹³¹Na a hkang da ai ga ni hpe ngai sharawng nga nngai majaw, hka hpe gara ai zawn gara nna, n-gup mahka let kalawp nga nngai.

¹³²Nang hpe tsaw ra nga ai ni yawng hte a ntsa e, nang galaw ai zawn, ngai hpang de kayin wa nna ngai hpe matsan dum la e.

¹³³N hkru n shawp ai masha ni ngai hpe n ka-up kau lu mu ga; na a ga sadi nga ai hte maren, kadawng mat wa ai kaw na, ngai hpe shadaw la e.

¹³⁴Ngai gaw na a hkang da ai ga ni hpe hkan nang lu n ga: ngai hpe dip gamyet nga ai ni a lata kaw na hkye hkrang la e.

¹³⁵Na a myi man shingkang hte ngai hpe shaman ya e, ngai hpe na a tara ni sharin ya e.

¹³⁶Masha ni na a tara hpe n madat n mara nga ma ai majaw, nye a myi prwi ni gaw hka nu zawn lwi nga li ai.

¹³⁷MADU e, nang gaw ding hpring nga ndai hte na a tara ni mung teng man nga ai.

¹³⁸Nang jaw ya sai tara hkrang ni tsep kawp rap ra ai hte teng man nga ai.

¹³⁹Nye a gumlau hpyen ni, na a hkang da ai ga ni hpe hpa zawn n nawn ya nga ma ai majaw, nye a masin kahtet ai gaw wan zawn hkru nga li ai.

¹⁴⁰Na a ga sadi gaw kade wa teng man nga a hka! Dai hpe ngai kade wa tsaw ra nga n hka!

¹⁴¹Ngai gaw hpa n ging ai hte yu kaji kau hkrum ai wa rai nga nngai; rai ti mung, na a sharin shaga ai ga ni hpe ngai hprai kau nga nngai n rai.

¹⁴²Na a ding man ai lam htani htana prat dingsa agrin nga na ra ai. na tara mung tut nawng e teng man nga ai.

¹⁴³Myit ru myit tsang ai hte yawn hkyen ai ngai hkrum sha nga nngai; rai ti mung, na a hkang da ai mungga ni ngai hpe kabu gara shangun nga ai.

¹⁴⁴Na ga matsun ni tut nawng e teng man nga ai; ngai hkrung nga lu n ga, ngai hpe chye chyang ai hpaji jaw ya e.

¹⁴⁵Nye a myit masin mahkra hte, ngai nang hpe shaga nga nngai; MADU e, ngai hpe htan ya e, na a hkang da ai ga ni hpe ngai madat mara hkan nang nga na nngai!

¹⁴⁶Ngai nang hpe shaga nngai, ngai hpe hkye hkrang la e; na a hkang da ai tara ni hpe ngai shadik shatup nga na nngai.

¹⁴⁷Karum la na matu, jan garai n pru yang, nang hpe ngai shaga nngai; na a ga sadi hpe ngai myit mada nga nngai.

¹⁴⁸Shana tup n yup ai sha galeng taw nga let, na a sharin shaga ai ga ni hpe myit aru yu nga nngai.

¹⁴⁹MADU e, na a tsaw ra myit gaw dinggrin rai nga ai majaw; na a matsan dum ai myit ngai hpe madun dan nna, nye a asak hpe kyem mazing da ya e.

¹⁵⁰Mazut ai hte zingri zingrat ai ni ngai hpang de shanang sa wa nga ma ai, masha dai ni na a tara hpe galoi mung n hkan nang ai ni rai ma ai.

¹⁵¹Rai ti mung, MADU e, nang ngai hte ani sha nga nga ai; na a hkang da ai ga ni mahkra agrin nga ai.

¹⁵²Moi moi kaw nna, na a sharin shaga ai ga ni hpe ngai hka ja la ni ai; nang gaw dai ni hpe htani htana shagrin da nga nit dai.

¹⁵³Na a tara hpe ngai n malap kau nga nngai majaw, nye a nni nkri hpe yu nna, ngai hpe hkye hkrang la e.

¹⁵⁴Ngai hpang maga de tsap nna nye a amu hpe jeyang ya e; na a ga sadi nga ai hte maren, ngai hpe hkye hkrang la e.

