Read Jinghpaw Common Language Bible 2009 GA SHAGAWP 11 Bible Online

GA SHAGAWP 11 - Jinghpaw Common Language Bible 2009 bible

GA SHAGAWP 11

¹Dai MADU gaw n teng n man ai joi jang lang ai ni hpe n ju n dawng nga ai. Shi gaw teng man ai joi si ni hta kabu gara nga ai.

²Gumrawng gumtawng ai masha ni gaw hkring mi rai jang, kaya kahpa hkrum na mara ai; shagrit shanem ai myit chyawm gaw hpaji grau rawng nga ai.

³Nang mai kaja nga ai rai yang, ding man ai lam hta nang hkan nang nga ndai; kam hpa n lu ai masha ni chyawm gaw shanhte a n ding n man ai lam a jaw e, shaza kau ai hkrum nga ma ai.

⁴Si ai de nang myi man yawng ai shani e, sut gan gaw nang hpe hpa karum lu na n rai; ding man ai lam chyawm gaw na a asak hpe hkye hkrang la lu nga ai.

⁵Myit malang ai ni gaw mai kaja ai masha wa a asak hkrun lam hpe shatsawm jahtap ya ti mung; tara n lang ai masha wa gaw shi nan hkrat sum ai lam hpe shabyin la na ra ai.

⁶Ding man ai lam gaw myit ding ai masha wa hpe mawai la nga ai; kam hpa n lu ai wa gaw shi a lawhpa marin marit ai lam hta ahkang hkrum nga ai.

⁷Tara n lang ai masha wa si wa yang, shi a myit mada ai gaw shi hte rau htum mat wa nga ai; sut gan hta kam hpa ai gaw kaman lila rai nga ai.

⁸Ding hpring ai ni gaw ru yak tsin-yam kaw na makawp maga la ai hkrum nga ma ai; dai ru yak tsin-yam gaw shi kaw du na malai tara n lang ai wa kaw du na rai nga ai.

⁹Karai kata masha ni a tsun shaga ai ga hte nanhte hten run lu nga myit ti mung; ding hpring ai wa a hpaji byeng-ya gaw nanhte hpe hkrang shaw la lu nga ai.

¹⁰Myit malang ai masha ni ngamu ngamai yang, mare ting kabu gara nga ai; tara n lang ai masha ni si wa yang chyawm gaw, dai mare hta kabu gara marawn jahtau nga ma ai.

¹¹Ding hpring ai masha ni shaman ga tsun yang, mare gaw galu kaba wa lu ti mung; tara n lang ai ni a n-gup aga hte mare hten run mat nga ai.

¹²Kaga masha wa hpe n kaw n law ga tsun ai gaw angawk angak lam rai nga ai; nang lama myit let ai rai yang chyawm gaw, atsin sha nang nga nga na rai ndai.

¹³Kadum kahte ga chye tsun ai kadai hpe mung, ip da mai ai lam hta n lu kam hpa mai nga ai; rai ti mung, kangka myit rawng ai wa hta nang kam hpa lu nga ndai.

¹⁴Mungdan hta lam woi ai lam n nga ai rai yang, amyu sha ni hkrat sum na mara ai; hpaji daw ai ni law law nga yang, shim lum lam lu la nga ai.

¹⁵Tsasam wa a hka hpe, nang jaw ya na matu ga sadi hkam la ai rai yang, nang yawn hkrum na ndai; dai hta nang n shang achya lawm ai rai yang, nang grau nna kaja nga ai.

¹⁶Sumnung shingdi ai num gaw hkungga ai hkrum nga ai; sari sadang n nga ai num chyawm gaw kaya kahpa hkrum nga ai.

¹⁷Nang gaw matsan chye dum ai wa rai yang, nang nan matsan dum hkrum na lam lajang da nga ndai; nang lama, mazut ai wa rai yang chyawm gaw na hkum hpe chyu sha machyi shangun nga ndai.

¹⁸Tara n lang ai masha ni gaw teng teng hpa mung lu la nga ai n rai ti mung; teng man ai amu hpe, nang galaw nga ai rai yang chyawm gaw shagrau sha-a ai kumhpa hpe nang teng teng hkam la lu na rin dai.

¹⁹Mai kaja ai amu hpe galaw na matu myit makun da ai wa gaw asak hkrung nga lu na ra ai; rai ti mung, shut hpyit ai amu hpe galaw shanang ai wa chyawm gaw si mat na ra ai.

²⁰Dai MADU gaw n hkru ai myit rawng ai masha ni hpe n dawng nga ai; teng man ai amu galaw ai masha ni hpe tsaw ra nga ai.

²¹N hkru ai masha ni ari hkrum na hpe nang teng tup myit hkawn lu ti mung; ding hpring ai masha ni chyawm gaw lawt wa na mara ai.

²²Htauli htaula myit n rawng ai num gaw ahpraw tsawm ti mung, wa kanu a nnaw hta noi ai ja shanghkawng hte bung nga ai.

²³Mai kaja ai masha ni gaw kaja ai akyu hpe tut nawng e, ra marit nga ma ai; tara n lang ai ni shanhte ra marit ai hpe hkam la lu ma ai shaloi, masha shagu masin pawt nga ma ai.

²⁴Masha nkau mi shanhte a gumhpraw hpe ndut ndang jai lang kau ti mung, grau sut su wa nga ma ai; nkau mi sadi sahka let jai lang ti mung, grau matsan jat wa nga ma ai.

²⁵Ndaw nhta jaw ya u, shing rai jang, nang ngamu ngamai wa na ra ai; kaga masha ni hpe karum shingtau u, shing rai jang karum shingtau la ai nang bai hkam la lu na rin dai.

²⁶Mam mahkawng da nna, manu tsaw jang, dut shapraw na wa hpe masha ni dagam dala ga tsun nga ma ai; dai hpe dut shapraw ya ai wa chyawm gaw shanhte shakawn nga ma ai.

²⁷Na a shatawng shada ai lam kaja nga ai rai yang chyawm gaw nang hkungga ai hkrum na rin dai; rai ti mung, ruyak tsin-yam hpe nang hkan tam ai rai yang, dai hpe nang hkam la lu na rin dai.

²⁸Tinang a sut gan hta myit manoi nga ai ni gaw, nmut ta e, hpun lap ni run hkrat mat wa ai zawn, rai nga ti mung, ding hpring ai ni chyawm gaw ginhtawng ta na hpun lap ni zawn, tsit lali wa na mara ai.

²⁹Tinang a dinghku kata de, ru yak jam jau lam la bang wa ai masha gaw, jahtum e, kaman lila rai na ra ai; angawk ai masha ni gaw hpaji rawng ai wa kaw tut nawng e, shangun ma tai nga na mara ai.

³⁰Ding man ai lam gaw asak hpe jaw ya lu tim, kashun kashe du daw sai hkaw amu gaw dai hpe dawm kau ya nga ai.

³¹Mai kaja ai masha ni gaw ndai dinghta ga ntsa e, shagrau ai hpe hkam la lu nga ai; tara n lang ai ni hte yubak kap ai masha ni chyawm gaw ari hkrum na mara ai lam, nang hkrak chye lu na ndai.