Read Jinghpaw Common Language Bible 2009 SHAKAWN KUNGDAWN 38 Bible Online

SHAKAWN KUNGDAWN 38 - Jinghpaw Common Language Bible 2009 bible

SHAKAWN KUNGDAWN 38

¹[35] O MADU e, na a masin kahtet ai hta ngai hpe ari hkum jaw et!

²Na a pala ni a jaw e, ngai hta nma kap nga nna nang ngai hpe adup kadawng tawn nga ndai.

³Na a masin kahtet ai majaw ngai laja lana machyi hkrum nga nngai; nye a yubak ni a majaw, nye a hkum ting hta ana zinli hkrai rai nga li ai.

⁴Ngai gaw nye a yubak mawru kata hta lup mat wa nga nngai; dai ni gaw tsin-yam lit langai mi rai nga nna, hkam sharang lu na matu, nau li la nga ai.

⁵Ngai gaw angawk angak rai mat ni ai majaw, nye a nma ni yat nna manam hkying nga li ai.

⁶Ngai gaw nshang htingkung nga nngai hte myit daw myit hten ai hkrum nga nngai; shing rai, shani tup ngai sharung shayawt nga nngai.

⁷Ngai gaw hkum kahtet machyi nga nngai hte si wa mahka rai mat nga nngai.

⁸Ngai gaw hki ba la nga nngai hte teng sha wa, agrawp agrap rai mat nga nngai; nye a myit kraw lawang mung ru tsang hkrum nga nna, nchyi nmu hte ngai madai nga nngai.

⁹O Madu e, ngai hpa hpe ra marit nga ai gaw nang chye nga ndai; nye a madai ai nsen ni yawng hpe mung nang na ya nga ndai.

¹⁰Nye a salum htuk htak nga li ai, nye a n-gun mung htum mat sali ai; nye a myi ni mu na atsam n rawng mat sai.

¹¹Nye a ningma ni a majaw, nye a manang ni hte htingbu ni ngai kaw n ni sa wa na ma ai; nye a dinghku pyi ngai hpe gang kau da nga ai.

¹²Ngai hpe sat mayu ai ni, nye a matu mahkam hkam da nga nna, ngai hpe machyi shangun mayu ai ni mung ngai hpe jahten shabyak lu na matu jahkrit shama nga ma ai; shanhte gaw ngai hpe n sim n sa n kaja ai lam maw mawn nga ma ai.

¹³Ngai gaw na lahpang ai masha langai wa zawn n na lu nngai, ma-a ai masha langai wa zawn n lu shaga nga nngai.

¹⁴Ngai gaw na n na lu ai majaw, n htan ai na hpang wa hte bung nga nngai.

¹⁵Rai ti mung, MADU e, ngai gaw nang hpe kam hpa nga nngai; nye a MADU Karai Kasang e, nang gaw ngai hpe htan ya na rin dai.

¹⁶Nye a gumlau hpyen ni, nye a myit ru myit tsang ai lam hta hkum yu kabu shangun nga et; nye a hkrat sum mat ai lam hta mung, shanhte hpe hkum gumrawng shangun nga et!

¹⁷Ngai gaw kataw na sha rai ni ai hte n sim n sa machyi ai mung hkrum nga nngai.

¹⁸Nye a yubak ni hpe ngai yin la nga nngai, dai gaw ngai hpe myit ru myit tsang lam jahpring ya nga ai.

¹⁹Nye a gumlau hpyen ni gaw hkam kaja nga ma ai hte n-gun ja nga ma ai; mara kata, ngai hpe n dawng ai ni law law nga ma ai.

²⁰Mai kaja ai a matu, n hkru ai hpe htang jaw ai ni gaw teng man ai amu hpe ngai galaw shakut nga ai majaw, ngai hte nhtan shai nga ma ai.

²¹MADU e, ngai hpe hkum kau da et; nye a Karai Kasang e, ngai hte tsan tsan hkum nga et.

²²Ngai hpe hkye hkrang la ai MADU e, ngai hpe ya jang karum la e law!