Read Jinghpaw Common Language Bible 2009 SHAKAWN KUNGDAWN 135 Bible Online

SHAKAWN KUNGDAWN 135 - Jinghpaw Common Language Bible 2009 bible

SHAKAWN KUNGDAWN 135

¹Dai MADU hpe shakawn mu!

²Dai MADU a nta wang hte anhte a Karai Kasang a Nawku Htingnu kata hta tsap nga ai MADU a shangun ma ni e, shi a mying nsang hpe shakawn mu.

³Shi mai kaja nga ai majaw, dai MADU hpe shakawn mu; shi matsan dum nga ai majaw, shi a mying nsang hpe mahkawn shakawn nga mu.

⁴Shi gaw Yaku hpe shi a matu, Israela amyu masha ni hpe shi madu na matu, lata la nu ai.

⁵Anhte a MADU gaw galu kaba nga nna, hpara ni yawng hta grau nga ai hpe ngai chye nngai.

⁶Sumsing lamu hte ginding aga hta e mung, panglai ni hte sung la ai shara shagu hkan e mung, shi myit ai hte maren, galaw nga ai.

⁷Mungkan ga a jahtum shara kaw nna laru sumwi ni hpe shi sharawt dat nna; nbung laru a matu myi hprap wan gala ya ai hte shi a dum kata kaw nna, nbung hpe mung shapraw dat wu ai.

⁸Egutu mung hta e, masha hte dusat kaw na kasha alat ni yawng hte hpe shi sat kau ya mu ai.

⁹Dai mung hta e, Hpara-u hte shi a ali ama ni yawng hte hpe ari jaw na matu; lamik kumla ni hte mauhpa amu ni hpe shi shapraw dan nu ai.

¹⁰Shi gaw amyu baw ni law law hpe shamyit kau nna; daru magam n-gun hte hpring ai hkawhkam ni hpe sat kau nu ai.

¹¹Amori masha ni a hkawhkam Sihon, Bashan hkawhkam Oga hte Hkanan mung na hkawhkam ni mahkra hpe mung sat kau nu ai.

¹²Shi gaw shanhte a lamu ga ni hpe shi a amyu masha ni a lata hta ap ya nu ai; shi gaw dai lamu ga ni hpe Israela ni a lata hta jaw da nu ai.

¹³MADU e, nang gaw Karai Kasang rai nga ndai hpe tut nawng e htawn tsun na mara ai; prat ban masha ni yawng hte mung nang hpe adum nga na mara ai.

¹⁴Dai MADU shi a amyu masha ni hpe makawp maga nga nna; shi a shangun ma ni a ntsa e, matsan dum ai myit rawng nga na ra ai.

¹⁵Masha amyu baw ni a hpara sumla ni hpe ja gumhpraw ni hte galaw da nna; dai ni gaw masha a lata hte tawk shapraw da ai sumla ni rai nga ai.

¹⁶Shanhte hta n-gup tu ti mung, n lu shaga nga ma ai, myi tu ti mung, n mu lu nga ma ai.

¹⁷Shanhte hta na tu ti mung, n na lu ma ai, shanhte gaw nsoi nsa pyi n lu sa nga ma ai.

¹⁸Dai ni hpe tawk ai ni hte, shanhte hpe kam hpa nga ai ni yawng hte mung shanhte galaw ai sumla ni zawn rai mat na mara ai.

¹⁹Israela amyu masha ni e, dai MADU hpe shakawn mu! Karai Kasang a hkinjawng ni e, shi hpe shakawn mu!

²⁰Lewi ni e, dai MADU hpe shakawn mu; dai MADU hpe nawku daw jau ai ni yawng hte e, shi hpe shakawn mu!

²¹Ziun ntsa e mung, shi shanu nga ai Yerusalem hta mung, dai MADU hpe shakawn mu. Dai MADU hpe shakawn mu.