Read Jinghpaw Common Language Bible 2009 SHAKAWN KUNGDAWN 56 Bible Online

SHAKAWN KUNGDAWN 56 - Jinghpaw Common Language Bible 2009 bible

SHAKAWN KUNGDAWN 56

¹[52] Karai Kasang e, ngai gaw gasat gala ai hkrum nga nngai, nye a gumlau hpyen ni ngai hpe aten shagu zingri zingrat nga ma ai majaw, ngai hpe matsan dum la e law.

²Nye a hpyen ni ngai hpe shani tup gasat nga ma ai; ngai hpe gasat ninghkap ai ni grai law la nga ma ai.

³Chyahtum Chyalai n-gun rawng ai MADU e, ngai hkrit kahpra nga ai shaloi nang hpe ngai kam hpa nga nngai.

⁴Ngai gaw Karai Kasang hta kam hpa nga ai a jaw e, n hkrit nga nngai; shi jaw da sai ga sadi a majaw ngai shi hpe shakawn na nngai. Shinggyim masha sha gaw ngai hpe hpa di lu na rai nga a ta?

⁵Nye a gumlau hpyen ni ngai hpe shani tup sharu shatsang nga ma ai; ngai hpe lam maga ga hku nna, machyi shangun na matu, shanhte tut nawng e myit shapraw nga ma ai!

⁶Shanhte gaw shim ai makoi shara hta hpawng nga nna, ngai galaw ai lam mahkra hpe shanhte lagyim yu ai hte, ngai hpe sat kau lu na matu myit mada nga ma ai.

⁷O Karai Kasang e, shanhte a n hkru n shawp ai lam a majaw, shanhte hpe ari jaw u; na a pawt sindawng ai hte dai masha ni hpe dang kau u!

⁸Ngai ru tsang kade hkrum sha ni ai gaw nang chye nga ndai; nye a myi prwi jahpan hpe nang tawn da ya nna, na a laika buk hta jahpan dai ni rawng nga ai n rai ni?

⁹Ngai nang hpe shaga ai shani e, nye a gumlau hpyen ni htingnut mat wa ai hkrum na mara ai; Karai Kasang gaw nye a maga de nga nga ai hpe ngai chye nga nngai.

¹⁰MADU a ga sadi ni a jaw e, ngai shakawn na nngai.

¹¹Shi hpe ngai kam nngai majaw, ngai hkrit tsang nga na n rai. Shinggyim masha sha gaw ngai hpe hpa di lu na rai nga a ta?

¹²O Karai Kasang e, nang gaw ngai hpe Si Du a lata kaw nna hkrang shaw la nhtawm; sum mat ai kaw nna mung, ngai hpe makawp maga la nit dai majaw,

¹³ngai ga sadi tawn da ni ai hte maren, ngai nang hpe nawng jau na de ai, nye a chyeju dum ai shagu hkungga hpe mung, ngai nang hpe jaw jau na we ai. Shing rai, asak hkrung nga ai ni a ntsa e, htoi tu nga ai nhtoi ngu ai Karai Kasang a man e, ngai hkawm sa nga na nngai.