Read Jinghpaw Common Language Bible 2009 SHAKAWN KUNGDAWN 74 Bible Online

SHAKAWN KUNGDAWN 74 - Jinghpaw Common Language Bible 2009 bible

SHAKAWN KUNGDAWN 74

¹[69] O Karai Kasang e, nang anhte hpe hpa rai ndai zawn kau da nga n ta? Na a amyu masha ni hpe htani htana masin pawt nga na ngu nga n ta?

²Moi moi kaw nna, na a matu nang nan lata la ai amyu masha ni hte; na a amyu masha ni tai nga na matu mayam kaw nna hkrang shaw la hkrum sai na a amyu masha ni hpe dum nga u. Nang lang mi nga lai wa sai Ziun bum hpe dum nga u.

³Anhte a gumlau hpyen ni atsai awai hpya jahten kau sai Nawku Htingnu kata na arung arai ni mahkra hpe sa du gawan yu u.

⁴Na a gumlau hpyen ni gaw awng padang ninglaw hpe Htingnu kata hta jahtau garu nga ma ai; shanhte a dawnghkawn ni hpe mung awng padang kumla hku nna dai shara ni hta jung da nga ma ai.

⁵Shanhte gaw nwa ni hte hpun kran daw ai hpun kran masha ni zawn rai ma ai.

⁶Shanhte gaw maka ka da ai hpunpyen yawng hpe sumdu kaba hte nwa ni hte abyen agrawp kau manu ai.

⁷Shanhte gaw na a Nawku Htingnu hpe agrawp daw kau nna wan hte nat kau nga masai; shing rai, nang hpe nawku daw jau ai shara hpe shanhte awu asin di kau manu ai.

⁸Shanhte gaw anhte yawng hte hpe atsai awai agrawp kau mayu nga masai; dai lamu ga hta nga ai chyoi pra ai shara shagu hte hpe shanhte wan nat kau da manu ai.

⁹Anhte a makam masham hte seng ai chyoi pra ai kumla ni hpe n mu lu saga ai; dai shara hta myihtoi langai mi mung n nga nga sai hte kade daram na hkra, ndai zawn byin wa na lam, kadai mung n chye nga ai.

¹⁰O Karai Kasang e, na a gumlau hpyen ni gaw kade na hkra, nang hpe mani asawng nga na ma ai kun? Na a mying nsang hpe shanhte htani htana n kaw n law di nga na ma ai kun?

¹¹Nang anhte hpe karum la na matu hpa majaw ningdang kau nga n ni? Na a lata ni hpe hpa majaw shingdu de hkintum da nga n ta?

¹²Rai ti mung, Karai Kasang e, nang gaw shawng npawt kaw nna anhte a hkawhkam wa rai nga nit dai; nang anhte hpe law law lang mung, hkye hkrang la nit dai.

¹³Na a daru magam n-gun hte panglai hka hpe garan kau nhtawm; panglai numraw ni a baw ni hpe abrep kau ya nit dai.

¹⁴Nang gaw baren numraw Lewihtan [70] a baw ni hpe abrep kau nna; shanhte a hkum shan ni hpe nam mali hkan nga ai dusat ni hpe jaw sha kau nit dai.

¹⁵Hka deng ni hte hka hpawk ni hpe nang shalwi dat nna, hka nu kaba ni hpe nang jahkraw kau nga ndai.

¹⁶Nang gaw shani hte shana hpe hpan da nna, jan hte shata yan hpe dai yan a nga shara ni hta nang masat tawn da nga ndai.

¹⁷Mungkan ga a jarit ni hpe nang shadawn ya nga ndai; ginhtawng hte nshung ta ni hpe nang hpan da nga nit dai.

¹⁸Rai ti mung, MADU e, na a gumlau hpyen ni nang hpe asawng asang di nga ai hpe, dum nga u.

¹⁹Karum la na jinghku n lu ai na a amyu masha ni hpe mazut ai gumlau hpyen ni a lata de hkum kau da nga et; zingri zingrat hkrum sha nga ai na a amyu masha ni hpe hkum malap kau nga et!

²⁰Anhte hte nang tawn da sai ga shaka hpe dum nga u; dai mung na sin mang nga ai njut nnaw shara shagu hkan kashun kashe du daw sai hkaw re ai amu nga nga ai.

²¹Dip gamyet sha hkrum nga ai ni hpe kaya kahpa hkum jahkrum et; matsan mayan ni hte ra kadawn nga ai ni gaw nang hpe shakawn nga mu ga law.

²²Karai Kasang e, rawt u, nang galaw ai amu hpe makawp maga u! karai kata ai masha ni gaw shani tup nang hpe mani asawng nga ma ai hpe dum nga u.

²³Na a gumlau hpyen ni a sin pawt lahtet marawn jahtau ai hte; na a hpyen ni matut manoi garu ai nsen ni hpe hkum malap kau nga et.