Read Jinghpaw Common Language Bible 2009 SHAKAWN KUNGDAWN 33 Bible Online

SHAKAWN KUNGDAWN 33 - Jinghpaw Common Language Bible 2009 bible

SHAKAWN KUNGDAWN 33

¹Ding hpring ai ni yawng hte e, MADU galaw dan sai amu a majaw, kabu gara marawn jahtau nga mu; shi a ga madat mara ai ni yawng hte e, shi hpe shakawn mu.

²Dai MADU hpe tingse ni hte dum shakawn mu, sumri rawng ai madum sumpyi ni hte shi hpe shakawn mu.

³Mahkawn ga nnan hte shi hpe mahkawn mu, madat pyaw hkra tingse dum nna, kabu gara marawn jahtau nga mu!

⁴Dai MADU a mungga ni gaw teng man nga ai, shi a amu bungli ni yawng kam mai nga lu ai.

⁵MADU gaw ding man ai hte teng man ai hpe tsaw ra nga ai; shi a dinggrin tsaw ra myit gaw aga ting hta hpring nga ai.

⁶MADU gaw shi a hkang da ai mungga hte sumsing lamu ni hpe hpan da nu ai; jan, shata hte shagan ni mung, shi tsun dat ai mungga hte byin wa sai.

⁷Shi gaw hka panglai ni yawng hpe shara langai mi hta sumpum gumdin da nga ai; sung ai nammukdara hka ni hpe dum ni hta la shingdang da nu ai.

⁸Ginding aga yawng hte e, dai MADU hpe nawku mu! Mungkan ga na mashani yawng hte e, shi hpe shagrau sha-a mu!

⁹Shi ga shaga dat ai shaloi, mungkan ga byin pru wa sai; shi a hkang da ai mungga a jaw e, arai yawng mayawng dan pru wa sai.

¹⁰Dai MADU gaw masha amyu baw ni a shatawng shada ai lam ni hpe shanut kau ya nga ai; shanhte a maw mawn ai lam ni n awng dang u ga, shi shanhte hpe hkum shingdang da nga ai.

¹¹Rai ti mung, shi a yaw shada ai lam ni gaw htani htana agrin nga ai; shatawng shada ai lam ni mung prat dingsa anga nga ai.

¹²Dai MADU hpe shanhte a Karai Kasang shatai ai amyu baw gaw a nga ai; shi e lata la hkrum ai amyu masha ni gaw a lu nga ai!

¹³Dai MADU gaw sumsing lamu kaw nna gum yu nga ai hte shinggyim masha nlang hte hpe mu nga ai.

¹⁴Shi up hkang nga ai shara kaw nna, ga ningtsa e nga ai masha nlang ni hpe shi gum yu nga ai.

¹⁵Dai MADU gaw shanhte a myit mang ai lam yawng mayawng hte hpe hkrang shapraw ya nga ai; shanhte galaw ai lam yawng mayawng hte hpe mung chye ya nga ai.

¹⁶Shi a n-gun rawng ai hpyen luksuk a majaw hkawhkam wa majan dang ai n rai; hpyen ma langai mi gaw shi a n-gun a majaw awng padang lu ai n rai.

¹⁷Majan gumra ni gaw awng padang a matu kaman lila rai nga ai; dai ni a n-gun kaba hte hkye hkrang la lu nga ai n rai.

¹⁸Dai MADU gaw shi hpe hkrit hkungga ai ni hte shi a dinggrin tsaw ra myit hpe kam hpa nga ai ni hpe, sin yu nga ai.

¹⁹Dai MADU gaw shanhte hpe si ai kaw na hkye hkrang la nga ai; shi gaw shanhte hpe hku hku hpang gara ai aten hta asak hkrung nga lu na ahkang jaw ya nga ai.

²⁰Anhte gaw dai MADU hpe myit mada nga ga ai; shi gaw anhte a makawp ninggang hte karum la ai wa rai nga ai.

²¹Shi a majaw anhte kabu gara nga ga ai; shi a chyoi pra ai mying nsang hta anhte kam ga ai.

²²MADU e, nang hpe anhte myit mada nga ga ai hte maren, na a dinggrin tsaw ra myit gaw anhte hte rau anga nga u ga law.