Read Jinghpaw Common Language Bible 2009 SHAKAWN KUNGDAWN 80 Bible Online

SHAKAWN KUNGDAWN 80 - Jinghpaw Common Language Bible 2009 bible

SHAKAWN KUNGDAWN 80

¹[76] Israela amyu masha ni a Sagu Rem Wa e, anhte hpe madat ya mi; sagu hpung ni a ningbaw wa e, anhte hpe na ya mi. Singkaw tu ai hkrung kanu ni a ntsa na, na a tingnyang hta dung nga ai wa e,

²Ehprim, Benyamin hte Manashe amyu baw ni hpe nang hkum nan shadan dan nna; na a daru magam n-gun madun dan ai hte anhte hpe hkye hkrang la na du sa wa rit!

³Karai Kasang e, anhte hpe bai woi nhtang wa mi law! Na matsan dum lama ai myit anhte hpe madun ya mi, shaloi anhte hkye hkrang la ai hkrum na raga ai!

⁴Chyahtum Chyalai n-gun rawng ai MADU Karai Kasang e, nang gaw galoi du hkra, na a amyu masha ni a akyu hpyi ai ga ni a jaw e, pawt nga na n ni?

⁵Nang gaw anhte a yawn hkyen ai hpe lusha zawn jaw sha nna; myi prwi hpe gawm kaba hta jaw lu nga ndai.

⁶Nang gaw anhte a lamu ga hpe, grup yin mungdan ni hpe sa gasat shangun nga ndai; anhte a gumlau hpyen ni mung anhte hpe n kaw n law di mi ai.

⁷Chyahtum Chyalai n-gun rawng ai Karai Kasang e, anhte hpe bai woi nhtang wa mi law! Na matsan dum lama ai myit anhte hpe madun ya mi, shaloi anhte hkye hkrang la ai hkrum na raga ai!

⁸Nang gaw Egutu mung kaw na sabyi ru langai mi hpe la wa ndai; kaga amyu baw ni hpe nang gawt shapraw kau nhtawm, dai hpe shanhte a lamu ga hta, hkai nit dai.

⁹Sabyi hpun tu kaba wa lu na matu lamu ga hpe nang jasan shatsawm ya nga ndai; de a hpun ru ni ga de ru jung mat wa nna dai gaw lamu ga ting a ntsa e, hkram wa nga sai.

¹⁰Dai gaw kawng ni hpe, shi a shingnip hte hkung ka-up nga ai; de a lakung ni mung kaba la ai arit hpun ni hpe htawng nga sai.

¹¹De a lakung ni gaw Nawng Kaba de lagra nna, Uhprat hka nu du hkra, hkrawn jat wa sai.

¹²Dai hpe kum shinggrup da ai shakum ni hpe nang hpa majaw jahten kau nga n ta? Ya gaw, ndai lam hku lai sa ai ni kadai rai ti mung, dai sabyi si ni hpe lagu di la lu nga manu ai;

¹³dai hpun hpe wa ndu ni e, kabye agrawp mat wa nna, matse labye dusat ni, dai hte hkru kat nga ma ai.

¹⁴Chyahtum Chyalai n-gun rawng ai Karai Kasang e, anhte hpe mada mara la mi! Sumsing lamu kaw nna anhte hpe gum yu nna, na a amyu masha ni hpe hkye hkrang la na matu, du sa wa rit!

¹⁵Nang kaba shangun ai sabyi hpun lawn hte nang hkai da ai sabyi ru ni hpe sa makawp maga la u.

¹⁶Anhte a gumlau hpyen ni dai hpe wan nat kau nna, kran daw kau nga masai; shanhte hpe masin kahtet ai hte yu nna shanhte hpe jahten kau u!

¹⁷Nang lata la sai amyu masha ni ngu ai, n-gun grai ja wa hkra nang sharawt tawn ai amyu hpe mada mara ai hte makawp maga ya nga u.

¹⁸Anhte galoi mung, nang kaw na htak mat wa na ga ai n rai; anhte hpe jahkrung la mi, anhte nang hpe shakawn nga na ga ai.

¹⁹Chyahtum Chyalai n-gun rawng ai MADU Karai Kasang e, anhte hpe bai woi nhtang wa mi law. Na a matsan dum lama ai myit anhte hpe madun dan mi, shaloi anhte hkye hkrang la ai hkrum na raga ai.