Read Jinghpaw Common Language Bible 2009 SHAKAWN KUNGDAWN 51 Bible Online

SHAKAWN KUNGDAWN 51 - Jinghpaw Common Language Bible 2009 bible

SHAKAWN KUNGDAWN 51

¹[47] Karai Kasang e, na a dinggrin tsaw ra myit a majaw, ngai hpe matsan dum la e. Na a galu kaba ai matsan dum myit a majaw, nye a yubak ni hpe arut kau ya e.

²Nye a n hkru n shawp ai lam yawng hte hpe kashin kau ya nna, nye a yubak kaw na ngai hpe jasan jaseng la e!

³Nye a shut hpyit ai mara ni hpe ngai matsing nga nngai; nye a yubak ni hpe ngai tut nawng adum nga nngai.

⁴Ngai nang hpe yubak galaw shut kau ni ai- nang hpe chyu sha shut kau ni ai. Nang myit yu ai n hkru n shawp ai lam hpe ngai galaw shut kau ni ai. Dai majaw, ngai hpe tara jeyang ai hta nang gaw teng man nga ndai; ngai hpe daw dan jeyang ai hta nang ding hpring nga ndai.

⁵Ngai shangai wa ai shani kaw nna, ngai gaw n hkru n shawp nga nngai; nu a hkritung kaw nna pyi, ngai hta yubak kap nga ni ai.

⁶Nang gaw myit malang ai hte teng man ai lam hpe hpyi nga ndai majaw; nye a kraw lawang hta na a hpaji hte jahpring ya e.

⁷Nye a yubak hpe la kau ya e, shing rai jang, ngai san pra wa lu na nngai; ngai hpe kashin la e, shing rai jang, ngai gaw hkyen hta pyi grau hpraw wa lu na nngai.

⁸Kabu gara ai hte ngwi pyaw ai nsen ni ngai hpe na shangun et; nang ngai hpe daw agrawp kau ai rai ti mung, ngai kalang mi bai naw kabu gara wa lu na nngai.

⁹Nye a yubak ni hpe n mu lu u ga, na a myi ni hpe di da u; nye a n hkru n shawp ai lam yawng hte hpe arut kau ya e.

¹⁰O Karai Kasang e, san seng ai myit ngai hta hpan shapraw ya e; sadi dung ai wenyi hte myit masin nnan ngai hpe jaw ya rit.

¹¹Na a myi man kaw nna ngai hpe hkum shaden kau et; na a chyoi pra ai wenyi ngai kaw na hkum dawm la kau ya e.

¹²Na a hkye hkrang la ai kaw na lu la ai kabu gara ai lam, ngai hpe bai jaw ya e; nang hpe madat mara mayu ai myit ngai hta bang ya e.

¹³Shaloi, yubak mara lu ai masha ni hpe na a hkang da ai tara lam ni hpe ngai sharin ya na nngai; shanhte gaw shi hpang de kayin wa na mara ai.

¹⁴Karai Kasang e, nye a asak hpe shalawt ya nna, ngai hpe hkye hkrang la e; na a ding man ai lam hpe ngai kabu gara htawn tsun nga na nngai.

¹⁵Madu e, ga shaga lu na matu, ngai hpe karum la e; shing rai, ngai nang hpe shakawn na nngai.

¹⁶Nang gaw shagu hkungga ni hpe n ra sharawng nga ndai, shing n rai yang, ngai sak jaw na de ai; nang gaw wan nat hkungga ni hpe mung n ra sharawng nga ndai.

¹⁷O Karai Kasang e, nye a shagu hkungga gaw shagrit shanem ai myit rai nga li ai; shagrit shanem ai myit hte myit malai ai myit masin hpe nang n ningdang kau na ndai.

¹⁸Karai Kasang e, Ziun hpe matsan dum nna shi hpe karum u; Yerusalem mare a bunghku ni hpe bai gaw gap da u.

¹⁹Dai shaloi, nang gaw ra n rawng ai shagu hkungga ni hte anhte a wan nat hkungga ni hta sharawng awng wa na rin dai; na a tawn hkungri ntsa e mung, usu ni hpe nawng jau wa na mara ai.