Read Jinghpaw Common Language Bible 2009 SHAKAWN KUNGDAWN 85 Bible Online

SHAKAWN KUNGDAWN 85 - Jinghpaw Common Language Bible 2009 bible

SHAKAWN KUNGDAWN 85

¹[81] MADU e, nang gaw na a lamu ga hpe matsan dum nga ndai; Israela amyu masha ni hpe kalang mi bai ngamu ngamai shangun nga nit dai.

²Nang gaw na a amyu masha ni a yubak ni hpe raw dat kau ya nit dai; shanhte a shut hpyit ai lam ni hpe mara dat kau ya nga nit dai.

³Shanhte hpe masin pawt ai lam nang jahkring kau nna; na a masin kahtet ai hpe mung shakawp kau nga ndai.

⁴Anhte a hkye la MADU Karai Kasang e, anhte hpe mi na hte maren bai hkap la mi, anhte hpe n yu ra hkum rai nu yaw!

⁵Nang anhte hpe htani htana masin pawt nga na n ni? Na a masin kahtet ai lam galoi mung n htum mai na rai sani?

⁶Anhte hpe n-gun atsam kalang mi bai shaja ya mi: shing rai, anhte, na a amyu masha ni nang hpe shakawn nga na ga ai.

⁷MADU e, na a dinggrin tsaw ra myit anhte hpe madun ya mi; na a hkye hkrang la ai karum la lam, anhte hpe jaw ya mi.

⁸MADU Karai Kasang tsun nga ai ga hpe ngai madat nga nngai; anhte gaw angawk angak re ai lam ni de n kayin sa mat wa ai rai yang, shi a amyu masha ni rai nga ai anhte hpe ngwi pyaw sim sa ai lam jaw ya na shi ga sadi tawn da nga ai.

⁹Shi hpe shagrau sha-a ai ni hpe shi hkye hkrang la na, kaja wa, jin jin rai nga ai; shi a hkye hkrang la ai hpung shingkang gaw anhte a lamu ga hta nga nga na ra ai.

¹⁰Tsaw ra myit hte sadi sahka myit gaw rau dan pru wa nga ai; ding man ai hte ngwi pyaw sim sa ai lam mung, ahpum ginshum wa na mara ai.

¹¹Masha a sadi sahka gaw ginding aga kaw nna rawt lung wa nhtawm; Karai Kasang a ding man ai lam, sumsing lamu kaw nna gum yu na ra ai.

¹²Dai MADU gaw anhte hpe ngamu ngamai shangun na ra ai; anhte a lamu ga gaw nsi naisi nhpaw n-ya shapraw ya na ra ai.

¹³Ding man ai lam gaw dai MADU a shawng e, sa wa nna; shi a matu lam shajang shajin ya na ra ai.