Read Jinghpaw Common Language Bible 2009 SHAKAWN KUNGDAWN 75 Bible Online

SHAKAWN KUNGDAWN 75 - Jinghpaw Common Language Bible 2009 bible

SHAKAWN KUNGDAWN 75

¹[71] O Karai Kasang e, anhte nang hpe chyeju dum shakawn ga ai; anhte nang hpe chyeju dum shakawn ga ai! Anhte gaw nang kade wa hkik hkam ai lam hpe htawn tsun ga ai, nang galaw dan sai mauhpa amu ni hpe anhte tsun ga ai.

²Karai Kasang gaw, “Tara jeyang na aten ladaw hpe ngai tawn da se ai,” “Shing rai, rap ra ai tara hte ngai jeyang na nngai.

³Mungkan ga hte dai hta nga ai hkrung mahkrung mahkra hte gari ashun awam wa ti mung; de a npawt nhpang ni hpe ngai shangang shakang da na nngai.

⁴Dai tara n lang ai ni gaw myit tsaw myit dap n rai nga mu ga, ngai tsun nga nngai.

⁵Shanhte a shakawng shakat ai lam hpe jahkring kau na matu mung ngai shanhte hpe hkang da ni ai,” nga nna tsun ai.

⁶Tara dara ai lam gaw sinpraw maga kaw nna, shing n rai, sinna maga de na; dingdung maga kaw nna shing n rai, dingda maga de nna du sa wa na ra ai n rai;

⁷Tara agyi gaw dai Karai Kasang nan rai nga ai, shi gaw nkau mi hpe jeyang daw dan nna nkau mi hpe mara shalawt dat ya na ra ai.

⁸Dai MADU gaw shi a masin kahtet ai ngu ai nsa ja ai sabyi ntsin hte hpring nga ai gawm hpe shi a lata hta lang da nga ai. Dai ntsin hpe shi ru dat ai hte tara n lang ai ni yawng hte gaw dai hpe lu nga ma ai; shanhte gaw kahte mi pyi n ngam mat hkra lu kau nga ma ai.

⁹Rai ti mung, Yaku a Karai Kasang a lam hpe tsun nga ai hte shi hpe mahkawn shakawn na; ngai galoi mung jahkring kau na we ai n rai.

¹⁰Tara n lang ai ni a n-gun atsam hpe shi shadaw kau ya na ra ai; rai ti mung, ding hpring ai ni a daru magam n-gun hpe chyawm gaw shi rawt jat kaba shangun na ra ai law.