Read Jinghpaw Common Language Bible 2009 SHAKAWN KUNGDAWN 130 Bible Online

SHAKAWN KUNGDAWN 130 - Jinghpaw Common Language Bible 2009 bible

SHAKAWN KUNGDAWN 130

¹MADU e, nye a myit htum ai shara kaw nna nang hpe ngai shaga nngai.

²MADU e, nye a hpyi jahtau ai nsen hpe na ya e; karum la na matu, nye a hpyi shaga ai nsen hpe madat ya e.

³Lama rai nna, anhte a yubak ni hpe ka matsing da ai rai yang; kadai wa mara daw dan ai kaw nna hprawng lawt lu na rai nga a ta?

⁴Rai ti mung, nang anhte hpe mara raw dat ya nga ndai, dai majaw, anhte nang hpe hkrit hkungga ai hte madat mara hkan sa nga ga ai.

⁵Ngai gaw dai MADU a karum la ai lam hpe myit mada let ala nga nngai; shi a mungga hpe ngai kam hpa nga nngai.

⁶Sin langa ni jahpawt manap hpe ala nga ai zawn rai sa, sin langa ni jahpawt manap hpe ala nga ai hta grau nna, ngai gaw dai MADU hpe myit katu ai hte ala nga nngai.

⁷Israela e, shi a tsaw ra myit gaw dinggrin anga nga ai hte; shi anhte hpe hkye hkrang la na matu, tut nawng e, ra sharawng nga ai majaw, dai MADU hta kam hpa nga mu.

⁸Shi gaw shi a Israela amyu masha ni hpe, shanhte a yubak yawng kaw nna hkye hkrang la na ra ai.