Read Jinghpaw Common Language Bible 2009 SHAKAWN KUNGDAWN 77 Bible Online

SHAKAWN KUNGDAWN 77 - Jinghpaw Common Language Bible 2009 bible

SHAKAWN KUNGDAWN 77

¹[73] Ngai gaw Karai Kasang hpe ja ja jahtau nngai; ngai ja ja jahtau ai majaw, shi na ya nga ai.

²Ngai gaw Ru tsang hkrum ai aten ni hta, MADU hpe akyu hpyi nngai; shana tup ngai gaw nye a lata ni hpe sharawt nna akyu hpyi ai, rai ti mung, shalan shabran ai lam hpe ngai n mu lu nngai.

³Ngai Karai Kasang a lam hpe myit yu ai shaloi, nsa kaba shaw nngai; ngai myit aru yu ai shaloi, myit ru myit yak ai lam hpe ngai hkam sha nga nngai.

⁴Shi ngai hpe shana tup jasu tawn ai; ngai nau wa myit tsang ai majaw, aga pyi n lu shaga nga nngai.

⁵Ngai gaw lai mat wa sai nhtoi ni hpe myit aru yu ai hte; lai mat wa sai shaning ni hpe myit dum nga nngai.

⁶Ngai shana tup sung sung myit sumru yu nna nga shalai kau nngai; ngai myit aru yu ai hte, ndai lam hpe nye hkum ngai san yu nngai;

⁷“MADU gaw anhte hpe tut nawng e, kabai kau sana nu ai kun? Shi anhte hpe galoi mung bai n ra sharawng mat na nu ai kun?

⁸Shi anhte hpe n tsaw ra sana nu ai kun? Shi a ga sadi mung hten mat sana nu ai kun?

⁹Karai Kasang gaw matsan dum na malap kau nu ai kun? Matsan dum la na malai, masin kahtet bu nga ai kun?”

¹⁰Shaloi, ngai hpe machyi shangun htum ai gaw, “Karai Kasang hta daru magam n-gun n rawng mat sai,” nga ai rai nga ai.

¹¹MADU e, na a galu kaba ai magam amu ni hpe ngai myit dum nga na nngai; nang galaw lai wa sai mauhpa amu ni hpe ngai bai myit dum nga na nngai.

¹²Nang galaw dan lai wa sai lam yawng hte hpe ngai myit yu nga na nngai; na a grau htum ai magam amu ni hpe ngai myit aru yu nga na nngai.

¹³O Karai Kasang e, nang galaw ai lam shagu hte gaw chyoi pra nga ai; nang zawn galu kaba ai karai shaje n nga nga ai.

¹⁴Nang gaw laklai ai mauhpa amu ni hpe galaw ai Karai Kasang rai nga ndai; masha amyu ni a ka-ang hta na a grau htum ai atsam hpe madun dan nga nit dai.

¹⁵Na a daru magam n-gun hte na a amyu masha ni rai nga ai Yaku hte Yosep yan a aru arat ni hpe nang hkye hkrang la nga nit dai.

¹⁶Karai Kasang e, hka hpung ni nang hpe mu ai shaloi, dai ni nang hpe hkrit nga ma ai; panglai hka a sung ai shara hkan na hka ni mung kanawng nga ma ai.

¹⁷Sumwi ni marang htu jahkrat ya nna, lamu kaw na mu ngoi agung nga ai hte mungkan shara shagu de myi hprap gala nga ai.

¹⁸Na a mu ngoi agung nga nna, myi hprap wan ni mungkan ga hpe jahtoi ya nga ai; mungkan ga mung gari ai hte ashun awam nga ai.

¹⁹Nang gaw hka leng ni a ntsa hku hkawm lai mat wa nna; sung ai panglai hka hpe lai di mat wa nga ndai, rai ti mung, na a lagaw hkang hpe kadai mung n mu lu nga ma ai.

²⁰Nang gaw Mawshe hte Arun yan hpe ningbaw shatai nhtawm, na a amyu masha ni hpe sagu rem wa zawn woi wa nit dai.