Read Jinghpaw Common Language Bible 2009 SHAKAWN KUNGDAWN 97 Bible Online

SHAKAWN KUNGDAWN 97 - Jinghpaw Common Language Bible 2009 bible

SHAKAWN KUNGDAWN 97

¹Dai MADU gaw hkawhkam rai nga ai! Ginding aga e, kabu jahtau nga u! panglai zunlawng ni e, nanhte mung kabu gara nga mu.

²Sumwi ni hte nsin gaw shi hpe gawan shinggrup da nna; shi gaw tara ai hte ding man ai hku up hkang nga ai.

³Shi a shawng e, wan sa wa nna shi hpe wang shinggrup da ai gumlau hpyen ni hpe hkru kau nga ai.

⁴Shi a myi hprap gaw mungkan ga hpe jahtoi ya nga nna, aga gaw dai hpe mu nna hkrit gari nga ai.

⁵Mungkan ga ting a MADU Karai Kasang a man e, bum ni gaw gitbaw zawn byawng mat nga ai.

⁶Sumsing lamu ni gaw shi a ding man ai lam hpe htawn tsun nga nna; amyu baw ni yawng hte mung shi a hpung shingkang hpe mu nga ma ai.

⁷Hpara sumla hpe nawku ai wa kadai rai ti mung, kaya kahpa hkrum nga nna; karai ni yawng gaw MADU a man e, dingnyawm nga ma ai.

⁸MADU e, nang tara jeyang ai a majaw, Ziun amyu masha ni kabu gara nga ma ai, Yuda mung na mare ni mung kabu jahtau nga ma ai.

⁹Chyahtum Chyalai n-gun rawng ai MADU e, mungkan ga mahkra hpe up hkang ai wa nang rai nga ndai; nang gaw hpara ni mahkra hta grau nna kaba nga ndai.

¹⁰N hkru ai ni hpe n ju n dawng nga ai ni hpe MADU tsaw ra nga ai; shi gaw shi a amyu masha ni a asak ni hpe makawp maga ya nna, tara n lang ai masha ni a n-gun atsam kaw nna mung, shanhte hpe mawai la nga ai.

¹¹Ding hpring ai wa a ntsa e, nhtoi hpe jahtoi ya nna; mai kaja ai ni a ntsa e, kabu gara ai lam tawn da ya nga ai.

¹²Dai MADU galaw da ngut sai amu ni a majaw, ding hpring nga ai ni yawng hte e, kabu gara nga mu! Chyoi pra ai Karai Kasang galaw da nu ai amu ni hpe dum mu, shi hpe chyeju dum mu law.