Read Jinghpaw Common Language Bible 2009 GA SHAGAWP 14 Bible Online

GA SHAGAWP 14 - Jinghpaw Common Language Bible 2009 bible

GA SHAGAWP 14

¹Num ni a hpaji byeng-ya hte dum nta ni hpe gaw da nga ai; angawk ai lam a majaw jahten kau hkrum nga ai.

²Myit malang ai hku hkan ai wa gaw dai MADU hpe hkrit hkungga ai lam madun nga ai; myit magaw ai wa chyawm gaw shi hpe n kaw n law re ai lam madun dan nga ai.

³Angawk ai wa a gumrawng gumtawng ai lam gaw shi hpe ga abrawp shangun nga ai; hpaji rawng ai masha wa a n-gup aga gaw shi hpe bau sin nga ai.

⁴Na htai garawt ai usu ni n nga ai rai yang, na a mam dum kaman sha rai na ra ai; rai ti mung dai usu ni a majaw, mam dum hta mam nsi ni hte hpring nga na ra ai.

⁵Kam ging ai sakse wa gaw teng man ai lam hpe tut nawng e tsun nga ai; rai ti mung, n kam lu ai sakse wa chyawm gaw masu magaw hta lai nna hpa mung n tsun nga ai.

⁶Rai dum ai masha ni galoi mung hpaji rawng ai masha n tai lu nga ai; zai byeng-ya rawng ai masha ni chyawm gaw hpaji hpe aloi sha sharin la nga ma ai.

⁷Angawk ai masha ni kaw nna pru mat wa u; shanhte nang hpe hpa mung sharin achyin ya lu nga ma ai n rai.

⁸Hpa majaw ram ai masha gaw hpaji rawng nga a ta? Shi chye nga ai majaw rai nga ai. Hpa majaw myit n kup ai masha wa gaw angawk nga a ta? Hpa majaw nga yang, shi grai chye dum nga ai majaw rai nga ai.

⁹Angawk angak re ai masha ni yubak galaw ma ti mung, dai hpe hpa zawn n nawn nga ma ai; rai ti mung, mai kaja ai masha ni chyawm gaw mara raw dat kau ya na, ra nga ma ai.

¹⁰Na a kabu gara ai gaw na a matu rai nga ai, na a myit yawn hkyen ai mung na a matu rai nga lit dai; kadai mung dai hpe shang garan kau ya lu nga ai n rai.

¹¹N hkru ai masha ni a nta kadawng daw mat ai hpang, mai kaja ai masha ni a dum nta ni grin nga na ra ai.

¹²Teng man sai ngu nang myit nawn ai lam gaw nang hpe katsan ga de woi sa wa ai lam tai chye nga ai.

¹³Mani ai lam gaw yawn ai lam hpe magap da nga ai; kabu gara ai lam htum mat yang, yawn hkyen ai lam tut nawng e, hkan kanawng nang nga ai.

¹⁴N shawp n kap ai masha ni shanhte lu la ging ai hte maren, hkam la lu na mara ai; Mai kaja ai masha ni gaw shanhte galaw ai amu hte maren shabrai hpe hkam la lu na mara ai.

¹⁵Angawk ai masha wa gaw hpa hpe mung, shi kam nga ai; myit sam ai masha ni gaw shanhte htawt na lagaw lahkam ni hpe sadi maja nga ma ai.

¹⁶Htauli htaula myit rawng ai masha ni gaw ru yak tsin-yam hpe sadi maja let, koi kau ma ti mung, angawk ai masha ni chyawm gaw shanhte nan n dum n dam larau ladau galaw ma ai.

¹⁷Myit kahtet ai masha ni gaw mana bu ai amu galaw nga nna; hpaji grau rawng ai ni gaw dai hta atsin sha rai nga nga ma ai.

¹⁸Nyan tang ai masha ni gaw angawk angak re ai shabrai hpe lu la ma ai; myit let ai masha ni chyawm gaw hpaji janmau hpe gup la nga ma ai.

¹⁹N hkru ai masha ni gaw ding hpring ai masha ni a man e, gum dagup na mara ai; shagrit shanem let shanhte hpe matsan dum la na hpyi ma ai.

²⁰Matsan mayan masha wa hpe kadai mung n ra nga ma ai; shi a htingbu wa pyi, n yu sharawng nga ai; sut su ai wa chyawm gaw jinghku jingyu law law lu nga ai.

²¹A lu ai lam hpe nang ra marit yang, matsan mayan wa hpe, matsan dum u; kadai hpe rai tim, n kaw n law re ai lam gaw, yubak rai nga ai.

²²Kaja ai amu hpe, nang galaw ai rai yang, kaga masha ni a kam hpa ai hte hkungga lara ai lam hpe nang hkam la na ra ai.

²³Bungli galaw u, nang asak kan bau lu na rin dai; nang lama, kaman dung shaga nga ai rai yang, matsan mayan hkrum na ndai.

²⁴Hpaji rawng ai masha ni gaw sut gan hte shagrau hkam la nga ma ai; angawk ai masha ni chyawm gaw shanhte a angawk angak lam hta gumhkawng nga ma ai.

²⁵Shi teng man ai ga shaga nga yang, dai sakse ga gaw asak hpe hkrang la nga ai; shi masu magaw ga tsun nga yang, masha ni hpe dut sha kau nga ai.

²⁶Dai MADU hpe hkrit hkungga ai gaw dinghku masha ni hte shi a matu, kam hpa shara hte shim lum ai lam hpe jaw ya nga ai.

²⁷Nang gaw si hkrung si htan hpe koi yen mayu nga n ni? MADU hpe hkrit hkungga ai gaw asak hka hpawk rai nga ai.

²⁸Hkawhkam wa a hkik hkam galu kaba ai lam gaw shi up hkang nga ai mung shawa masha gade law nga ai a ntsa e, madung nga ai; shanhte n lawm yang, shi kaman sha rai nga ai.

²⁹Nang atsin sha nga ai rai yang, nang hpaji rawng nga ndai; rai ti mung, nang masin kahtet nga ai rai yang, nang gade angawk ai lam hpe chyu sha, nang madun nga ndai.

³⁰Ngwi pyaw sim sa ai myit masin gaw hkum hkrang hpe hkam kaja shangun nga ai; manawn masham ai myit chyawm gaw nrut nra hpe shatsam kau ya ai mawng ana zawn rai nga ai.

³¹Matsan mayan ni hpe nang dip gamyet sha ai rai yang, shanhte hpe hpan da ai Karai Kasang hpe nang n gawn n sawn di nga ndai; rai ti mung, matsan mayan ni hpe matsan dum myit madun ai chyawm gaw MADU hpe nawku daw jau ai lam rai nga ai.

³²Tara n lang ai masha ni gaw shanhte a n hkru ai bungli hta hkrat sum ai lam hpe shabyin ya nga ai; mai kaja ai masha ni gaw shanhte a ding hpring ai amu hpe makawp maga da nga ai.

³³Hpaji byeng-ya gaw htauli htaula myit rawng ai masha wa myit mang ai lam shagu hta shanu nga ai; angawk ai ni chyawm gaw hpaji byeng-ya a lam hpa mung n chye nga ai.

³⁴Ding man ai lam gaw mungdan hpe galu kaba shangun nga ai; yubak mahtang kaning re ai mungdan hpe mung kaya kahpa jahkrum nga ai.

³⁵Hkawhkam ni gaw kung kyang ai mung up salang ni hpe ra sharawng nga ma ai; shanhte myit n dik dum ai ni hpe ari jaw nga ma ai.