Read Jinghpaw Common Language Bible 2009 SHAKAWN KUNGDAWN 143 Bible Online

SHAKAWN KUNGDAWN 143 - Jinghpaw Common Language Bible 2009 bible

SHAKAWN KUNGDAWN 143

¹[106] MADU e, nye a akyu hpyi ai ga hpe na ya e! Na a ding man ai lam hta, nye a hpyi nem ai ga hpe madat ya e; na a sadi sahka hte ngai hpe htan ya e!

²Na a shangun ma wa, ngai hpe, tara jeyang ai hpe hkum hkrum shangun nga et; na a man e, mara n kap ai masha langai mi mung n nga nga ai.

³Nye a gumlau hpyen wa ngai hpe hkan shachyut dep ni ai hte; ngai hpe atsai awai di nna dang kau nu ai. Shi gaw ngai hpe sin mak ai shara hta sharen da ai rai nna, moi na ten hta si mat wa sai ni zawn ngai rai nga nngai.

⁴Dai majaw, ngai asum jaw kau na matu, jin jin rai nga nngai; myit chyum myit htum, mung hkrum sha nga nngai.

⁵Ngai gaw lai mat wa sai nhtoi ni hpe adum nga nngai; nang galaw dan lai wa sai amu ni yawng a lam ni hpe, ngai myit sawn yu nga nngai, na a amu ni yawng hpe ngai myit aru yu nga nngai.

⁶Nye a lata hpe nang kaw ladawn nna, akyu hpyi nga nngai; hkun hkraw nga ai lamu ga gaw hka hpe marit ai zawn, nye a wenyi mung, nang hpe gara nga nngai.

⁷MADU e, ngai hpe ya jang, htan ya e! nye a myit mada ai lam yawng htum mat sali ai. Na a myi man ngai kaw nna, hkum kayin kau nga et; shing rai yang, nsung hku kata de shang mat wa ai ni hta ngai lawm wa na ring ngai.

⁸Nang hpe ngai kam hpa nga nngai majaw, jahpawt manap shagu hta, na a dinggrin tsaw ra myit ngai hpe a shadum ya nga rit. Nye a akyu hpyi ai ga gaw nang kaw hkrang lung wa nna, ngai hkawm sa wa ang ai lam, ngai hpe madun ya e.

⁹MADU e, makawp maga la na matu, nang kaw ngai sa wa nga nngai; nye a gumlau hpyen ni a lata kaw nna ngai hpe mawai la e law.

¹⁰Nang gaw nye a Karai Kasang rai nga ndai, na a myit ra ai hku, galaw lu na matu ngai hpe sharin ya e. Mai kaja ai lam madun ya nna, shim ai hkrun lam hta woi lakawn wa ya rit.

¹¹MADU e, na a ga sadi hte maren, ngai hpe mawai la e; na a mai kaja ai lam hta nye a ru tsang kaw na ngai hpe hkye hkrang la e!

¹²Ngai hpe nang tsaw ra nga ndai majaw nye a gumlau hpyen ni hpe shamyit kau u, ngai gaw na a shangun ma wa rai nga nngai majaw, ngai hpe dip gamyet sha nga ai ni yawng hte hpe shamyit kau u law.