Read Jinghpaw Common Language Bible 2009 SHAKAWN KUNGDAWN 145 Bible Online

SHAKAWN KUNGDAWN 145 - Jinghpaw Common Language Bible 2009 bible

SHAKAWN KUNGDAWN 145

¹[108] Nye a Karai Kasang hte hkawhkam wa e, na a galu kaba ai lam hpe ngai htawn tsun nga na nngai; ngai nang hpe htani htana prat dingsa chyeju shakawn nga na nngai.

²Shani shagu nang hpe ngai chyeju dum shakawn nga na nngai; nang hpe ngai htani htana prat dingsa shakawn kungdawn nga na nngai.

³MADU gaw galu kaba nga ai majaw, nachying shakawn ging ai wa rai nga ai; shi a galu kaba ai lam hpe n dang chye lu nga ai.

⁴Nang galaw ai magam amu, shu mashi shu masha, ban prat mi hte prat mi, shakawn shagrau nga na mara ai; na a daru magam amu ni hpe mung, shanhte htawn tsun dan na mara ai.

⁵Na a hpung shingkang hte arawng sadang hpe mung shanhte tsun hkai dan na mara ai; na a mauhpa magam bungli ni hpe ngai myit aru yu nga na nngai.

⁶Na a daru magam amu ni hpe masha amyu ni htawn tsun dan na mara ai; na a galu kaba ai lam hpe mung, ngai htawn tsun nga na nngai.

⁷Shanhte gaw na a mai kaja ai lam yawng hte hpe tsun dan na mara ai; na a matsan dum ai lam hpe shanhte mahkawn shakawn na mara ai.

⁸MADU gaw tsaw ra ai hte matsan dum ai wa rai nga nna; shi gaw pawt sindawng ai hpe hkam sharang ai hte dinggrin tsaw ra myit hte hpring nga ai.

⁹Shi gaw nlang hte a ntsa e, mai kaja nga ai rai nna, shi galaw ai arai yawng mayawng a ntsa e mung, matsan dum ai myit rawng nga ai.

¹⁰MADU e, nang hpan da ai hkrung mahkrung yawng hte gaw nang hpe shakawn na mara ai hte, na a amyu masha ni yawng hte mung nang hpe chyeju dum shakawn na mara ai.

¹¹Shanhte gaw na a hkawhkam daru magam hpung shingkang hte na chyahtum chyalai n-gun a lam hpe hkai dan na mara ai.

¹²Shing rai, masha hkum shagu hte gaw na a atsam rawng ai magam bungli ni hte; hpung shingkang arawng sadang hte hpring nga ai, na a mungdan lam ni hpe chye na lu na mara ai.

¹³Na a up hkang lam gaw htani htana agrin nga nna, nang gaw htani htana prat dingsa agrin nga ai hkawhkam wa rai nga ndai; MADU gaw shi a ga sadi ni hta sadi dung nga ai hte magam bungli ni yawng hta tsaw ra matsan dum ai wa rai nga ai.

¹⁴Shi gaw ru tsang hkrum nga ai ni hpe karum ya nna; kataw ai ni hpe sharawt la nga ai.

¹⁵Asak hkrung ai ni yawng hte gaw nang hpe myit mada let, mada yu nga ma ai rai nna, shanhte hta lusha shahpa kadawn wa ai shaloi, shanhte hpe nang lusha jaw ya nga ndai.

¹⁶Shanhte hpe nang law htam hkra jaw nna, masha yawng a ra kadawn ai lam mahkra hpe nang jahkum shatsup ya nga ndai.

¹⁷MADU shi galaw ai lam yawng mayawng hte hta ding hpring nga ai rai nna, shi a magam bungli ni yawng hta matsan yu dum ai wa rai nga ai.

¹⁸Shi gaw shi hpe shaga ai ni hte myit malang ai hte shi hpe shaga ai ni hte ani sha nga nga ai.

¹⁹Shi hpe hkrit hkungga ai ni a ra kadawn ai lam ni hpe shi jaw ya nna; shanhte a hpyi jahtau ai nsen ni hpe na ai hte shanhte hpe hkye hkrang la mu ai.

²⁰Shi hpe tsaw ra ai masha hkum shagu hte hpe, shi makawp maga ya ti mung; tara n lang ai ni hpe chyawm gaw shi sharun shabyak kau na wu ai.

²¹Ngai gaw dai MADU hpe tut nawng e shakawn kungdawn nga na nngai; shi hpan da ai hkrung mahkrung yawng hte gaw shi a chyoi pra ai mying nsang hpe htani htana shakawn kungdawn nga mu ga law.