Read Jinghpaw Common Language Bible 2009 SHAKAWN KUNGDAWN 25 Bible Online

SHAKAWN KUNGDAWN 25 - Jinghpaw Common Language Bible 2009 bible

SHAKAWN KUNGDAWN 25

¹[23] O MADU e, nye a akyu hpyi ai ga hte nang hpe nawng jau nga nngai;

²nye a Karai Kasang e, nang hpe ngai kam hpa nga nngai. Kaya kahpa sum mat ai kaw na ngai hpe hkye hkrang la e; nye a gumlau hpyen ni hpe awng padang hte hkum kabu shangun nga et!

³Nang hpe kam hpa ai ni hta sum ai lam n hkrum nga ai; nang hpe gumlang ai ni a ntsa e chyawm gaw tin tin du nga ai.

⁴O MADU e, na a lam ni, ngai hpe sharin ya e, dai lam ni, ngai hpe chye shangun e.

⁵Na a teng man ai lam hte maren, asak hkrung nga lu na matu ngai hpe sharin ya e, nang gaw nye a Karai Kasang rai nga nna ngai hpe hkye hkrang la ai wa rai nga ndai majaw, ngai nang hta tut nawng kam hpa nga nngai.

⁶O MADU e, chyaloi nhkoi kaw nna nang madun dan nga sai na a matsan dum ai myit hte dinggrin tsaw ra myit hpe adum nga u.

⁷Nye a ram prat na shut hpyit ai lam ni hte yubak mara ni hpe, raw dat kau ya e. MADU e, na a dinggrin tsaw ra ai myit hte mai kaja ai myit hta ngai hpe adum nga e law!

⁸MADU gaw ding hpring ai hte mai kaja ai wa rai nga ai majaw, yubak kap ai ni hpe shanhte hkan sa ra ai lam, shi sharin ya nga ai.

⁹Teng man ai lam hta shagrit shanem ai ni hpe shi woi lakawn wa nna; shi a myit ra ai lam shanhte hpe sharin ya nga ai.

¹⁰Shi a ga shaka hpe kyem da nna, shi a hkang da ai ga yawng hte hpe madat mara ai ni hpe, sadi sahka ai myit hte tsaw ra myit hte shi lam woi nga ai.

¹¹MADU e, na a ga sadi hpe shadik shatup nga u, nye a yubak ni hpe mung raw dat kau ya e; kaning rai nme law, dai hte gaw law la nga ai.

¹²MADU hpe madat mara ai ni gaw shanhte hkan sa ra ai lam ni hpe shi kaw nna sharin la na mara ai.

¹³Shanhte gaw tut nawng e ngamu ngamai wa nna shanhte a kashu kasha ni mung dai lamu ga hpe madu lu na mara ai.

¹⁴Dai MADU gaw shi a ga madat mara nga ai ni a jinghku rai nga nna shi a ga shaka shanhte hte shagrin da nga ai.

¹⁵Karum la na matu, MADU hpe ngai aten shagu mada nga ai rai nna, shi ngai hpe hkrithpa shara kaw nna mawai la nga ai.

¹⁶MADU e, ngai gaw garen gari hkrum nga nngai hte n-gun kya nga nngai majaw; ngai hpe mada mara ya nna, matsan dum la e law.

¹⁷Nye a myit ru myit tsang ai lam ni hpe hkyamsa jaw ya e, ru tsang lam yawng mayawng kaw na ngai hpe hkye hkrang la e law.

¹⁸Nye a myit ru myit tsang lam hte nni nkri lam ni hpe myit sawn ya e, nye a yubak ni yawng hte hpe mung dat kau ya e.

¹⁹Ngai hta gumlau hpyen ni kade law nga ai hpe mu ya e; shanhte ngai hpe kade wa n dawng nga ma ai hpe mung chye ya e.

²⁰Ngai hpe makawp maga ai hte hkye hkrang la e; ngai hpe hkum sum shangun nga et. Shim lum nga na matu, nang kaw ngai sa du nngai.

²¹Nang hpe ngai kam hpa nga nngai majaw, nye a mai kaja ai hte myit malang ai gaw ngai hpe bau sin nga u ga.

²²O Karai Kasang e, na a amyu Israela masha ni hpe shanhte a ru tsang ai lam yawng kaw nna hkye hkrang la u law!