Read Jinghpaw Common Language Bible 2009 SHAKAWN KUNGDAWN 95 Bible Online

SHAKAWN KUNGDAWN 95 - Jinghpaw Common Language Bible 2009 bible

SHAKAWN KUNGDAWN 95

¹Wa marit, MADU hpe anhte shakawn ga! Anhte hpe makawp maga ai Karai Kasang hpe kabu gara mahkawn shakawn ga!

²Shi a man e, chyeju dum let anhte shang nna, mahkawn mangoi ga hte shi hpe kabu gara shakawn ga.

³Kaning rai nme law, MADU gaw Chyahtum Chyalai n-gun rawng ai Karai Kasang, karai ni yawng a ntsa e up nga ai n-gun hte hpring ai hkawhkam wa rai nga ai.

⁴Shi gaw sung htum ai lungpu hku kaw nna tsaw htum ai bum pungding du hkra, mungkan ga ting hpe up hkang nga ai.

⁵Shi hpan da ai panglai hka hte shi hkum nan hkrang shapraw gaw da ai lamu ga hpe mung, shi up nga ai.

⁶Sa marit, anhte shi hpe dingnyawm ai hte nawku daw jau ga; anhte a MADU Hpan Wa Ningsang Wa a man e, lahput hput di ga.

⁷Shi gaw anhte a Karai Kasang rai nga ai; anhte gaw shi e lanu lahku tawn ai amyu masha ni; shi bau rem da nga ai sagu hpung ni rai nga ga ai. Shi tsun shaga ai ga ni hpe dai ni jang, madat la mu.

⁸“Meriba e nga lai wa sai nanhte a kaji kawa ni zawn nanhte a du ni hpe hkum shaja da nga myit; nam mali na Masa shara e, nanhte a kaji kawa ni nga lai wa ai shaloi na zawn, nanhte a myit hpe hkum shaja da nga myit.

⁹Shanhte gaw shanhte a matu, ngai galaw shapraw dan sai amu ni hpe mu lu manu ai; rai ti mung, ngai hpe dai shara hta chyam yu manit dai.

¹⁰Ngai gaw mali shi ning tup, dai amyu masha ni hpe n yu ra mat nngai. ‘Shanhte gaw kade wa sadi n dung nga ma hka! shanhte gaw nye a hkang da ai tara ni hpe ndang kau ai ni rai ma ai.’

¹¹Ngai pawt sindawng nga nngai hte, ‘Nanhte myit sim myit sa hte nga lu na matu, ngai lajang da ya ai mungdan de, galoi mung shang sha lu na ra ai n rai,’” ngu nna dagam shaka da nngai.