Read Jinghpaw Common Language Bible 2009 SHAKAWN KUNGDAWN 44 Bible Online

SHAKAWN KUNGDAWN 44 - Jinghpaw Common Language Bible 2009 bible

SHAKAWN KUNGDAWN 44

¹[40] O Karai Kasang e, anhte a na ni hte dai lam hpe anhte na yu saga ai. Anhte a kaji kawa ni mung, lai mat wa sai nhtoi ni ngu ai, shanhte a aten hta, nang galaw shapraw dan sai galu kaba ai amu ni ngu ai;

²maigan masha ni hpe nang kaning rai shaden kau sai lam, shanhte a mungdan hta na a amyu masha ni hpe shanu nga na matu shara jahkrat ya sai lam, kaga amyu baw ni hpe nang ari jaw kau nna na a amyu masha ni hpe ngamu ngamai shangun nit dai.

³Na a amyu masha ni gaw dai lamu ga hpe shanhte a nhtu ni hte gasat dang la lu ma ai n rai; shanhte a n-gun atsam hte dai mung hpe lu la ai n rai. Dai gaw na a daru magam atsam hte na a chyalai n-gun shanhte hpe na a tsaw ra myit madun sai ngu ai nang shanhte hte rau shanu nga ai ga sadi ni a majaw rai nga ai.

⁴Nang gaw nye a hkawhkam wa hte nye a Karai Kasang rai nga ndai; na a amyu masha ni hpe awng padang nang jaw ya nga ai rai nna,

⁵anhte gaw gumlau hpyen ni hpe na a daru magam n-gun hte dang ga ai.

⁶Ngai gaw nye a ndan hpe n kam nngai, nye a nhtu mung ngai hpe hkye la lu ai n rai;

⁷rai ti mung, nang gaw anhte hpe gumlau hpyen ni a lata kaw na hkye hkrang la nit dai; anhte hpe n ju n dawng ai ni hpe mung dang kau ya nga nit dai.

⁸Anhte gaw nang hpe tut nawng e shakawn nga na ga ai, nang hpe htani htana chyeju dum nga na ga ai.

⁹Rai ti mung, ya chyawm gaw nang anhte hpe kau da nit dai hte sum shangun kau nit dai; nang gaw anhte a hpyen luksuk ni hte rau majan pa de kachyi mi mung n pru sa nit dai.

¹⁰Nang gaw anhte hpe anhte a gumlau hpyen ni kaw nna jahtaw jahprawng kau shangun nhtawm, shanhte gaw anhte a arai ni hpe shanhte a matu, hpya la kau manu ai.

¹¹Sagu ni hpe zawn anhte hpe sat kau na matu, nang ahkang jaw kau nit dai; nang gaw anhte hpe maigan mungdan ni de shabra kau nit dai.

¹²Na a amyu masha ni gaw manu kachyi mi sha dan nga ai ni hpe zawn nang shanhte hpe manu kachyi mi hte sha dut kau nga nit dai.

¹³Anhte a htingbu ni gaw nang anhte hpe kaning di kau sai lam hpe mu nga ma ai rai nna, shanhte gaw anhte hpe ashu ai hte mani asawng nga ma ai.

¹⁴Amyu baw ni a ka-ang e, nang anhte hpe mani chyai hpa galaw kau nit dai rai nna; shanhte gaw shanhte a baw kanga let, anhte hpe jahpoi asawng nga ma ai.

¹⁵Ngai gaw tut nawng e, myi man sum nga nngai;

¹⁶nye a gumlau hpyen ni hte ngai hpe n ju n dawng ai ni a asawng asang ai hte n kaw n law re ai ni a nsen ni hpe na lu ai majaw; ngai gaw kaya kahpa hte htinggrum da hkrum nga nngai.

¹⁷Anhte gaw nang hpe n malap kau nga ga ai hte anhte hpe nang tawn da ya sai ga shaka hpe mung n jahten sharun kau ga ai; rai ti mung, dai lam ni yawng gaw anhte hta byin nga sai.

¹⁸Anhte gaw nang hta sadi n dung nga saga ai n rai; na a hkang da ai ga ni hpe mung, anhte n hkan ai sha, lale kau ga ai n rai;

¹⁹Rai ti mung, zai ai dusat ni a ka-ang hta, nang anhte hpe matsan mayan tawn kau da nna; htat htum ai si ai shingnip hta nang anhte hpe kabai kau da nit dai.

²⁰Anhte a Karai Kasang hpe nawku daw jau nga ai hpe anhte jahkring kau nna; tsasam karai hpe akyu hpyi nga ga ai rai yang,

²¹anhte a kraw kata e makoi da ai myit sawn lam ni hpe nang chye ya nga ndai majaw; nang dai lam hpe teng teng mu chye kau na ndai.

²²Rai ti mung, na a majaw anhte aten shagu sat kau ai hkrum nga ga ai; sat na san da hkrum ai sagu ni zawn, anhte nawn da ai hkrum nga ga ai.

²³MADU e, rawt u! Nang hpa rai yup pyaw nga n ta? Na a myit hpe shajin u! Anhte hpe htani htana hkum kau da nga et!

²⁴Nang gaw hpa rai anhte kaw na makoi nga n ta? Anhte a nni nkri hte ru tsang lam hpe hkum malap kau ya mi.

²⁵Anhte gaw ga du hkra kadawng agrawp nga ga ai; anhte sum mat ga ai majaw, ga nhpu ntsa e, galeng taw nga ga ai.

²⁶Anhte hpe karum la na sa rit! Na a dinggrin tsaw ra myit a majaw, anhte hpe hkye hkrang la mi law!