Read Jinghpaw Common Language Bible 2009 SHAKAWN KUNGDAWN 69 Bible Online

SHAKAWN KUNGDAWN 69 - Jinghpaw Common Language Bible 2009 bible

SHAKAWN KUNGDAWN 69

¹[65] O Karai Kasang e, ngai hpe hkye hkrang la e! Hka gaw nye a du du hkra lim lung wa nga ai.

²Ngai gaw sung ai hkumpup hta lup wa nga nngai, dai shara hta kabye na ga shaja n nga nga ai. Sung ai hka de ngai rai wa nga nngai; hka leng ni ngai hpe marit shangun hkyen wa nga ai.

³Ngai gaw karum la na matu marawn jahtau nngai majaw hki ba nga nngai, nye a yu hkraw mung machyi nga li ai. Nang karum la na hpe mada yu nga nngai majaw nye a myi ni mam mat li ai.

⁴Mara kata e, ngai hpe n ju n dawng nga ai ni gaw nye a baw na kara singgawng ni hta grau law nga ma ai; Nye a gumlau hpyen ni ngai hpe masu magaw shatan nhkan ga tsun nna, gumlang nga ma ai; Shanhte gaw n-gun ja nga ma ai rai nna, ngai hpe sat kau mayu nga ma ai. Ngai n lagu la ai arung arai ni hpe bai nhtang jaw shangun ma ai.

⁵O Karai Kasang e, nye a yubak ni hpe nang kaw na makoi magap da lu nga ai n rai; ngai kade sha angawk lai wa sai hpe mung nang chye nga ndai.

⁶Chyahtum Chyalai n-gun rawng ai hte Grau Htum ai MADU e, nang hta kam hpa nga ai ni hpe, nye a majaw kaya kahpa n hkrum sha mu ga! Israela a Karai Kasang e, nang hpe nawku daw jau ai ni hpe nye a majaw myi man hkum jasum kau ya nga et!

⁷Na a jaw e, ngai n kaw n law re ai hkrum sha nga nngai; ngai gaw kaya kahpa hte ka-up da ai hkrum nga ni ai.

⁸Nye a hpu nau ni hta tsasam wa zawn, nye a dinghku masha ni hta maigan masha langai mi zawn ngai rai nga nngai.

⁹Na a Htingnu hta nye a myit manoi ai nja nhpra myit gaw wan zawn, nye a myit masin hta grung nga li ai. Nang hpe shatan nhkan tsun ai ga ni gaw nye a ntsa e mara nga ai.

¹⁰Lusha gam let nye hkum ngai shagrit shanem kau ai shaloi, masha ni ngai hpe n kaw n law di nga ma ai.

¹¹Sharung shayawt ai hpun palawng ngai bu hpun ti mung, shanhte ngai hpe mani asawng nga ma ai.

¹²Mare lam ni hta, shanhte nye a lam hpe hkan shatan nga ma ai; chyaru nang ai ni mung, laka ga ni hte nye a lam hpe asawng nga ma ai.

¹³Rai ti mung, nye a matu chyawm gaw, MADU e, ngai nang hta akyu hpyi nga na nngai; Karai Kasang e, nang ra sharawng ai aten hta ngai hpe htan ya e. Na a kaba la ai tsaw ra myit hte hkye hkrang la na nga nna nang tawn da ai ga sadi hte maren ngai hpe htan ya e law.

¹⁴Hkumpup hta lup mat wa nga ai kaw na mung; nye a gumlau hpyen ni a lata kaw nna mung, sung ai hka kaw nna mung, ngai hpe hkye hkrang la e, ngai hpe hkrang shaw la e,

¹⁵Mawru hka hte ngai hpe hkum ka-up kau shangun et; sung ai hka hte ngai hpe hkum marit shangun et, lup sung hku de mung ngai hpe hkum lup wa shangun et.

¹⁶MADU e, na a dinggrin tsaw ra myit a mai kaja ai lam hta, ngai hpe htan ya e, na a kaba la ai matsan dum myit hte ngai hpe mada mara la rit.

¹⁷Ngai gaw ru tsang kaba hkrum nga nngai majaw, nang hkum nan na a mayam wa kaw nna hkum makoi nga et; ya jang, ngai hpe htan ya e!

