Read Jinghpaw Common Language Bible 2009 SHAKAWN KUNGDAWN 9 Bible Online

SHAKAWN KUNGDAWN 9 - Jinghpaw Common Language Bible 2009 bible

SHAKAWN KUNGDAWN 9

¹[8] MADU e, nye a myit masin mahkra hte nang hpe ngai shakawn nga na nngai; nang galaw dan sai mauhpa amu mahkra hpe ngai tsun dan nga na nngai.

²Na a majaw, kabu gara ai hte ngai mahkawn mangoi nga na nngai; Chyahtum Chyalai n-gun rawng ai Karai Kasang e, ngai nang hpe mahkawn shakawn nga na nngai.

³Nang dan pru wa ai shaloi, nye a gumlau hpyen ni nhtang mat wa nna; shanhte kadawng taw mat ai hte si mat ma ai.

⁴Nang gaw na a tara dara ai lam hta myit malang ai hte ding man ai wa rai nga ndai rai nna; ngai hpang maga de nang tara jeyang ya nit dai.

⁵Nang gaw tara maigan ni hpe daw dan nna, tara n lang ai ni hpe shamyit kau nit dai; shanhte hpe galoi mung dum sana n rai.

⁶Anhte a gumlau hpyen ni gaw htani htana htum mat masai; nang gaw shanhte a mare ni hpe jahten kau nit dai hte shanhte gaw tsep kawp malap kau ai hkrum nga masai.

⁷Rai ti mung, MADU gaw htani htana hkawhkam wa rai nga ai; shi gaw tara dara na matu, shi a tingnyang hpe lajang da nu ai.

⁸Shi gaw mungkan ga hpe ding man ai hku up hkang nga nna; amyu baw ni hpe teng man rap ra ai tara hte shi jeyang nga ai.

⁹Dai MADU gaw dip da hkrum ai ni a shingbyi shara rai nga ai; ru tsang hkrum ai aten ni hta shim lum ai shara mung rai nga ai.

¹⁰MADU e, nang hpe chye ai ni gaw nang hpe kam hpa na mara ai; nang kaw sa ai ni kadai hpe mung, nang kau da nga ndai n rai.

¹¹Ziun e up nga ai MADU hpe mahkawn shakawn mu! Shi hpa galaw sai amu, amyu baw shagu hte hpe htawn tsun dan mu!

¹²Karai Kasang gaw nni nkri hkrum sha ai ni hpe dum nga nna; shanhte a hpyi jahtau ai nsen hpe shi malap kau nga ai n rai, shi gaw shanhte hpe shut hpyit ai ni hpe, ari jaw nga ai.

¹³MADU e, ngai hpe matsan dum la e law! Nye a gumlau hpyen ni ngai hpe jahkrum ai nni nkri lam ni hpe mu ya e! MADU e, si hkrung si htan kaw nna ngai hpe mawai la e,

¹⁴shaloi, Yerusalem amyu masha ni a man e, ngai rawt tsap lu nna, ngai nang hpe shakawn ai lam yawng mayawng shanhte hpe tsun dan lu na nngai. Nang ngai hpe hkye hkrang la nit dai majaw ngai kabu gara lu na nngai.

¹⁵Tara maigan masha ni gaw nhkun htu mu ai hte dai hta di hkrat bang mu ai; shanhte hkam da ai mahkam hta shanhte bai lu nga manu ai.

¹⁶Dai MADU gaw shi a ding man ai tara dara lam ni hta shi hkum nan hpe shadan dan nu ai hte; tara n lang ai ni gaw shanhte galaw ai arawn alai hte maren, mahkam hta lu nga ma ai.

¹⁷Tara n lang ai ni hte Karai Kasang hpe nyet kau ai ni yawng a jahtum gaw si hkrung si htan lam rai nga ai.

¹⁸Ra kadawn ai ni gaw tut nawng e, nsawn nsang di hkrum na ma ai n rai; matsan mayan ni a myit mada shara htani htana agrawp kau ai hkrum na ma ai n rai.

¹⁹MADU e, sa rit! Kadai hpe mung nang hpe hkum ninghkap shangun et! Tara maigan ni hpe na a man de woi sa nna, shanhte a ntsa e tara jeyang daw dan ai ga tsun ya u.

²⁰MADU e, shanhte hpe hkrit kang shangun u; shanhte gaw si mat chye ai shinggyim masha ni chyu rai nga ma ai lam shanhte hpe chye shangun u.