Read Jinghpaw Common Language Bible 2009 SHAKAWN KUNGDAWN 68 Bible Online

SHAKAWN KUNGDAWN 68 - Jinghpaw Common Language Bible 2009 bible

SHAKAWN KUNGDAWN 68

¹[64] Karai Kasang gaw rawt nna shi a gumlau hpyen ni hpe shabra kau nga ai; shi hpe n dawng n yawt ai ni, sum ai hte hprawng mat ma ai.

²Wan hkut mawng mat wa ai zawn, shi shanhte hpe gawt kau mu ai; gitbaw gaw wan a man e byawng mat ai zawn, tara n lang ai ni Karai Kasang a man e hten byak mat nga ai.

³Rai ti mung, ding hpring ai ni kabu gara nga ma ai rai nna, shi a man hta kabu awng nga ma ai. Shanhte gaw kabu gara nga ma ai hte kabu jahtau nga ma ai.

⁴Karai Kasang hpe mahkawn mu, shi a mying nsang hpe mahkawn shakawn mu; sumwi jawn ai wa a matu lam shajin mu. Shi a mying gaw MADU rai nga ai, shi a man hta kabu gara nga mu!

⁵Shi a chyoi pra ai Nawku Htingnu hta shanu nga ai Karai Kasang gaw jahkrai nmai ni hpe lanu lahku nga nna gaida jan ni hpe makawp maga ya nga ai.

⁶Garen gari nga ai wa hpe shanu nga na nta shi jaw ya nga ai; bawng dung ai ni kabu gara ai shanglawt ahkaw ahkang lu la na matu, shi woi awn nga ai; rai ti mung, gumlau ai ni gaw akrin akraw re ai lamu ga hta shanu nga na mara ai.

⁷O Karai Kasang e, na a amyu masha ni hpe nang woi awn nna; nam mali hpe nang woi lai mat wa ai shaloi,

⁸mungkan ga gaw gari ashun wa ai hte lamu na marang htu wa nga ai; hpa majaw nga yang, Sina bum a Karai Kasang rai nga ai Israela a Karai Kasang du sa wa ai majaw rai nga ai.

⁹Nang gaw marang hpe ntaw ntsang jahtu dat ya nna, na a hkun hkraw mat sai lamu ga hpe bai shabran dat ndai.

¹⁰Na amyu masha ni gaw dai shara hta shanhte a dum nta ni hpe shachyaw nga ma ai; nang gaw na a mai kaja ai lam hta matsan mayan masha ni hpe shara lajang jaw ya nga ndai.

¹¹Dai MADU gaw hkang da ai ga jaw dat ai hte, num law law wa dai shiga hpe gun hkawm nga ma ai;

¹²“Hkawhkam ni hte shanhte a hpyen luksuk ni hprawng mat wa masai!,” nga nna tsun ma ai.

¹³Nta e nga ai num ni gaw gumhpraw hte gayawp nna singkaw ni hta htoi kabrim ai ja hte gala nga ai hkrudu sumla lanep ni hpe garan la nga ma ai. (Nanhte hta na nkau mi gaw hpa majaw majan gasat nga ai shani hta, sagu lawng ni hkan nga nga myit ni?)

¹⁴Chyahtum Chyalai N-gun Rawng Ai Karai Kasang gaw hkawhkam ni hpe Zalmon bum de shabra kau ai shaloi, shi gaw dai shara hta hkyen hkrat shangun nga ai.

¹⁵Bashan bum gaw grai kaba nga nna, bum pungding law law marawng nga ai bum rai nga a hka!

¹⁶Pungding law law marawng nga ai bum kaba kaw nna Karai Kasang shanu nga na matu lata san da ai bum hpe asawng ai nsam hte hpa majaw nang yu nga a ni? Dai MADU gaw dai shara hta htani htana shanu nga na ra ai!

¹⁷Dai MADU gaw hkying mun law la nna, n-gun rawng ai shi a hpyen leng ni hte Sina kaw nna chyoi pra ai shara de sa wa nga ai.