¹⁸Ngai hpe hkye hkrang la na matu, sit sa wa rit; nye a gumlau hpyen ni a lata kaw na, ngai hpe mawai la e.

¹⁹Ngai gaw kade wa n kaw n law di ai hkrum nna kade wa myi man kaya hkrum ai hte, kade wa arawng jahpoi hkrum nga nngai gaw nang chye nga ndai; nye a gumlau hpyen ni yawng hpe nang mu mada nga ndai.

²⁰N kaw n law re ai lam ni gaw nye a myit masin hpe gawng sharun ya nga ai majaw, ngai myit htum nga nngai. Matsan dum la na masha hpe ngai myit mada yu ni ai, rai ti mung, langai mi mung n nga nga ai; myit shalan shabran ya na matu mung, kadai hpe mung ngai n mu lu nngai.

²¹Ngai kawsi ai hkrum yang, shanhte ngai hpe gung jaw mi ai; ngai hpang gara ai hkrum yang, shanhte ngai hpe ntsin jahkri jaw lu mi ai.

²²Shanhte a lusha poi ni gaw shanhte hpe jahten sharun shangun mu ga; shanhte a chyoi pra ai lusha poi gaw shanhte hpe hkrat sum shangun mu ga.

²³Shanhte a myi ni n mu lu mat hkra, shanhte a myi sin mak malu ga; shanhte a shingma marung ni hpe tut nawng e, kya kau shangun u.

²⁴Shanhte a ntsa e, na a masin kahtet ai hpe ru bun u; na a sindawng kahtet ai gaw shanhte hpe dep nga u ga.

²⁵Shanhte a dap dabang ni katsi katsang jahkam tawn da ai hkrum nga mu ga: shanhte a sum ni hta kadai mung hkrung nga ai hte n nga lu mu ga.

²⁶Shanhte gaw nang e ari jaw tawn da hkrum ai ni hpe zingri zingrat di nga ma ai; nang nma shakap da hkrum ai ni a nni nkri lam ni hpe shanhte shatan nga ma ai.

²⁷Shanhte a yubak yawng hte hpe jahpan galaw nna mazing da u; na a hkye hkrang la ai lam hta shanhte hpe daw chyen mi sha pyi, hkum hkam la shangun et.

²⁸Asak laika buk kaw na shanhte a amying ni hpe arut kau ya u ga; na a amyu masha ni a jahpan hta shanhte n lawm lu mu ga.

²⁹Rai ti mung, ngai gaw machyi nga ai hte myit htum nga nngai; Karai Kasang e, ngai hpe pawn sharawt la nna, hkye hkrang la e!

³⁰Karai Kasang hpe mahkawn mangoi ga hte ngai shakawn nga na nngai; chyeju dum ai myit hte shi a galu kaba ai lam hpe ngai htawn tsun nga na nngai.

³¹Dai gaw dumsu hkungga nawng jau ai hta grau nna MADU hpe kabu shangun nga ai; hpum sau ai usu hkungga nawng ya ai hta grau nna sharawng awng wa na ra ai.

³²Dip gamyet sha hkrum nga ai ni, dai lam hpe mu ma ai shaloi, shanhte kabu gara wa lu na mara ai; Karai Kasang hpe nawku daw jau ai ni mung myit n-gun lu la na mara ai.

³³Dai MADU gaw ra kadawn nga ai ni a akyu hpyi ga ni hpe madat ya nga nna; bawng dung nga ai shi a amyu masha ni hpe n malap kau nga ai.

³⁴Sumsing lamu hte ginding aga, panglai ni hte dai hta rawng ai hkrung mahkrung yawng hte e, Karai Kasang hpe shakawn mu.

³⁵Shi gaw Yerusalem mare hpe hkye hkrang la na ra ai hte Yuda mung na mare ni hpe mung bai gaw gap da na ra ai. Shi a amyu masha ni dai shara hta shanu nga lu nna, lamu ga hpe madu lu na mara ai;

³⁶shi a shangun ma ni a aru arat ni gaw dai hpe hkring htawng hkam la lu na mara ai hte, shi hpe tsaw ra nga ai ni dai shara hta shanu nga lu na mara ai.