Read Jinghpaw Common Language Bible 2009 SHAKAWN KUNGDAWN 141 Bible Online

SHAKAWN KUNGDAWN 141 - Jinghpaw Common Language Bible 2009 bible

SHAKAWN KUNGDAWN 141

¹[104] MADU e, nang hpe ngai shaga nga nngai, ngai hpe ya jang karum la e! nang hpe ngai shaga ai shaloi, ngai hpe madat ya e.

²Nye a akyu hpyi ai ga hpe manam pyaw ai baw lawban zawn; nye a lata sharawt ai gaw shana de na hkungga hpe zawn, hkap la ya e.

³MADU e, nye a n-gup hta mung, nye a nten chyinghka hta mung, sin langa ni hpe tawn da ya e.

⁴Shut hpyit amu galaw mayu ai kaw na mung, n hkru ai masha ni a tara n lang ai amu hta shang lawm nga ai kaw nna mung, ngai hpe shatsan shagang kau ya e. Shanhte a lusha poi ni hta ngai galoi mung n shang lawm nga u ga.

⁵Mai kaja ai masha wa gaw ngai hpe ari jaw u ga, shawang myit kaba hte ngai hpe daru sharin nga u ga, rai ti mung, shanhte a n hkru ai sat lawat ni hpe ninghkap na, tut nawng e, ngai akyu hpyi nga nngai majaw, n hkru ai masha ni a shagrau sha-a ai lam hpe galoi mung ngai hkap la na n rai.

⁶Shanhte a mung du, salang ni nlung ninggam kaw nna kabai jahkrat kau ai hkrum nga ma ai shaloi; amyu masha ni nye a ga teng man nga ai hpe yin la na mara ai.

⁷Shanhte a nrut nra ni gaw, chye ga da ai hpun zawn, kahtum kadaw rai mat nna; dai nrut nra ni hpe lup sung hku hkan e, gat ayai da nga ma ai.

⁸Rai ti mung, nye a Tsaw Htum Ai MADU e, ngai nang hta dingyang kam hpa nga nngai; na a makawp maga ai lam hpe ngai tam nga nngai, ngai hpe hkum si shangun et!

⁹Nye a matu, shanhte hkam da ai mahkam kaw na mung, n hkru ai amu galaw ai ni a mahkam kaw na mung, ngai hpe makawp maga la e.

¹⁰Ngai mahtang asan apra sha lai mat wa nna, tara n lang ai ni chyawm gaw tinang a mahkam hta di hkrat mat mu ga.