Read Jinghpaw Common Language Bible 2009 SHAKAWN KUNGDAWN 62 Bible Online

SHAKAWN KUNGDAWN 62 - Jinghpaw Common Language Bible 2009 bible

SHAKAWN KUNGDAWN 62

¹[58] Karai Kasang ngai hpe hkye hkrang la na matu, ngai amu sha hte ala nga nngai; Ngai gaw shi hpe chyu sha kam hpa manoi nga nngai.

²Shi chyu sha ngai hpe hkye hkrang la ai hte makawp maga nga ai; shi gaw nye a dahpran shara rai nga ai, ngai gaw galoi mung sum hkrum na nngai n rai.

³Nanhte yawng gaw daw agrawp mat ai nhpan daram sha n-gun rawng ai masha langai mi hpe, galoi aten du hkra, shi hpe gasat na ngu nga myit ni?

⁴Shi hpe shagrau shatsaw da ai shara kaw nna chyu sha nanhte shi hpe gang jahkrat kau mayu nga myit dai, nanhte gaw masu magaw ga tsun na hpe ra sharawng nga myit dai. Shaman ga ni hpe nanhte tsun nga myit ti mung, nanhte shi hpe nanhte a myit masin kata kaw nna dagam dala ga tsun nga myit dai.

⁵Ngai gaw Karai Kasang hta chyu sha, manoi gumgoi nga nngai; ngai shi hpe myit mada nngai.

⁶Shi chyu sha ngai hpe hkye hkrang la ai hte makawp maga nga ai; shi gaw nye a dahpran shara rai nga ai, ngai galoi mung sum hkrum na n rai.

⁷Nye a hkye hkrang la ai lam hte arawng sadang gaw Karai Kasang hta rai nga ai; shi gaw n-gun ja ai hte ngai hpe makawp maga ai wa rai nga ai, nye a shingbyi shara mung rai nga ai.

⁸Nye a amyu masha ni e, aten shagu Karai Kasang hpe kam hpa nga mu. Shi gaw anhte a shingbyi shara rai nga ai, nanhte a ru tsang lam yawng mayawng shi hpe tsun dan mu.

⁹Shinggyim masha yawng hte gaw nsa sa lai nbung kasha zawn sha rai nga ma ai; galu kaba ai wa hte kaji kadun ai wa mung, maren sha manu n dan nga ai. Shanhte hpe joi hta shen yu ai shaloi, shanhte a namnak hpa mung n rawng nga ma ai; shanhte gaw nsa sa lai nbung hta pyi grau nna tsang nga ai.

¹⁰Kabring kabrawng du daw sai hkaw re ai amu hpe nang hkum kam hpa nga et; mya lu mya sha nna lu la ai arai hpa hpe rai tim, hkum myit mada nga et, nang sut su wa ti mung, dai ni hta myit hkum manoi nga et.

¹¹MADU hta daru magam n-gun rawng nga ai hpe mung, shi a tsaw ra myit dinggrin rai nga ai hpe mung, Karai Kasang tsun ai ga dai hpe law law lang, ngai na ni ai.

¹²O MADU e, nang na masha shagu hte hpe tinang galaw ai amu hte maren, shagrau kumhpa jaw ya nga u law.