Read Jinghpaw Common Language Bible 2009 GA SHAGAWP 10 Bible Online

GA SHAGAWP 10 - Jinghpaw Common Language Bible 2009 bible

GA SHAGAWP 10

¹Da ndai gaw Shawlumon a ga shagawp ni rai nga ai; hpaji rawng ai kasha gaw shi a kawa hpe kabu gumrawng shangun nna, angawk ai kasha gaw kanu hpe yawn shangun nga ai.

²N ding n man ai hte lu tam ai sut gan gaw nang hpe hpa mung akyu n jaw nga ai, rai ti mung, myit malang ai gaw na a asak hpe hkye hkrang la nga ai.

³Dai MADU gaw mai kaja ai masha ni hpe kawsi n jahkrum shangun nga ai, tara n lang ai ni hpe chyawm gaw shanhte a myit ra ai de, n du shangun nga ai.

⁴Lagawn ai gaw nang hpe matsan shangun ti mung, shakut shaja ai gaw nang hpe sut su shangun nga ai.

⁵Myit mang chye ai masha wa gaw nsi naisi myin an nga ai shaloi, shu la nga ai; mangai aten hta yup nga ai wa chyawm gaw kaya n chye ai wa rai nga ai.

⁶Mai kaja ai masha wa gaw shaman ai chyeju hpe hkam la na ra ai; tara n lang ai masha wa a n-gup aga gaw kashun kashe du daw sai hkaw amu hpe makoi da nga ai.

⁷Mai kaja ai masha ni gaw shaman chyeju langai zawn, matsing da ai hkrum nga ma ai; tara n lang ai masha ni chyawm gaw, loi hkring mi rai jang, malap kau ai hkrum na mara ai.

⁸Myit mang chye ai masha ni gaw kaja ai hpaji jaw ga hpe hkap la nga ma ai; angawk angak nga nna baw law ai ni chyawm gaw hten run mat na mara ai.

⁹Myit malang ai masha ni gaw apyaw sha shim nga ma ai, n teng n man ai hku amu galaw ai ni chyawm gaw rim sharen da ai hkrum na mara ai.

¹⁰Teng man ai lam hpe hkum shingdang ai wa gaw ru tsang jahkrum nga ai; dan dan leng leng daru sharin ai wa gaw ngwi pyaw sim sa lam a matu, amu galaw ya nga ai.

¹¹Mai kaja ai masha wa a n-gup aga gaw asak hka hpawk rai nga ai; tara n lang ai wa a n-gup aga gaw kashun kashe du daw sai hkaw lai hpe makoi magap da nga ai.

¹²N dawng n yawt ai myit gaw ru tsang lam hpe shalut shalau ya tim, tsaw ra ai myit gaw shut hpyit mara mahkra hpe raw dat ya nga ai.

¹³Hpaji kung ai masha ni gaw lachyum rawng ai ga hpe tsun nga ma ai; angawk ai masha ni chyawm gaw ari jaw ai hkrum ra na ma ai.

¹⁴Hpaji chye ai ni gaw shanhte dang di lu ai machye machyang mahkra hte hpe mahkyu la nga ma ai; angawk angak re ai ni ga tsun wa yang, ru yak jam jau lam gaw tsan tsan e nga nga ai n rai.

¹⁵Sut gan gaw sahti wa hpe, makawp maga nga ai; sut kata ai gaw matsan mayan wa hpe jahten nga ai.

¹⁶Mai kaja ai amu a shagrau kumhpa gaw asak lam rai nga ai; yubak gaw grau sin htat ai yubak lam de chyu sha woi sa wa nga ai.

¹⁷Shading sharai ai ga hpe madat mara ai masha ni gaw asak hkrung nga ma ai; shut hpyit ai mara hpe n yin la ai ni chyawm gaw ru yak tsin-yam hkrum na mara ai.

¹⁸Tinang a n dawng n yawt ai myit hpe up da ai wa gaw masu ai masha rai nga ai. Shatan nhkan ga hpe tsun shabra ai wa kadai rai ti mung, angawk ai wa rai nga ai.

¹⁹Ga law law nang shaga magang, yubak shalaw la na grau loi magang rai nna; nang lama, hpaji rawng ai wa rai yang, nang atsin sha nga na ndai.

²⁰Mai kaja ai masha wa a n-gup aga gaw gumhpraw jet zawn rai nga nna; tara n lang ai masha wa a myit mang ai lam gaw, kaman lila rai nga ai.

²¹Mai kaja ai masha wa a ga matsun gaw, masha law law hpe akyu chyeju hpe hkam la shangun nga ai; angawk ai lam gaw tinang hkum hpe asak jasum kau ya lu nga ai.

²²Dai MADU a shaman chyeju gaw nang hpe ngamu ngamai shangun nna, bungli shaja ai gaw na sut gan hpe yawn hkyen lam jat ya nga ai n rai.

²³Shut hpyit amu galaw ai hta kabu gara ai wa gaw angawk ai wa rai nga ai; zai byeng-ya hte hpring ai ni gaw hpaji byeng-ya hta awng sharawng nga ma ai.

²⁴Ding hpring ai masha ni gaw shanhte ra marit ai lam ni hpe hkam la lu nga ma ai; tara n lang ai ni gaw grau hkrit kahpra htum ai lam hpe lu la na mara ai.

²⁵Tara n lang ai ni gaw nbung laru du ai hte shapoi kau ai hkrum nga ma ai; ding hpring ai masha ni chyawm gaw tut nawng e, shim lum nga ma ai.

²⁶Lagawn ai masha wa hpe na a matu, amu lama mi galaw shangun na, galoi mung hkum saw shaga nga et; ntsin hkri gaw na a wa hte wan hkut gaw na a myi hte n htuk nga ai zawn, shi gaw nang hpe masin shapawt ya na ra ai.

²⁷Dai MADU a ga hpe madat mara u, shaloi nang asak galu na ra ai; tara n lang ai ni gaw shanhte a aten garai n du yang, si mat na mara ai.

²⁸Mai kaja ai masha ni a myit mada lam gaw kabu gara lam de woi sa nga ai; tara n lang ai ni a myit mada lam chyawm gaw kaman lila rai nga ai.

²⁹Dai MADU gaw ding man ai masha ni hpe makawp maga ya ti mung; shut hpyit amu galaw ai ni hpe chyawm gaw jahten sharun kau nga ai.

³⁰Ding man ai masha ni tut nawng e, shim lum nga ma ai; tara n lang ai ni chyawm gaw mungdan hta shanu nga lu na ma ai n rai.

³¹Ding hpring ai masha ni hpaji byeng-ya ga tsun nga ma ai; n hkru ai ga tsun ai shinglet gaw gying mat na ra ai.

³²Ding hpring ai masha ni gaw shi tsun shaga ang ai lam hpe chye nga ai; tara n lang ai ni chyawm gaw tut nawng e, masin achyaw ga hpe atsun nga ai.