Read Jinghpaw Common Language Bible 2009 SHAKAWN KUNGDAWN 58 Bible Online

SHAKAWN KUNGDAWN 58 - Jinghpaw Common Language Bible 2009 bible

SHAKAWN KUNGDAWN 58

¹[54] Du salang ni e, nanhte gaw kaja wa teng man ai daw dan lam hpe jaw ya nga myit ni? Masha nlang hte hpe rap ra ai tara hku nna tara jeyang ya nga myit ni?

²N rai law! Nang galaw lu na n tara ai lam hpe chyu sha nang myit nga ndai; ga ntsa na kashun kashe du daw sai hkaw ai amu ni hpe nanhte shut hpyit tawt lai nga myit dai.

³N tara ai masha ni gaw shanhte a asak hkrun lam yawng hta shut hpyit ai hku hkawm sa nga ma ai; shanhte gaw shangai wa ai shani kaw nna masu magaw ai ga ni hpe tsun nga ma ai.

⁴Lapu ni zawn, shanhte hta mung atuk hpring hkra rawng nga ma ai; na n na ai pu htum zawn shanhte a na ni hpe pat da ma ai.

⁵Lapu lakle sara wa a nsen hpe n na ai hte kung ai mandan sara wa a mahkawn ga hpe mung, n na ai na lahpang ai pu htum zawn, shanhte a na ni hpe pat da nga ma ai.

⁶Karai Kasang e, ndai hkanghkyi matse ni a wa ni hpe shadaw kau ya u.

⁷Shanhte gaw hkyet mat wa ai hka zawn hkoi mat wa mu ga; lam ntsa e tu ai tsing ni hpe zawn shanhte kabye anut kau ai hkrum nga mu ga.

⁸Hkoi lapawp gaw shi a bawp nen byawng mat ai zawn rai mat mu ga; nhtoi hpe galoi mung n mu yu ai nbya ma zawn, shanhte rai mat mu ga.

⁹Shanhte dai lam hpe garai n tan chye lu yang, tsingdu ni hpe zawn, shanhte dan kau ai hkrum nga ma ai; shanhte gaw asak hkrung nga yang pyi, shi a pawt singdawng ai hta, Karai Kasang gaw shanhte hpe shapoi kau na ra ai.

¹⁰Ding hpring ai ni gaw mara kap ai ni ari jaw hkrum ai hpe mu ai shaloi, kabu gara na mara ai; shanhte gaw tara n lang ai ni a asai hku kabye lai mat wa na mara ai.

¹¹“Ding hpring ai ni gaw teng teng shagrau sha-a ai hkam la na mara ai; mungkan hpe tara jeyang na Karai Kasang gaw teng teng nga nga ai,” nga nna masha ni tsun wa na mara ai.