Read Jinghpaw Common Language Bible 2009 SHAKAWN KUNGDAWN 34 Bible Online

SHAKAWN KUNGDAWN 34 - Jinghpaw Common Language Bible 2009 bible

SHAKAWN KUNGDAWN 34

¹[31] Ngai gaw dai MADU hpe tut nawng chyeju dum nga na nngai; shi hpe shakawn ai lam, ngai galoi mung jahkring kau na nngai n rai.

²Shi galaw da sai amu a matu, ngai shi hpe shakawn nga na nngai; dip gamyet sha hkrum ai ni yawng hte e, madat la nna kabu gara nga mu!

³Dai MADU a galu kaba ai lam hpe ngai hte rau htawn tsun ga; shi a mying nsang hpe anhte jawm shakawn ga!

⁴Ngai gaw MADU kaw akyu hpyi ni ai hte shi ngai hpe htan ya ni ai; shi gaw nye a hkrithpa lam yawng kaw na, ngai hpe shalawt la ni ai.

⁵Dip gamyet sha hkrum ai masha ni gaw dai MADU hpe yu nna kabu gara nga ma ai; shanhte gaw galoi mung myit daw myit hten ai hkrum na mara ai n rai.

⁶Matsan mayan hkrum ai masha ni shi hpe shaga yang, shi htan ya nga ai; shi gaw shanhte a ru yak tsin-yam yawng kaw na shanhte hpe hkye hkrang la nga ai.

⁷MADU hpe shagrau sha-a ai ni hpe shi a lamu kasa ni bau sin nga ma ai; hkrithpa shara kaw na mung, shanhte hpe mawai la nga ai.

⁸Dai MADU kade wa mai kaja nga ai gaw nang hkum nan chyim yu nna chye u; shi hta shingbyi shara mu ai wa gaw a nga ai.

⁹Shi a amyu masha ni yawng hte e, dai MADU hpe shagrau sha-a nga mu; shi a ga madat mara ai ni gaw shanhte a ra kadawn nga ai lam yawng hte hpe hkam la lu nga ai.

¹⁰Hkanghkyi ni pyi lusha kadawn nna kawsi hkrum nga ma ti mung; MADU a ga madat mara ai ni gaw mai kaja ai lam hpa mung ra kadawn nga ma ai n rai.

¹¹Nye a rau ram manang ni e, wa marit nye a ga hpe madat mu; dai MADU hpe shagrau sha-a na lam ngai nanhte hpe sharin ya na nngai.

¹²Nang gaw kabu gara ai asak hkrun lam hpe ra sharawng nga n ni? Asak galu ai hte kabu gara ai hpe nang ra nga n ni?

¹³Dai hpang, n hkru ai ga tsun shaga ai hte masu magaw ga tsun ai lam hpe koi gam nga u.

¹⁴N hkru n shawp ai lam hpe koi kau nna mai kaja ai lam hpe galaw nga u; na a myit masin mahkra hte ngwi pyaw sim sa lam a matu, shakut shaja nga u.

¹⁵Dai MADU gaw ding hpring ai ni hpe mada mara nga nna; shanhte a hpyi jahtau ai nsen ni hpe madat ya nga ai.

¹⁶Rai ti mung, n hkru n shawp ai amu galaw ai ni hpe shi hkum shingdang nga ai; shing rai, shanhte si wa ai shaloi, shanhte gaw alawan sha, malap kau ai hkrum nga ma ai.

¹⁷Ding hpring ai ni MADU hpe shaga yang shi madat ya nna; shi gaw shanhte a ru yak tsin-yam yawng hta na, shanhte hpe mawai la nga ai.

¹⁸Dai MADU gaw myit daw myit hten ai ni hte ani sha nga nga ai; myit mada shara n nga mat sai ni hpe shi hkye hkrang la nga ai.

¹⁹Dai mai kaja ai masha wa gaw ru yak tsin-yam law law hkrum sha nga ai; MADU gaw dai ni yawng hta na shi hpe hkye hkrang la nga ai.

²⁰MADU gaw shi hpe n hten n za mat hkra, tsep kawp kyem mazing ya nga ai; shi a nrut nra ni langai mi mung, daw hten ai hkrum nga ai n rai.

²¹N hkru ai gaw tara n lang ai ni hpe sat kau na maru ai; ding hpring ai ni hpe n dawng ai ni chyawm gaw ari jaw ai hkrum na mara ai.

²²Dai MADU gaw shi a amyu masha ni hpe hkye hkrang la na ra ai; makawp maga la na matu, shi kaw du sa ai ni chyawm gaw jahti la ai hkrum na mara ai.