Read Jinghpaw Common Language Bible 2009 SHAKAWN KUNGDAWN 71 Bible Online

SHAKAWN KUNGDAWN 71 - Jinghpaw Common Language Bible 2009 bible

SHAKAWN KUNGDAWN 71

¹MADU e, makawp maga la na matu, ngai nang kaw du sa ring ngai; ngai hpe galoi mung hkum sum shangun et!

²Nang gaw ding hpring nga ndai majaw, ngai hpe karum la ai hte mawai la e. Ngai hpyi nem ai ga hpe madat ya ai hte ngai hpe hkye hkrang la e!

³Nye a shim ai shingbyi shara hte n-gun ja ai hpyen dap tai nga nna, ngai hpe makawp maga la e; nang gaw nye a shingbyi shara hte dahpran shara rai nga ndai.

⁴Nye a Karai Kasang e, tara n lang ai masha ni, n hkru ai masha ni hte mazut ai masha ni a n-gun atsam kaw na ngai hpe mawai la e.

⁵Grau Htum ai MADU e, nang hpe ngai myit mada nga nngai; ngai naw kaji nga ai aten kaw nna, nang hta ngai kam hpa nga ni ai.

⁶Ngai gaw nye a asak prat tup nang hta shamyet shanat nga ni ai; Ngai shangai wa ai shani kaw nna, nang ngai hpe makawp maga la nit dai. Shing rai, ngai nang hpe tut nawng shakawn nga na nngai.

⁷Nang gaw nye a n-gun ja ai shingbyi shara rai nga nit dai majaw; nye a asak prat gaw masha law law a man e, kasi tai nga li ai.

⁸Ngai nang hpe shani tup shakawn nga na nngai, shing rai, na a hpung shingkang hpe htawn tsun nga na nngai.

⁹Ya, ngai dingla wa nga nngai majaw, ngai hpe hkum kabai kau nga et; ya, ngai n-gun yawm nga nngai majaw, ngai hpe hkum kau da nga et.

¹⁰Nye a gumlau hpyen ni ngai hpe sat kau mayu nga ma ai; shanhte ngai hpe gumlang maw mawn na matu tsun jahta nga ma ai.

¹¹“Karai Kasang shi hpe kau da nu ai; anhte shi a hpang hkan nna shi hpe rim la ga, shi hpe mawai la na masha kadai mung n nga ai,” nga nna shanhte tsun ma ai.

¹²Karai Kasang e, tsan tsan de hkum nga nga et; nye a Karai Kasang e, ngai hpe karum la na matu alawan du rit law.

¹³Ngai hpe gasat ai ni sum mat nna, jahten kau ai hkrum nga mu ga; Ngai hpe machyi shangun na matu, shakut nga ai ni kaya kahpa hkrum ai hte myi man sum mat mu ga.

¹⁴Nang hta ngai galoi mung myit mada nga nngai; shing rai, nang hpe grau grau nna ngai shakawn na nngai.

¹⁵Na a mai kaja ai lam hpe ngai htawn tsun na nngai; ngai chye na ai hta grau nna lachyum sung nga ai rai tim, na a hkye hkrang la ai lam hpe shani tup ngai tsun dan na nngai.

¹⁶Ngai gaw MADU Karai Kasang a n-gun hte pru sa wa na nngai; na a mai kaja ai lam hpe chyu sha, ngai htawn tsun na nngai.

¹⁷Ngai brang ram prat naw rai nga ai aten kaw nna nang ngai hpe sharin ya nit dai; na a mauhpa magam amu ni hpe ya du hkra, ngai tsun dan nga nngai.

¹⁸Ya chyawm gaw, ngai dingla wa nga nngai hte nye a kara hpraw wa nga li ai. Karai Kasang e, ngai hpe hkum kau da nga et! Du sa wa na masha ban prat yawng hte hta na a daru magam n-gun hte chyahtum chyalai rawng ai n-gun hpe ngai htawn tsun yang, ngai hte rau rai nga u.

¹⁹Karai Kasang e, na a ding man ai lam gaw lamu ni de dep nga ai. Galu kaba ai magam bungli ni hpe nang galaw nit dai, nang zawn re ai wa langai mi mung n nga nga ai.

²⁰Nang gaw ru tsang lam ni hte nni nkri lam ni hpe nye a ntsa e, hkrum sha shangun ai rai tim, nang gaw nye a n-gun hpe bai jahpring ya na rai nga ndai; lup sung hku de n du hkra mung, nang ngai hpe kyem mazing la na rin dai.

²¹Nang ngai hpe shawng na hta, grau nna galu kaba shangun na rin dai; nang gaw ngai hpe bai shalan shabran la na rin dai.

²²Ngai nang hpe teng teng, tingse hte dum shakawn na nngai; nye a Karai Kasang e, na a sadi sahka lam hpe ngai shakawn nga na nngai. Israela a Chyoi Pra ai Wa e, tingse hte ngai nang hpe dum mahkawn nga na nngai.

²³Na matu tingse dum ai shaloi, kabu gara ai hte ngai jahtau na nngai; nang ngai hpe hkye hkrang la nit dai majaw, nye a myit masin, hkum hkrang mahkra hte, ngai mahkawn na ring ngai.

²⁴Ngai hpe machyi shangun na matu shakut ai ni gaw sum mat ai hkrum nna kaya kahpa hkrum nga ma ai majaw, na a ding man ai lam hpe ngai shani tup tsun dan na nngai.