Read Jinghpaw Common Language Bible 2009 SHAKAWN KUNGDAWN 48 Bible Online

SHAKAWN KUNGDAWN 48 - Jinghpaw Common Language Bible 2009 bible

SHAKAWN KUNGDAWN 48

¹[44] Dai MADU gaw galu kaba nga ai rai nna shi a chyoi pra ai bum ntsa e nga ai anhte a Karai Kasang a mare hta shi hpe tsaw htum ai hku shakawn kungdawn ra nga ai.

²Karai Kasang a bum ngu ai Ziun gaw tsaw nga nna, tsawm htap nga ai; galu kaba ai hkawhkam wa a mare gaw mungkan amyu masha ni yawng hte hpe, kabu gara shangun nga ai.

³Dai mare a hpyen dap kata ni hta shi hte rau shim lum nga ai hpe Karai Kasang madun dan nu ai.

⁴Hkawhkam ni jawm hpawng nga nna, Ziun bum hpe htim gasat na matu, shanhte pru sa wa ma ai.

⁵Rai ti mung, shanhte gaw dai bum hpe mu ma ai shaloi mau mahka mat nhtawm; hkrit kajawng ai hte hprawng mat ma ai.

⁶Shanhte gaw dai yang e, ma shangai hkyen nna shinggyim machyi hkrum ai num hte,

⁷laja lana re ai nbung laru kata, le de, wo de, adawt kanga hkrum nga ai sanghpaw li zawn hkrit gari ai hte ruyak kyindut hkrum hkra nga ma ai.

⁸Karai Kasang hpa galaw dan sai amu hpe anhte mu lu sagaw ai; Chyahtum Chyalai n-gun rawng ai MADU anhte a Karai Kasang a mare hta, dai lam hpe anhte ya mu lu saga ai. Shi gaw dai mare hpe htani htana shim nga shangun na ra ai.

⁹O Karai Kasang e, na a Htingnu kata hta na a dinggrin tsaw ra myit a lam hpe anhte myit yu ga ai.

¹⁰Nang gaw shara shagu hkan nga nga ai amyu masha ni a shakawn kungdawn ai hkrum nga ndai; na a mying nsang aga ting hta kajai gumhkawng nga ai, nang gaw teng man ai tara hte up hkang nga ndai.

¹¹Ziun a amyu masha ni kabu gara lu mu ga! Teng man ai tara dara lam ni hpe nang jaw ya nga ai; Yuda mung na mare ni hta kabu gara ai gaw anga nga u ga law!

¹²Karai Kasang a amyu masha ni e, Ziun hpe shinggrup hkawm ai hte de a langchyi ni hpe hti yu mu;

¹³de a mare bunghku ni hpe matsing nna, de a hpyen dap ni hpe san jep yu mu, shing rai jang,

¹⁴nanhte gaw, “Dai Karai Kasang gaw htani htana prat dingsa na anhte a Karai Kasang rai nga ai; shi gaw anhte hpe prat ting lam woi wa na ra ai,” nga nna hpang ban prat masha ni hpe hkai dan lu na myit dai.