Read Jinghpaw Common Language Bible 2009 SHAKAWN KUNGDAWN 37 Bible Online

SHAKAWN KUNGDAWN 37 - Jinghpaw Common Language Bible 2009 bible

SHAKAWN KUNGDAWN 37

¹[34] N hkru n shawp ai ni a majaw myit hkum ru et; n teng n man ai amu galaw ai ni hpe hkum yu manawn et.

²Hkraw mat ai tsingdu zawn, shanhte kade nna yang hkoi mat na mara ai; nyip mat ai hpun lawn kasha ni zawn shanhte si mat na mara ai.

³Dai MADU hta kam hpa nga let mai kaja ai amu hpe galaw nga u; dai lamu ga hta shanu nga nna shim nga u.

⁴Dai MADU hta na a kabu gara ai lam hpe tam la u; shi gaw na a myit ra sharawng ai lam hpe jaw ya na ra ai.

⁵Na hkum dai MADU hpe ap ya u; shi hta kam hpa nga u, nang hpe shi karum la na ra ai.

⁶Na a ding man ai lam hpe jan pungding shingkang zawn, shi shapraw dan na ra ai.

⁷Dai MADU a man e amu sha nga nga nna shi shabyin ya na lam hpe ala nga u; n hkru n shawp ai ni a yaw shada ai lam ni hta awng dang wa nna, ngamu ngamai wa ai ni hpe hkum yu tsang nga et.

⁸Myit hkum ru, masin mung hkum pawt et, dai gaw nang hpe ru tsang sha hkrum shangun nga ai.

⁹Dai MADU hta kam hpa nga ai ni gaw lamu ga hpe madu lu na mara ai; rai ti mung, tara n lang ai ni chyawm gaw gawt shapraw kau ai hkrum na mara ai.

¹⁰Tara n lang ai ni gaw kade nna yang, hkoi mat wa na mara ai; nang shanhte hpe tam yu ti mung, shanhte hpe mu tam na n rai.

¹¹Rai ti mung, myit shagrit shanem ai ni mahtang dai lamu ga hpe madu lu na mara ai; ngamu ngamai ai lam hte ngwi pyaw sim sa ai lam hpe kabu gara hkam la lu na mara ai.

¹²N hkru n shawp ai masha wa gaw mai kaja ai masha wa hpe n kaja ai hku maw mawn nna shi hpe n ju n dawng ai myi hte yu azi da nga ai.

¹³Rai ti mung, tara n lang ai ni gaw kade n na yang, jahten kau ai hkrum mat na hpe MADU chye nga ai majaw, shi shanhte hpe mani nga ai.

¹⁴Matsan mayan ni hte ra kadawn ai ni hpe mung, teng man ai amu galaw ai masha ni hpe mung sat kau na nga; n hkru n shawp ai ni gaw shanhte a nhtu ni hpe shaw nna, ndan ni hpe shachyen nga ma ai;

¹⁵rai ti mung, shanhte ni mahtang shanhte a nhtu ni hte nan sat kau ai hkrum na mara ai; shanhte a ndan ni mung agrawp daw kau ai hkrum na mara ai.

¹⁶Mai kaja ai wa a sut gan kachyi mi gaw tara n lang ai wa a sut gan yawng hta grau nna manu dan nga ai,

¹⁷hpa majaw nga yang, MADU gaw tara n lang ai wa a n-gun hpe shadaw kau ya na ra ai; rai ti mung, mai kaja ai ni hpe chyawm gaw shi makawp maga la na ra ai.

¹⁸Dai MADU gaw shi a ga madat mara nga ai ni hpe shi lanu lahku nga nna; dai mungdan hpe shanhte htani htana madu na mara ai.

¹⁹Yak hkak hkrum ai shaloi nni nkri hpe shanhte hkam sha na mara ai n rai; hku hku ai aten hta mung, shanhte gaw ra kadawn ai lam n nga hkra, hkam la lu na mara ai.

²⁰Rai ti mung, tara n lang ai ni gaw si mat na mara ai; MADU a gumlau hpyen ni mung nam e tu ai nampan ni zawn wai mat nna, wan hkut zawn shanhte mawng mat na mara ai.

²¹Tara n lang ai masha wa gaw arai shap la ti mung, galoi mung nhtang ya nga ai n rai; rai ti mung, mai kaja ai wa gaw shi a kumhpaw kumhpa ni hpe ndaw nhta jaw ya nga ai.

