Read Jinghpaw Common Language Bible 2009 SHAKAWN KUNGDAWN 55 Bible Online

SHAKAWN KUNGDAWN 55 - Jinghpaw Common Language Bible 2009 bible

SHAKAWN KUNGDAWN 55

¹[51] O Karai Kasang e, nye a akyu hpyi ga hpe na ya e; ngai hpyi lajin ai hpe myi man hkum kayin kau ya e!

²Ngai hpe madat ya nna htan ya e; nye a myit ru myit tsang ai lam ni hta ngai hki ba la nga nngai.

³Nye a gumlau hpyen ni a jahkrit shama ai a jaw e, ngai hkrit gari nga nngai; tara n lang ai ni a dip gamyet sha ai hta ngai agrawp ayai ai hkrum nga nngai. Shanhte gaw ngai hpe sharu shatsang nga ma ai; shanhte ngai hpe masin pawt let n ju n dawng nga ma ai.

⁴Si Du a jahkrit shama ai gaw ngai hpe dip gamyet ai rai nna, ngai hkrit gari nga nngai.

⁵Ngai gaw nau hkrit gari mat ai majaw ging mat ni ai; ngai gaw kajawng kaja re ai hte htinggrum da ai hkrum nga nngai.

⁶Hkrudu zawn singkaw tu na hpe ngai kade sha marit nga nngai. Hkrudu zawn singkaw tu taw gaw tsan tsan de pyen hkawm mat wa nna ban sa lu na nngai.

⁷Tsan tsan de ngai pyen hkawm mat wa nna, nam mali hpe nye a nta shatai na we ai.

⁸Ngai gaw nbung bungga hte laru kaba kaw nna lawt na, nye a matu shingbyi shara langai mi hpe tam na we ai.

⁹O MADU e, nye a gumlau hpyen ni a tsun shaga ai ga ni hpe shanut kau ya u! Mare kata hta kashun kashe, du daw sai hkaw re ai hte aruk arak nga ai hpe ngai mu nngai;

¹⁰dai mare hpe shani shana kawan hkawm nna, dai mare hta ru hka amu hte myit ru myit tsang ai hte hpring nga ai.

¹¹Hten za ai amu gaw shara shagu hte hta nga nga nna lam nmaw ni hta mung; dip lu dip sha ai hte masu magaw ai ni hte hpring nga ai.

¹²Gumlau hpyen wa ngai hpe mani asawng ai rai yang, ga dai hpe hkam lu na nngai; nye a hpyen wa nye a ntsa e, gumrawng gumtawng nga ai rai yang, shi kaw na ngai makoi mat lu nngai.

¹³Rai ti mung, dai zawn galaw ai gaw nye a manaw manang wa, nye a kanawn manang wa hte hkau chyap ai manang nan rai nga ai.

¹⁴An shada da grai hku hkau ai hte shaga chyai lu saga ai sha n ga; Nawku Htingnu kata hta rau sha nawku daw jau yu saga ai.

¹⁵Nye a gumlau hpyen ni gaw shanhte a aten garai n du yang si htum mat mu ga; shanhte gaw katsan ga de jahkrung sa mat wa mu ga! Dai n hkru n shawp ai gaw shanhte a dum nta ni hte shanhte a myit kraw lawang ni hta rawng nga ai.

¹⁶Rai ti mung, karum la na matu ngai gaw MADU Karai Kasang hpe hpyi shaga ai; shi ngai hpe hkye hkrang la na ra ai.

¹⁷Jahpawt manap, shani ka-ang hte shana na aten ni hta, nye a hpyi aput ai hte madai ai nsen gaw shi kaw hkrang lung wa ai; shi gaw nye a nsen hpe na ya na ra ai.

¹⁸Gumlau hpyen law law ni hpe ngai hkap gasat ai majan ginra kaw na; shi ngai hpe shim ai hku bai woi wa na ra ai.

¹⁹Moi chyaloi nhkoi prat kaw nna up hkang nga ai Karai Kasang gaw nye a akyu hpyi ga hpe na ya nna, shanhte hpe dang kau na ra ai. Shanhte gaw myit n malai hkraw nga ma ai, shi hpe hkrit kamyin ai myit mung n rawng nga ma ai.

²⁰Nye a shawng na manang wa gaw shi a jinghku ni hpe gasat nna; shi a ga sadi ni hpe mung, jahten kau nu ai.

²¹Shi a n-gup aga ni gaw htawbat hta grau manen nga ai; shi a myit masin kata hta n dawng ai myit rawng nga ai; shi tsun ai ga hkum ni gaw namman hta grau kya nga ti mung, dai ai nhtu zawn, gadoi di lu nga ai.

²²Na a ru yak tsin-yam ni hpe MADU hta tawn da u, shi nang hpe makawp maga la na ra ai; ding hpring ai masha ni hpe shi galoi mung sum shangun nga ai n rai.

²³Rai ti mung, Karai Kasang e, nang gaw masha sat ai ni hte masu magaw ai masha ni hpe shanhte a asak ka-ang garai n lai yang pyi shanhte a lup sung hku ni de, jahkrat kau na rai nga ndai. Ngai chyawm gaw nang hpe kam hpa nga na nngai.