Read Jinghpaw Common Language Bible 2009 GA SHAGAWP 15 Bible Online

GA SHAGAWP 15 - Jinghpaw Common Language Bible 2009 bible

GA SHAGAWP 15

¹Si mani hte htan ai ga gaw myit kahtet ai hpe shakawp ya lu tim; kajet kajau re ai ga chyawm gaw pawt sindawng ai hpe shalut kabrawng ya nga ai.

²Hpaji rawng ai ni tsun shaga yang, machye machyang hpaji hpe ningja shapraw ya nga ai; angawk ai masha ni chyawm gaw lachyum n pru ai ga hpe tsun shapraw nga ma ai.

³Dai MADU gaw shara shagu hkan hpa baw byin nga ai hpe, mu chye nga ai; anhte kaja ai hte n hkru ai amu galaw nga ai hpe mung, shi yu nga ai.

⁴Matsan dum lama ai ga gaw asak rai nga ai, mazut ai ga gaw na a wenyi hpe gawng sharun ya nga ai.

⁵Na a nwa sharin shaga ai lam hpe n hkap la ai gaw angawk angak lam rai nga ai; shi a shading sharai ai ga matsun hpe hkap la ai gaw hpaji rawng nga ai.

⁶Ding hpring ai masha ni gaw shanhte a sut gan ni hpe kyem mazing da nga ma ai; tara n lang ai masha ni ru yak kyindut hkrum sha wa ai shaloi, shanhte a sut gan ni hpe shamat kau nga ma ai.

⁷Chye chyang ai hpaji gaw angawk ai ni kaw na n rai; hpaji rawng ai ni kaw na chyam bra wa nga ai.

⁸Dai MADU gaw mai kaja ai masha ni a akyu hpyi ga hta awng sharawng nga ai; tara n lang ai masha ni la sa ai shagu hkungga ni hpe shi n dawng nga ai.

⁹N hkru ai masha ni a lam hpe dai MADU matsat nga ai; jaw ai amu galaw ai ni hpe shi tsaw ra nga ai.

¹⁰Shut hpyit ai amu hpe nang galaw ai rai yang, laja lana re ai ari nang hkrum sha na ndai; nang hkum nan shading sharai n hkam ai rai yang, si na rin dai.

¹¹Katsan ga pyi gaw dai shara hta hpa nga nga ai hpe MADU n chye hkra, n magap da lu nga ai; shing re ai rai yang, shinggyim masha a myit mang ai lam gaw Karai Kasang a man kaw nna kaning rai makoi magap da lu na rai nga a ta?

¹²Rai dum ai masha ni gaw shading sharai na hpe n ra sharawng nga ma ai; shanhte gaw hpaji grau rawng ai ni kaw nna hpaji jaw ga ni hpe galoi mung n hpyi lajin nga ma ai.

¹³Masha ni kabu gara nga yang, shanhte mani sumsai rai nga ma ai; shanhte yawn hkyen hkrum hkra ai shaloi, shanhte a myi man hta myit daw ai nsam hpe mu lu nga ai.

¹⁴Zai byeng-ya rawng ai masha ni gaw sharin la na matu, ra sharawng nga ma ai; myit n su ai masha ni gaw n chye n chyang ai lam hta myit dik nga ma ai.

¹⁵Matsan mayan re ai wa a asak hkrun lam gaw dingngam malan dating shakut shaja sha ra nga ai; kabu gara ai masha ni chyawm gaw tut nawng e, pyaw ai asak hkrun lam hpe hkam sha nga ma ai.

¹⁶Matsan hkam let, MADU hpe hkrit hkungga ai lam gaw sut su nna nni nkri hkrum sha ai hta grau mai kaja nga ai.

¹⁷Nang tsaw ra ai masha ni hte rau namlaw namlap shatmai jawm sha ai gaw n ju n dawng ai shara hta mu mai ai shan lusha jawm sha ai hta grau mai kaja nga ai.

¹⁸Masin kahtet ai gaw ndang kalang hpe shabyin nga ai; hkam sharang ai gaw ngwi pyaw sim sa lam hpe jaw ya nga ai.

¹⁹Nang lagawn nga ai wa rai yang, mayak mahkak lam hpe shara shagu hkan nang hkrum kadup na ndai; rai ti mung, nang myit malang nga ai wa rai yang chyawm, gaw ru yak tsin-yam nang hkrum hkra na rin dai n rai.

²⁰Hpaji rawng ai kasha gaw shi a kawa hpe kabu shangun nga ai; angawk ai kasha chyu sha, kanu hpe n kaw n law di nga ai.

²¹Myit n su ai masha ni gaw shanhte a angawk ai lam hta kabu nga ma ai; hpaji rawng ai wa gaw jaw ai amu hpe galaw na ra ai.

²²Hpaji jaw ai lam mahkra hpe, nang dang lu ai made hkam la u; shing rai jang, nang awng dang wa na ra ai; dai lam ni hpe n hkam la ai rai yang, nang hkrat sum na rin dai.

²³Ra ahkyak ai aten hta ra ahkyak ai ga hpe tsun shaga lu ai gaw gade wa kabu gara shara rai nga a hka!

²⁴Hpaji rawng ai masha ni gaw katsan ga de hkrang ai lam de n yu wa ai sha, asak hkrung ai lam de hkawm lung wa nga ma ai.

²⁵Dai MADU gaw gumrawng gumtawng ai masha ni a dum nta ni hpe jahten kau ti mung; gaida gaina jan ni a sut gan arung arai ni hpe chyawm gaw, makawp maga ya na ra ai.

²⁶Dai MADU gaw n hkru n shawp ai myit mang lam ni hpe n dawng nga ai; ngwi ngawn ai ga ni hpe chyawm gaw shi awng sharawng nga ai.

²⁷Amyat hpe n ding n man ai hku, tam shakut ai rai yang, na a dinghku masha ni ru yak shoihpa hkrum hkra nga ai. Mayun kumhpa n la ai rai yang, nang asak galu na ra ai.

²⁸Mai kaja ai masha ni gaw shanhte ga garai n htang yang, shawng myit yu nga ma ai; n hkru ai masha ni chyawm gaw ga htan lawan nna, dai gaw ru yak tsin-yam shabyin ya nga ai.

²⁹Mai kaja ai masha ni akyu hpyi ma ai shaloi, dai MADU gaw madat ya nga ai; n hkru ai masha ni a akyu hpyi ga hpe chyawm gaw hpa n sawn ya nga ai.

³⁰Mani sumsai myi man ni gaw nang hpe kabu shangun nna; kaja ai shiga gaw nang hpe grau kabu shangun nga ai.

³¹Nang gaw shading sharai hkam nna madat mara ai wa rai yang, hpaji rawng nga ndai.

³²Sharin achyin ai ga hpe nang lale kau ai rai yang, dai gaw na hkum hpe machyi jahkrum nga ndai; shading sharai ai ga hpe nang hkap la ai rai yang chyawm gaw, hpaji grau rawng ai masha nang tai wa na rin dai.

³³Dai MADU hpe hkrit hkungga ai gaw hpaji nan rai nga ai; nang shagrit shanem chye yang sha, shagrau sha-a ai hpe hkam la lu nga ai.