²²MADU kaw na shaman ai chyeju lu la ai ni gaw lamu ga hpe madu lu na mara ai; rai ti mung, shi kaw na dagam dala hkrum ai ni chyawm gaw gawt shapraw kau ai hkrum na mara ai.

²³Dai MADU gaw masha wa hpe shi sa ang ai lam hta woi wa ai; shi hta sharawng awng ai ni hpe makawp maga ya nga ai.

²⁴Shanhte kataw ai lama rai yang, shanhte kataw nan nga na mara ai n rai; kaning rai nme law, MADU gaw shanhte hpe sharawt la na ra ai.

²⁵Ya chyawm gaw, ngai asak kaba ugut gu wa nga nngai, ngai gaw aten na na asak hkrung nga ni ai; rai ti mung, mai kaja ai masha wa hpe MADU kau da nna, shi a kashu kasha ni lusha hpyi sha hkawm ai hpe ngai galoi mung garai n mu yu nga nngai.

²⁶Shi gaw aten shagu, ndut ndang jaw ya ai hte kaga ni hpe hkoi ya nga ai; shi a kashu kasha ni mung chyeju kumhpa tai nga ma ai.

²⁷N hkru ai lam hpe kau da nna mai kaja ai amu hpe galaw u; shing rai, na a aru arat ni gaw dai lamu ga hta tut nawng e, shanu nga lu na mara ai;

²⁸hpa majaw nga yang, MADU gaw teng man ai lam hpe tsaw ra nga nna; kangka ai shi a amyu masha ni hpe n kau da nga ai majaw rai nga ai. Shi gaw shanhte hpe htani htana makawp maga nga ai, rai ti mung, tara n lang ai wa a aru arat ni gaw gawt shapraw kau ai hkrum na mara ai.

²⁹Ding hpring ai masha ni gaw lamu ga hpe madu lu na mara ai hte; dai lamu ga hta htani htana shanu nga na mara ai.

³⁰Mai kaja ai masha langai mi a n-gup ga ni hta hpaji ga rawng nga ai; shi gaw tut nawng e tara ding nga ai.

³¹Shi gaw Karai Kasang a tara hpe shi a kraw lawang hta kyem da nga ai; dai tara hpe galoi mung ahkan sa nga na ra ai.

³²Tara n lang ai masha wa gaw mai kaja ai masha wa hpe lagyim yu nna; shi hpe sat kau na, shakut nga ai.

³³Rai ti mung, MADU gaw shi hpe shi a gumlau hpyen wa a lata hta ap kau da na wu ai n rai; shi tara jeyang ai hkrum yang, ari jaw ai hte daw dan hkrum na n rai.

³⁴MADU hta myit mada nga nna shi a hkang da ai ga ni hpe madat mara u; shi nang hpe lamu ga jaw ya nna, nang hpe shagrau sha-a na ra ai. Tara n lang ai ni gawt shapraw kau hkrum ai hpe nang mu lu na ra ai.

³⁵Tara n lang nna mazut gumshem nga ai wa hpe ngai lang mi chye yu ni ai; shi gaw Lebanon arit hpun zawn masha shagu a ntsa e, ka-up da nu ai;

³⁶rai ti mung, kade n na ai aten hta ngai lai wa yu ai shaloi dai shara hta shi n nga sai; shi hpe ngai tam yu tim, shi hpe n mu lu mat ni ai.

³⁷Mai kaja ai masha wa hpe matsing da u, ding hpring ai masha wa hpe maram masam yu u; ngwi pyaw sim sa ai masha wa gaw aru arat law law lu nga ai;

³⁸rai ti mung, yubak kap ai masha ni gaw tsep kawp jahten kau ai hkrum na mara ai; shanhte a aru arat ni mung yeng seng kau ai hkrum nga ma ai.

³⁹Dai MADU gaw ding hpring ai masha ni hpe hkye hkrang la nna, ru tsang hkrum ai aten ni hta shanhte hpe makawp maga ya nga ai.

⁴⁰Shi gaw shanhte hpe karum nna mawai la nga ai, shanhte gaw shi kaw makawp maga la na matu du sa nga ma ai majaw, shi shanhte hpe tara n lang ai ni a lata kaw nna hkye hkrang la nga ai.