Read Jinghpaw Common Language Bible 2009 SHAKAWN KUNGDAWN 63 Bible Online

SHAKAWN KUNGDAWN 63 - Jinghpaw Common Language Bible 2009 bible

SHAKAWN KUNGDAWN 63

¹[59] O Karai Kasang e, nang gaw nye a Karai Kasang rai nga ndai, ngai nang hpe marit nga nngai. Nye a hkum ting nang hpe ra marit nga nngai; hkun hkraw mat nna, akyu n jaw mai sai hte hka n rawng mat sai lamu ga zawn, nye a myit masin mung nang hpe shagroi gara nga li ai.

²Chyoi pra ai shara hta nang hpe ngai mu lu n-ga, nang gaw kade wa n-gun chyalai rawng nga ai hte hpung shingkang rawng nga ai hpe mung ngai mu lu n-ga.

³Na a dinggrin tsaw ra myit gaw dai asak hta grau nna mai kaja nga ai majaw, ngai nang hpe shakawn nga na nngai.

⁴Ngai asak hkrung nga dingsa nang hpe chyeju dum nga na nngai; nang kaw akyu hpyi ai shaloi, nye a lata ni hpe sharawt da na nngai.

⁵Nye a wenyi gaw, dwi sau ai lusha hpe sha lu ai zawn myit dik ai hkrum na ra ai; ngai nang hpe kabu gara ai mahkawn mangoi ga ni hte mahkawn shakawn nga na nngai.

⁶Ngai yupku ntsa e kaleng nga ai shaloi nang hpe dum nga nngai; nang ngai hpe tut nawng karum la nga nit dai majaw

⁷na a lam hpe shana tup ngai myit yu nga nngai. Na a singkaw ni a shingnip kata hta kabu gara ai hte ngai mahkawn mangoi nga nngai.

⁸Ngai nang kaw hkan jum noi nga nngai; na a lata ngai hpe shim hkra makawp maga ya nga ai.

⁹Ngai hpe sat na matu shakut shaja ai ni gaw katsan ga de yu mat wa na mara ai.

¹⁰Shanhte gaw majan e sat kau ai hkrum na mara ai; shanhte a hkum shan ni mung chyahkyawn ni e sha kau ai hkrum na mara ai.

¹¹Shi hpe Karai Kasang awng padang jaw ya ai majaw, hkawhkam wa kabu gara na ra ai. Karai Kasang a mying nsang hta ga shaka tawn da ai ni gaw shi hpe shakawn lu na mara ai: rai ti mung, masu magaw ga tsun ai ni a n-gup ni chyawm gaw pat kau ai hkrum na mara ai.