Read Jinghpaw Common Language Bible 2009 SHAKAWN KUNGDAWN 83 Bible Online

SHAKAWN KUNGDAWN 83 - Jinghpaw Common Language Bible 2009 bible

SHAKAWN KUNGDAWN 83

¹[79] O Karai Kasang e, azim sha hkum nga nga et; chyasi chyamang hkum rai nga et, atsin sha mung hkum nga nga et!

²Yu u, na a gumlau hpyen ni gumlang nga ma ai; nang hpe n ju n dawng nga ai ni rawt malan nga ma ai.

³Shanhte gaw na a amyu masha ni hpe gumlang na matu mayun hpaji daw nga ma ai; nang e makawp maga da nga ai ni hpe mung, shanhte gumlang na maw mawn nga ma ai.

⁴Shanhte gaw, “Sa marit, shanhte a mungdan hpe anhte jahten kau ya ga: shing rai, Israela amyu ni htani htana malap kau ai hkrum nga mu ga,” nga nna tsun ma ai.

⁵Shanhte gaw shanhte a yaw shada ai lam hpe jawm myit hkrum da ma ai, nang hpe gumlang na matu, jinghku hpung langai hpe jawm hpaw ninghtan da nga ma ai:

⁶Edom amyu masha ni hte Ishmaela amyu ni, Moba amyu masha ni hte Hagara amyu ni;

⁷Gebala amyu ni, Amon hte Amalek amyu ni, Hpilisti ni hte Turu amyu masha ni lawm nga ma ai.

⁸Asuri masha ni mung, Lawt a aru arat ni rai nga ai Amon masha ni hte Moba masha ni hpang maga de, jinghku hpyen hpung hta shang lawm nga masai.

⁹Shanhte hpe Midian masha ni hte Kishon hka nu makau e, Sisera hte Yabin yan hpe di ai zawn di kau u.

¹⁰Nang shanhte hpe Endora e dang kau ai hte shanhte a moi mang ni gaw ga ntsa e, yat taw mat mu ai.

¹¹Oreb hte Zeeb hpe nang galaw kau ai zawn, shanhte a ningbaw ningla ni hpe mung di u; Zeba hte Zalmuna hpe nang galaw kau ai zawn, shanhte a du salang ni yawng hte hpe mung dang kau u,

¹²“Karai Kasang madu da ai lamu ga hpe anhte gaw, anhte a matu la kau na ga ai,” nga nna kadai wa tsun kau nga a ta?

¹³Karai Kasang e, shanhte hpe ga nhpu zawn agat kau nna; nbung e shapoi kau ai numhkaw zawn, shapoi kau u.

¹⁴Maling dinggram hpe wan hte hkru kau nga ai, bum ni hpe jahkat kau ai sharaw wan shinglet numli ni zawn:

¹⁵na a nbung laru hte shanhte hpe hkan shachyut nang nna, na a nbung bungga ni hte shanhte hpe jahkrit kau u.

¹⁶MADU e, shanhte a myi man ni hpe, kaya kahpa hte ka-up da ya u; na a daru magam n-gun, shanhte hpe hkam la shangun u.

¹⁷Shanhte gaw htani htana sum mat ai hte jahkrit shama ai hkrum sha nga mu ga; tsep kawp sari jahpoi hkrum ai hte shanhte si htum mat mu ga.

¹⁸Nang chyu sha MADU rai nga ai lam hte ga ntsa ting hta e, Tsaw Htum ai Wa rai nga ai lam hpe shanhte chye na la mu ga law.