Read Jinghpaw Common Language Bible 2009 SHAKAWN KUNGDAWN 46 Bible Online

SHAKAWN KUNGDAWN 46 - Jinghpaw Common Language Bible 2009 bible

SHAKAWN KUNGDAWN 46

¹[42] Karai Kasang gaw anhte a shingbyi shara hte n-gun rai nga ai; ru tsang hkrum ai aten ni hta karum la na, tut nawng jin jin rai nga ai.

²Dai re ai majaw, ginding aga gaw ashun awam nga nna, bum ni sung ai hka nawng kaba hta di hkrat bang nhtawm;

³panglai hka ni wu kadu nga ai hte dai ni rawt hta wa ai a majaw, kawng ni ashun nga ma ti mung, anhte hkrit ra na ga ai n rai.

⁴Karai Kasang a mare ngu ai, Tsaw Htum Ai Wa a chyoi pra ai nta hpe kabu gara shangun ai hka nu langai mi nga nga ai.

⁵Karai Kasang gaw dai mare hta shanu nga nna, dai mare gaw galoi mung jahten kau ai hkrum na n rai; jahpawt manap jau jau e, dai mare hpe shi karum la na matu pru sa na ra ai.

⁶Masha amyu ni hkrit kajawng nga masai, mungdan ni ashun awam nga masai; Karai Kasang gaw mu shangoi dat wu ai hte mungkan ga gaw byawng mat nga ai.

⁷Dai Chyahtum Chyalai N-gun rawng ai MADU gaw anhte hte rau rai nga ai; Yaku a Karai Kasang gaw anhte a shingbyi shara rai nga ai.

⁸Sa marit, dai MADU hpa galaw da sai amu ni hpe yu mu. Ginding aga a ntsa e, shi galaw da sai mauhpa amu ni hpe mada yu mu.

⁹Shi gaw mungkan ga na majan ni yawng hpe shazim kau nna; ndan ni hpe shi shadaw kau let, ri ni hpe jahten kau nhtawm, hpyen ninggang ni hpe wan hta nat kau nga ai.

¹⁰Shi gaw, “Gasat gala ai lam hpe jahkring kau mu, ngai gaw masha amyu baw ni a ka-ang e mung, mungkan ting a Karai Kasang rai nga nngai hpe mung chye mu,” ngu nna tsun wu ai.

¹¹Chyahtum Chyalai n-gun rawng ai dai MADU gaw anhte hte rau nga nga ai; Yaku a Karai Kasang gaw anhte a shingbyi shara rai nga ai law.