Read Jinghpaw Common Language Bible 2009 SHAKAWN KUNGDAWN 30 Bible Online

SHAKAWN KUNGDAWN 30 - Jinghpaw Common Language Bible 2009 bible

SHAKAWN KUNGDAWN 30

¹[28] MADU e, nang ngai hpe hkye hkrang la nit dai, nye a gumlau hpyen ni ngai hpe dang kau ai kaw na, nang ngai hpe makawp maga la nit dai majaw, ngai nang hpe shakawn nngai.

²O MADU nye a Karai Kasang e, karum la na matu ngai nang hpe jahtau ni ai, nang ngai hpe shamai ya nit dai;

³nang gaw ngai hpe nsung hku hta na mawai la nit dai. Ngai Katsan ga de yu wa nga ai kaw na nang nye a asak hpe mawai la nit dai.

⁴Shi a kangka ai amyu masha ni yawng hte e, dai MADU hpe mahkawn shakawn nga mu! Chyoi Pra ai Wa galaw da sai amu hpe dum nna, shi hpe chyeju dum mu!

⁵Shi a masin kahtet ai gaw hkring mi sha rai nga ai, shi a mai kaja ai lam prat ting a matu rai nga ai. Shana e myi prwi ni lwi nga ti mung, jahpawt e kabu gara ai lam lu la nga ai.

⁶“Ngai gaw galoi mung sum hkrum na n rai,” ngu nna nye hkum ngai myit sim ai hte tsun nngai.

⁷MADU e, nang gaw nye a ntsa e mai kaja nga nit dai; Nang gaw ngai hpe bum ntsa e de da ai hpyen dap langai mi hpe zawn makawp maga da nit dai. Rai ti mung, na a myi man hpe makoi kau ai shaloi, ngai hkrit kahpra mat nngai.

⁸MADU e, ngai nang hpe shaga nngai; nang karum la na matu ngai hpyi nem nngai:

⁹“Nye a si hkrung si htan kaw nna, nang hpa baw akyu hkam la lu na rai nga n ta? Lup sung hku de ngai sa wa ai kaw nna, hpa baw amyat lu la na rai nga n ta? Si sai masha ni nang hpe shakawn lu nga ma ni? Na a n shut n shai chye ai mai kaja lam hpe, shanhte tsun dan lu na ma ni?

¹⁰MADU e, ngai hpe na ya ai hte matsan dum la e! MADU e, ngai hpe karum la e law!”

¹¹Nang gaw nye a yawn hkyen ai hpe kabu gara ka gumlawt ai hte galai ya nit dai; nye a myit yawn ai lam hpe nang la kau ya nna, kabu gara ai hte ngai hpe shinggrup da ya nit dai.

¹²Shing rai, ngai gaw atsin sha nga nga na nngai n rai; ngai nang hpe mahkawn shakawn nga na nngai. MADU e, nang gaw nye a Karai Kasang rai nga ndai; Ngai nang hpe htani htana chyeju dum nga na nngai law.