¹⁵⁵Tara n lang ai ni na a tara ni hpe n hkan nga ma ai majaw; hkye hkrang la ai shanhte hkrum na ma ai n rai.

¹⁵⁶Rai ti mung, MADU e, na a matsan dum ai myit galu kaba nga ai rai nna; na a matsan dum lama ai myit madun dan nna ngai hpe hkye hkrang la e.

¹⁵⁷Ngai gaw gumlau hpyen ni hte dip gamyet sha ai masha law law lu nga nngai; rai ti mung, na a tara ni hpe madat mara na matu ngai hprai na n rai.

¹⁵⁸Gumle gumlau re ai ni na a hkang da ai ga ni hpe n hkan nga ma ai hpe, ngai mu ai shaloi, ngai yu matsat nga nngai.

¹⁵⁹MADU e, na a sharin shaga ai ga ni hpe ngai kade daram tsaw ra nga ai hpe yu yu u; na a tsaw ra myit galoi mung galai mat ai n rai, dai majaw ngai hpe hkye hkrang la e!

¹⁶⁰Na a tara madung gaw teng man ai lam rai nga ai; na a ding man ai tara dara lam yawng hte gaw htani htana agrin nga ai.

¹⁶¹Daru magam n-gun atsam rawng ai masha ni gaw ngai hpe n tara ai hku gasat nga ma ti mung; ngai gaw na a tara hpe hkungga nga nngai.

¹⁶²Na a ga sadi ni a majaw, ngai kade wa kabu gara nga a hka! Law la ai ja gumhpraw sut gan ni hpe mu tam ai wa zawn, kabu gara nga nngai.

¹⁶³Ngai gaw masu magaw ga ni mahkra hpe n ju n dawng ai hte matsat nga nngai, rai ti mung, na a tara hpe chyawm gaw ngai tsaw ra nngai.

¹⁶⁴Na a ding man ai tara dara lam ni a majaw, lani mi hta sanit lang, nang hpe ngai chyeju dum shakawn nga nngai.

¹⁶⁵Na a tara hpe tsaw ra ai ni hkum tsup re ai shim lum ai lam hpe hkam la lu nga ma ai; shing rai, hpa mung, shanhte hpe myit kataw shangun lu na n rai.

¹⁶⁶MADU e, ngai hpe hkye hkrang la na matu nang hpe ngai ala nga nngai; nang hkang da ai ga hte maren, ngai galaw nngai.

¹⁶⁷Na a sharin shaga ai ga ni hpe ngai madat mara hkan sa nga nngai; dai lam ni hpe, nye a myit masin mahkra hte tsaw ra nga nngai.

¹⁶⁸Na a hkang da ai ga ni hte na a matsun maroi ga ni hpe ngai madat mara hkan sa nga nngai; ngai galaw ai lam yawng mayawng hpe mung nang mu nga ndai.

¹⁶⁹MADU e, karum la na matu, nye a hpyi jahtau ai nsen nang kaw hkrang lung wa u ga! Na a ga sadi hte maren, ngai hpe machye machyang hpaji jaw ya e.

¹⁷⁰Nye a akyu hpyi ai ga hpe madat ya e; na a ga sadi hte maren, ngai hpe hkye hkrang la e!

¹⁷¹Nang ngai hpe na a tara ni sharin ya ai majaw, nang hpe ngai tut nawng shakawn nga na nngai.

¹⁷²Na a hkang da ai tara ni gaw ding man nga ai majaw, na a tara lam hpe ngai mahkawn shakawn nga na nngai.

¹⁷³Na a hkang da ai ga matsun ni hta ngai hkan nang nga nngai majaw, ngai hpe karum la na matu, tut nawng e, jin jin rai nga u.

¹⁷⁴MADU e, na a hkye hkrang la ai karum la lam hpe ngai kade wa marit nga a hka! Na a tara hta ngai kabu gara ai lam mu la nngai.

¹⁷⁵Ngai hpe asak jaw ya e, shaloi, nang hpe ngai shakawn nga n ga, na a sharin shaga ai ga matsun ni ngai hpe karum nga u ga.

¹⁷⁶Ngai gaw mat mat ai sagu zawn dam hkawm nga nngai; na a tara hpe n hprai kau nga nngai majaw, na a shangun ma re ai ngai hpe sa lakawn la e law.