Read Jinghpaw Common Language Bible 2009 GA SHAGAWP 12 Bible Online

GA SHAGAWP 12 - Jinghpaw Common Language Bible 2009 bible

GA SHAGAWP 12

¹Tinang shut ai shaloi, sharin shaga ai hpe ra sharawng ai wa kadai rai ti mung chye chyang ai hpe tsaw ra nga ai. Shadum jahprang ai hpe n dawng ai wa chyawm gaw angawk ai wa rai nga ai.

²Dai MADU gaw mai kaja ai masha ni hpe ra sharawng ti mung; n hkru ai amu maw mawn ai masha ni hpe shi daw dan nga ai.

³Tara n lang ai gaw shim lum lam hpe n lu la shangun nga ai, rai ti mung, ding hpring ai masha ni chyawm gaw ngang ngang kang kang tsap lu na mara ai.

⁴Kaja ai num gaw shi madu wa a gumrawng shara hte kabu hpa rai nga ai; madu wa a ntsa e, kaya jahkrum ai num gaw nrut nra hpe shatsam kau ya ai mawng ana zawn rai nga ai.

⁵Ding man ai masha ni nang hpe rap ra ai hku lakawn lanawn la na mara ai; tara n lang ai ni chyawm gaw nang hpe masu ahpyawp sha na matu chyu sha ra marit nga ma ai.

⁶Tara n lang ai masha ni a ga gaw masha sai hpe jahkaw ya nga ai; ding hpring ai masha ni a n-gup aga gaw jahkrit shama hkrum nga ai ni hpe mawai la nga ai.

⁷Tara n lang ai masha ni sum kadawng mat nna shanhte a aru arat ni a matu hpa n ngam da ya lu nga ma ai; ding hpring ai masha ni a dinghku ni chyawm gaw agrin nga na mara ai.

⁸Nang zai byeng-ya hpaji hpe chye nga ai wa rai yang, shakawn shagrau ai nang hkrum na ndai; nang angawk ai wa rai yang chyawm gaw masha ni na a ntsa e yu kaji kau na mara ai.

⁹Asak hkrun lam a matu, yu maya masha langai mi makan galaw let asak bau ai gaw hkik hkam ai langai mi hku nga nna kawsi hkrum hkra nga ai wa hta grau kaja nga ai.

¹⁰Mai kaja ai masha wa gaw tinang a yam nga ni hpe, yu lanu lahku chye nga ai; tara n lang ai masha ni chyawm gaw dai yam nga ni hpe sheng mareng rai ma ai.

¹¹Bungli galaw shaja ai wa gaw sha na lusha ndaw nhta lu nga ai; akyu n pru ai bungli lamang ni hta aten hkan shama ai gaw angawk ai lam rai nga ai.

¹²Tara n lang ai masha ni yawng ra marit ai gaw, n hkru ai amu galaw shachyen na matu rai nga ai; ding hpring ai masha ni chyawm gaw ngang ngang kang kang tsap nga ma ai.

¹³Tara n lang ai masha wa gaw shi a n-gup aga ni hta ahkang abai nga ai; ding hpring ai wa chyawm gaw ru yak tsin-yam kata kaw na shi hkum nan male pru wa nga ai.

¹⁴Na a shagrau kumhpa gaw nang tsun shaga ai ga hte nang galaw ai amu bungli ni hta madung rai nga nna, nang hkam la ging ai lam nang lu la na rin dai.

¹⁵Angawk ai masha ni gaw shanhte teng man ai ni re ngu ai hpe, tut nawng e, myit nawn la nga ma ai; hpaji rawng ai masha ni gaw hpaji jaw ai ga ni hpe madat mara nga ma ai.

¹⁶Angawk ai wa myit loi mi machyi hkrum yang, dai hpe tin tin shadan shadawng dan nga ai; myit sam ai masha ni gaw n kaw n law re ai lam hpe hpa zawn n nawn ya na mara ai.

¹⁷Teng man ai lam hpe nang tsun nga yang teng man rap ra ai tara hpe shatup nga ti mung; masu magaw ga gaw tara tawt lai ai lam de, woi sa wa nga ai.

¹⁸Majoi mi baw law ai ga gaw sung hkra galun ai nhtu nma zawn jahpye ya lu ti mung; hpaji ga hte tsun shaga ai ga chyawm gaw shamai shatsai ya lu nga ai.

¹⁹Masu magaw ai gaw asak kadun nga ai rai ti mung, teng man ai gaw htani htana agrin nga ai.

²⁰N hkru ai hpe maw mawn ai lam gaw akajawng sha nyawp rai mat na ra ai, rai ti mung, mai kaja lam a matu shakut shaja ai ni chyawm gaw kabu gara ai lam hpe mu la na mara ai.

²¹Ding hpring ai masha ni hta n shawp n kap ai lam hpa mung byin hkrum hkra na n rai; rai ti mung, tara n lang ai masha ni gaw ru yak shoi hpa chyu sha hkrum sha nga ma ai.

²²Dai MADU gaw masu magaw masha ni hpe n dawng nga ai; sadi dung ai ni hpe chyawm gaw shi ra sharawng nga ai.

²³Myit sam ai masha ni gaw shanhte chye ai lam ni hpe, ip da nga ma ai; angawk ai masha ni chyawm gaw shanhte a angawk angak lam hpe shabrawng nga ma ai.

²⁴Bungli makan shaja ai gaw nang hpe n-gun atsam jaw ya na ra ai; lagawn ai lam chyawm gaw nang hpe mayam shatai kau na ra ai.

²⁵Myit ru ai gaw na a ngwi pyaw lam hpe hpya jahten lu nga ai; matsan dum lama ai ga gaw nang hpe mani sumsai shangun na ra ai.

²⁶Ding hpring ai masha wa gaw shi a manang wa hpe lam madun nga ti mung, tara n lang ai ni a lam chyawm gaw shanhte hpe woi shadam nga ai.

²⁷Nang lagawn ai wa rai yang, nang gyam ai shan hpe galoi mung lu gap na n rai; nang shakut shaja ai rai yang chyeju lu la na ndai.

²⁸Ding hpring ai lam gaw asak hkrung ai lam rai nna, tara n lang ai lam gaw katsan ga de hkrang ai lam rai nga ai.