¹⁸Bawng masha law law hte rau dai tsaw ai bum ntsa de shi lung wa nga ai; shi gaw gumlang ai masha ni kaw na kumhpaw kumhpa law law hpe hkap la da nga ai. Dai MADU Karai Kasang gaw dai shara hta shanu nga na ra ai.

¹⁹Anhte a lit ni hpe lani hte lani gun ya nga ai MADU hpe shakawn mu; shi gaw anhte hpe hkye hkrang la ai Karai Kasang rai nga ai.

²⁰Anhte a Karai Kasang gaw hkye hkrang la ai Karai Kasang rai nga ai; shi gaw MADU rai nga nna, si hkrung si htan a lata kaw nna mawai la ai anhte a MADU rai nga ai.

²¹Yubak lam ni hta shanang nga ai shi a gumlau hpyen ni a baw ni hpe Karai Kasang teng teng abrep kau na ra ai.

²²Dai MADU gaw, “Na a gumlau hpyen ni hpe Bashan kaw nna bai shaga shapraw la na nngai; nammukdara a sung htum ai shara kaw na mung ngai shanhte hpe shaga shapraw la na nngai,

²³shing rai, shanhte a sai hta nang kabye lai wa u ga, na a gwi ni ra ai daram mata lu mu ga,” nga nna tsun ai.

²⁴Karai Kasang e, nye a hkawhkam Karai Kasang gaw shi a chyoi pra ai shara de, awng padang ninglaw hte yan ganawng sa wa ai hpe yawng hte wa mu nga ma ai.

²⁵Mahkawn hkawn ai ni shawng sa wa nna, tingse sumpyi dum ai ni hpang e hkan nang nhtawm, ka-ang e, shup sheng dum ai mahkawn ma ni hkan nang nga ma ai.

²⁶“Shi a amyu masha ni a hpawng hta Karai Kasang hpe shakawn mu; Yaku a aru arat ni yawng hte e, dai MADU hpe shakawn mu!”

²⁷Hpungdim rai nga ai Benyamin amyu bawsang ni shawng sa nna; dai hpang, Yuda ningbaw ningla ni hte shanhte a u hpung ni, Zebulun hte Naphtali yan a ningbaw ningla ni matut nna hkan nang na rai ma ai.

²⁸Karai Kasang e, anhte a matu nang akyu jashawn nit dai, dai daru magam n-gun hte hkawhkam ni nang hpe kumhpaw kumhpa la sa ya ai, dai Yerusalem mare hta nga ai na a Htingnu kaw nna daru magam n-gun hpe madun dan u.

³⁰Mai-aw pa na matse labye dusat ngu ai Egutu mung hpe daru kau u; usu hpung ni hte shanhte a dumsu kasha ni ngu ai amyu baw ni gaw, nang hpe yawng jawm dingnyawm nna shanhte a gumhpraw sak jaw wa ai aten du hkra daru kau u. Majan shabyin na hpe ra sharawng nga ai ni hpe shabra kau u!

³¹Egutu mungdan na sumtsan salang ni nang kaw du sa wa na mara ai; Ehtiopi masha ni mung Karai Kasang hpe akyu hpyi ai hta shanhte a lata ni hpe sharawt wa na mara ai.

³²Mungkan ga na mungdan ni e, Karai Kasang hpe shakawn mu; moi chyaloi nhkoi kaw nna nga nga sai lamu hta jawn nga ai MADU hpe mahkawn shakawn mu. Nsen kaba hte jahtau dat ai shi a nsen hpe madat mu.

³⁴Karai Kasang a daru magam amu hpe htawn tsun mu; shi a hpung shingkang gaw Israela amyu masha ni a ntsa e, nga nga ai, shi a chyahtum chyalai n-gun a hpung shingkang mung, lamu ni hta dan hkung nga ai.

³⁵Shi a chyoi pra ai Htingnu kaw nna sa wa ai Israela a Karai Kasang gaw kade wa hpung shingkang hte hpring nga a hka! Shi gaw shi a amyu masha ni hpe n-gun atsam jaw ya nga ai. Karai Kasang hpe shakawn mu law!