Read Jinghpaw Common Language Bible 2009 SHAKAWN KUNGDAWN 19 Bible Online

SHAKAWN KUNGDAWN 19 - Jinghpaw Common Language Bible 2009 bible

SHAKAWN KUNGDAWN 19

¹[17] Sumsing lamu gaw Karai Kasang a hpung shingkang hpe kade wa san pra ai hku hpaw shaleng da nga a hka! Dai gaw shi galaw da sai amu hpe kade wa dan leng ai hku madun dan nga a hka!

²Lani hte lani shi a hpung shingkang hpe shana ya nna; lana hte lana dai lam hpe kahtap tsun dan nga ai.

³N-gup aga hte n shaga ai sha, hpa nsen mung n na lu nga ai;

⁴rai tim, shanhte a mungga gaw mungkan ga shara shagu de chyam bra mat wa nna mungkan ting dai mungga hpe na lu nga ai. Karai Kasang gaw jan a matu lamu ntsa e nta langai gap da ya nu ai;

⁵shing rai, hkungran na matu kabu gara ai hte pru sa wa ai la nnan langai mi zawn mung, ginsup ninghkrin langai mi kagat shingjawng na matu, myit katu wa nna pru wa ai wa zawn mung, ajan gaw jahpawt manap e pru wa nga ai.

⁶Shi gaw lamu maga mi de nna pru wa nhtawm maga mi de dinghkren du nga ai. Hpa mung shi a kang kahtet ai kaw na lawt lu nga ai n rai.

⁷MADU a tara gaw hkum tsup nga ai; dai gaw n-gun atsam ningnan jaw ya nga ai. MADU a hkang da ai ga ni teng man kam ging nga ai majaw, dai tara n lu ai ni hpe hpaji byeng-ya jaw ya nga ai.

⁸MADU a tara ni gaw teng man nga nna, dai hpe hkan sa madat mara ai ni kabu gara nga ma ai. MADU a hkang da ai tara ni gaw ding man nga ai rai nna, myit masin hpe chye na shangun nga ai.

⁹MADU hpe hkrit hkungga ai lam mai kaja nga ai rai nna, dai gaw htani htana agrin nga na ra ai. MADU a tara dara ai lam teng man nga ai rai nna, dai gaw tut nawng e tara rap ra nga ai.

¹⁰Dai ni gaw ja jet hta grau nna ra sharawng mai nga ai hte lagat jahku jet hta grau dwi nga ai.

¹¹Dai ni gaw na a shangun ma rai nga ai ngai hpe machye machyang hpaji jaw ya e; ngai mung dai lam ni hpe hkan sa madat mara ai majaw, shagrau sha-a ai hkrum nga nngai.

¹²Tinang nang a shut ai lam ni hpe kadai wa mung n mu lu nga ai; MADU e, makoi magap da ai yubak mara kaw na mung, ngai hpe hkrang shaw la e!

¹³Myit shadang ai yubak mara ni kaw na mung, ngai hpe shim hkra bau sin ya e; dai ni gaw ngai hpe n up lu mu ga. Shing rai, ngai gaw hkum tsup wa nna n hkru ai yubak kaw na mung lawt lu na nngai.

¹⁴Nye a shingbyi shara hte nye a hkye hkrang la ai MADU e, nye a n-gup ga ni hte nye a sumru ai lam ni gaw na a man e sharawng awng nga u ga law.