Read Jinghpaw Common Language Bible 2009 SHAKAWN KUNGDAWN 79 Bible Online

SHAKAWN KUNGDAWN 79 - Jinghpaw Common Language Bible 2009 bible

SHAKAWN KUNGDAWN 79

¹[75] O Karai Kasang e, maigan amyu ni na a lamu ga hpe shang gasat ma ai; na a chyoi pra ai Nawku Htingnu hpe shanhte awu asin di kau nga manu ai; Yerusalem mare hpe mung jahten sharun kau da manu ai.

²Shanhte gaw na a amyu masha ni a moi mang ni hpe langda ni a matu; na a nchyang mayam ni a moi mang ni hpe matse labye dusat ni sha na matu, tawn da nga ma ai.

³Shanhte gaw na a amyu masha ni a asai hpe hka zawn, jahkaw ma ai; Yerusalem mare hku lwi hkrat wa ai hka ni zawn, sai hka lwi nga nhtawm, si ai masha ni makoi mayang na masha langai mi mung n nga sai.

⁴Htingbu mungdan amyu masha ni mung anhte hpe asawng asang di mi ai; anhte hpe mani ai hte n kaw n law di da mi ai.

⁵MADU e, nang anhte hpe htani htana masin pawt nga na n ni? Na a masin kahtet ai lam gaw wan zawn matut nna hkru shangun na wu ni?

⁶Nang hpe nawku daw jau ai lam n galaw ai ni, nang hpe akyu n hpyi ai masha amyu ni a ntsa e, na a masin kahtet ai lam, ru bun dat u.

⁷Shanhte gaw na a amyu masha ni hpe sat kau ma ai, na a mungdan hpe mung, shanhte jahten sharun kau manu ai.

⁸Anhte a kaji kawa ni a yubak majaw, anhte hpe ari hkum jaw et; anhte a myit mada shara yawng shamat kau saga ai majaw, ya jang, anhte hpe matsan dum la mi law.

⁹Karai Kasang e, anhte hpe karum la mi, anhte hpe hkye hkrang la mi; na a mying nsang a gawp e, anhte hpe mawai la mi.

¹⁰“Na a Karai Kasang kanang nga nga lit ta?,” nga nna amyu baw ni anhte hpe hpa rai dai zawn san shara nga shangun na rai ta? Na a shangun ma ni a asai jahkaw kau ya ai masha amyu baw ni hpe, nang ari jaw ai lam, anhte hpe mu mada shangun mi.

¹¹Bawng dung masha ni a madai ai nsen ni hpe madat ya u; si ari daw dan hkrum nga ai ni hpe, na a kaba la ai daru magam n-gun hte shalawt dat u.

¹²Madu e, maigan mungdan ni a n kaw n law re ai hte nang hpe kabai tawn nga ma ai majaw, shanhte hpe sanit lang ari bai htang jaw u.

¹³Shaloi, anhte na a amyu masha ngu ai na a sagu hpung na sagu ni, nang hpe htani htana chyeju dum nga na ga ai hte, du wa na aten ahkying yawng hta mung, chyeju shakawn nga na ga ai law.