Read Jinghpaw Common Language Bible 2009 SHAKAWN KUNGDAWN 53 Bible Online

SHAKAWN KUNGDAWN 53 - Jinghpaw Common Language Bible 2009 bible

SHAKAWN KUNGDAWN 53

¹[49] “Karai Kasang n nga ai!,” nga nna angawk ai ni gaw shanhte a myit hta tsun nga ma ai. Shanhte yawng hte gaw tsam mat nga ma ai, hkrithpa amu ni hpe, shanhte galaw kau ma ai; dai teng man ai amu hpe galaw na masha kadai mung n nga nga ai.

²Shi hpe nawku daw jau na hte hpaji rawng nga ai ni kadai rai tim nga dam ai rai yang, dai hpe mada yu na matu, Karai Kasang gaw sumsing lamu kaw nna shinggyim masha ni hpe gum yu nga ai.

³Rai ti mung, shanhte yawng hte gaw shut hpyit ma masai; shanhte yawng hte wa maren n kaja nga ma ai. Dai teng man ai amu galaw ai masha shanhte hta langai mi mung n nga nga ai, kaja wa, langai mi mung n nga nga ai.

⁴Karai Kasang gaw, “Shanhte n chye na ma ai kun? Ndai n hkru n shawp ai amu galaw ai ni yawng hte wa, gri magra re ai ni rai nga ma ai kun? Shanhte gaw nye a amyu masha ni hpe hpya sha let nga nga ma ai hte, ngai kaw galoi mung akyu n hpyi yu ma ai,” nga nna san nga ai.

⁵Shaloi, shanhte gaw shawng de galoi mung garai n hkrum kadup yu ai kaba la ai hkrit kahpra lam hpe hkrum hkra wa na mara ai; hpa majaw nga yang, Karai Kasang gaw shi a amyu masha ni a gumlau hpyen ni a nrut nra ni hpe gat kau ya na ra ai. Karai Kasang shanhte hpe ningdang kau mu ai majaw, Israela amyu masha ni shanhte hpe awng dawm dang kau na mara ai.

⁶Israela amyu masha ni a awng padang gaw Ziun kaw nna du sa na matu, ngai kade sha akyu hpyi nga a hka! Karai Kasang gaw Israela amyu masha ni hpe kalang mi bai ngamu ngamai shangun ai shaloi shanhte kade sha kabu gara lu na ma hka!