Read Jinghpaw Common Language Bible 2009 SHAKAWN KUNGDAWN 84 Bible Online

SHAKAWN KUNGDAWN 84 - Jinghpaw Common Language Bible 2009 bible

SHAKAWN KUNGDAWN 84

¹[80] Chyahtum Chyalai n-gun rawng ai MADU e, na a Nawku Htingnu hpe ngai kade wa tsaw ra nga a hka!

²Dai shara hta ngai kade wa nga mayu nga a hka! MADU a Nawku Htingnu kata hta shanu nga lu na ngai marit nga nngai. Nye a hkum hkrang, myit masin mahkra hte hte, ahkrung nga ai Karai Kasang hpe ngai kabu gara mahkawn shakawn nga nngai.

³Nye a hkawhkam hte nye a Karai Kasang Chyahtum Chyalai n-gun rawng ai MADU e, u tsa ni pyi, na a tawn hkungri ni a makau e, shanhte a tsip galaw nga ma ai, pilan ni mung shanhte a matu nta lu nga ma ai, shing rai, shanhte a u hkalung ni hpe dai shara ni hta tawn da nga ma ai.

⁴Na a Nawku Htingnu kata hta nang hpe tut nawng mahkawn shakawn let; shanu nga ai ni gaw kade wa a nga ma hka!

⁵Nang kaw na n-gun atsam lu la nna, Ziun Bum de nawku lung wa na matu myit katu nga ai ni gaw kade wa a nga ma hka.

⁶Shanhte gaw Baka ngu ai hkun hkraw ai kadit hpe lai di mat wa yang; dai gaw hka hpawk ni lwi pru ai shara tai wa nga ai; mahpawng hpaw marang gaw dai shara hpe la-ing ni hte jahpring ya nga ai.

⁷Shanhte hkawm sa mat wa magang n-gun atsam grau nna jat la lu nga ma ai; Ziun Bum ntsa e, karai ni a Karai hpe shanhte wa mu lu na mara ai.

⁸Chyahtum Chyalai n-gun rawng ai MADU Karai Kasang e, nye a akyu hpyi ga hpe na ya e; Yaku a Karai Kasang e, madat ya e!

⁹Karai Kasang e, nang lata san da sai hkawhkam ngu ai anhte a hkawhkam wa hpe shaman ya u.

¹⁰Na a Nawku Htingnu hta lani mi sha nga lu ai gaw kaga shara e, nhtoi hkying mi nga ai hta grau kaja nga ai; Ngai gaw tara n lang ai wa a nta ni hta nga lu ai gaw Karai Kasang a nta chyinghka hkinbawng hta e, tsap nga na hpe, grau nna tsaw nga nngai.

¹¹MADU gaw anhte hpe makawp maga ai wa hte hpung shingkang hte hpring ai hkawhkam wa rai nna; matsan dum ai myit hte arawng sadang anhte hpe shaman ya nga ai. Shi gaw teng man ai amu galaw ai ni hpe mai kaja ai lam hpa hpe mung jaw ya na, ningdang ai n rai.

¹²Chyahtum Chyalai n-gun rawng ai MADU e, nang hpe kam hpa nga ai ni gaw kade wa a lu nga ma hka!