Read Jinghpaw Common Language Bible 2009 SHAKAWN KUNGDAWN 81 Bible Online

SHAKAWN KUNGDAWN 81 - Jinghpaw Common Language Bible 2009 bible

SHAKAWN KUNGDAWN 81

¹[77] Anhte a dahpran shara Karai Kasang hpe kabu gara jahtau nga mu; Yaku a Karai Kasang hpe mahkawn shakawn nga mu!

²Madum sumpyi shawng dum ai hte hpang wa mu, shup sheng ni hpe dum mu; pyaw ngawn ai tingse sumpyi hte daw raw ni hte dum mu.

³Shata praw hte shagawng shani e, poi galaw na matu, pahtau dum mu.

⁴Dai gaw Israela hta nga nga ai tara rai nga nna, Yaku a Karai Kasang kaw na lu la ai ga ndat rai nga ai.

⁵Egutu mung hpe shi gasat ai shaloi, Israela amyu masha ni hpe jaw ya ai ga ndat rai nga ai. N chye na ai ga nsen langai mi hpe ngai na nngai, dai nsen gaw,

⁶“Nanhte a shingma na lit ni hpe ngai shayu kau ya nna, nanhte a wut tawng hpai ai ka htang ni hpe ngai jahkrat da ya ni ai.

⁷Nang ru tsang hkrum nga ai shaloi, ngai hpe shaga manit dai hte; ngai nanhte hpe hkye hkrang la ni ai. Nbung laru kata na, nye a makoi nga ai shara kaw nna ngai nanhte hpe htan ya mani ai. Meriba hka hpawk e, ngai nanhte hpe chyam yu made ai.

⁸Nye a amyu masha ni e, ngai sadi jaw ai ga hpe madat la mu; Israela amyu masha ni e, ngai hpe madat ya na, ngai kade wa ra sharawng nga a hka!

⁹Nanhte gaw kaga hpara shaje hpe galoi mung n nawku lu na rai myit dai.

¹⁰Ngai nanhte hpe Egutu mung kaw nna shapraw la ai nanhte a MADU Karai Kasang rai nga nngai. Nanhte a n-gup ni hpe mahka mu, ngai nanhte hpe lusha jaw na mawe ai.

¹¹“Rai ti mung, nye a amyu masha ni ngai hpe madat na ma ai n rai; Israela amyu masha ni ngai hpe madat mara nga ma ai n rai.

¹²Shing rai, shanhte a baw ja ai lam hku sa wa lu mu ga; shanhte ra mara hpe galaw lu mu ga, ngai shanhte hpe ahkang jaw dat nngai.

¹³Nye a amyu masha ni ngai tsun ai ga hpe na ya na, ngai kade myit ra nga a hka; nye a a ga hpe shanhte madat mara ya na, ngai kade wa marit nga a hka!

¹⁴Ngai gaw shanhte a gumlau hpyen ni hpe alawan sha dang kau ya nna; shanhte a hpyen ni yawng hpe shamyit kau na we ai.

¹⁵Ngai hpe n ju n dawng nga ai ni mahtang nye a man e, hkrit kamyin ai hte dingnyawm wa nna; shanhte hkrum sha na ari mung htani htana rai na mu ai.

¹⁶Rai ti mung, kaja htum ai hkaulan mam hte ngai shanhte hpe bau nna, nam na lagat jahku hte shanhte hpe myit dik hkra jahkru na mawe ai.”