Read Jinghpaw Common Language Bible 2009 GA SHAGAWP 16 Bible Online

GA SHAGAWP 16 - Jinghpaw Common Language Bible 2009 bible

GA SHAGAWP 16

¹Anhte gaw anhte a bungli masing ni hpe galaw mai ga ai; rai ti mung hpang jahtum e, Karai Kasang a myit ra ai hku sha byin nga ai.

²Nang galaw ai amu, lam magup jaw nga ai ngu nna, myit yu mai nga ai; dai MADU gaw na a myit akyang hpe daw dan ya nga ai.

³Na a bungli masing hta chyeju hpe hkam la lu na matu, dai MADU hpe hpyi nem u; shing rai yang nang galaw ai amu lamang ni hta awng dang wa na ra ai.

⁴Dai MADU gaw yawng mayawng a jahtum na byin maka hpe lajang da nu ai; tara n lang ai ni a jahtum na byin maka gaw hten run lam rai nga ai.

⁵Myit tsaw myit dap re ai masha shagu hpe dai MADU n dawng nga ai; shanhte hpe ari jaw ai kaw nna galoi mung, shi shalawt dat na ra ai n rai.

⁶Sadi dung nna kangka rai nga u, shing rai yang Karai Kasang gaw na a yubak hpe raw dat kau ya na ra ai. Dai MADU a ga madat u, shaloi n hkru ai lam hpa mung nang hta byin hkrum hkra wa na n rai.

⁷Nang gaw dai MADU hta awng sharawng nga ai rai yang, na a gumlau hpyen wa hpe nang jinghku shatai la lu nga ai.

⁸Ding man ai hte loi mi sha lu la ai gaw, n tara ai hte law law lu la ai shang gumhpraw hta grau kaja nga ai.

⁹Na a bungli masing lam hpe nang lajang mai ti mung; Karai Kasang gaw na a shamu shamawt ai lam hpe hkang ya nga ai.

¹⁰Hkawhkam wa gaw Karai daru magam hpung shingkang hte tsun shaga nga ai; shi a n-gawn daw dan ai lam ni gaw tut nawng e teng man nga ai.

¹¹Dut rai shagu hpe rap ra ai amu hte dut ya lu na matu, teng man ai joi jang lang na hpe dai MADU ra sharawng nga ai.

¹²Hkawhkam ni gaw n hkru ai amu hpe n mai yu shalai kau nga ai; hpa majaw nga yang, ngang kang ai mung up asuya ngu ai gaw ding man ai tara hta gaw gap da nga ai majaw rai nga ai.

¹³Hkawhkam wa gaw teng man ai ga hpe na la na matu, ra sharawng nga ai majaw, dai teng man ai ga shaga ai ni hpe, shi myi man pa shangun nga ai.

¹⁴Hpaji rawng ai masha wa gaw hkawhkam wa hpe kabu gara shangun na ra ai; hkawhkam wa pawt sindawng wa yang, marai langai ngai asak sum chye nga ai.

¹⁵Hkawhkam wa a myi man ningja gaw ginhtawng htawng wa mahka na, marang jahtu ai sumwi hte bung nga nna, dai hta asak rawng nga ai.

¹⁶Aja hte gumhpraw hta hpaji byeng-ya hte machye machyang hpaji lu la ai gaw grau kaja nga ai, dik hkra grau kaja nga ai.

¹⁷Mai kaja ai hku hkawm sa ai ni gaw n hkru n kaja ai hpe koi kau ai lam hta hkawm nga ai; dai majaw, nang hkawm sa wa nga ai lam hta maja nga u; shaloi, na a asak hpe hkye la lu na nhten!

¹⁸Gumrawng gumtawng ai gaw hten byak lam de woi sa wa nna; myit tsaw myit dap ai gaw hkrat sum ai lam de, woi sa wa nga ai.

¹⁹Matsan mayan rai nna myit shagrit shanem nga na gaw gumrawng ai masha langai ngai hte lanep garan la lu ai hta grau kaja nga ai.

²⁰Nang sharin la lu sai lam ni hta myit maju jung nga u; shaloi nang awng dang wa na ra ai, dai MADU hta kam hpa nga u; shaloi, nang a lu na rin dai.

²¹Hpaji rawng nna kung hpan ai myit rawng ai wa gaw shi a hkawn hkrang ai myit nyan hpaji hta gumhkawng nga ai; shi a n-gup aga grau ngwi pyaw magang, amu magam bungli hpe grau nna woi awn lu magang rai nga ai.

²²Hpaji byeng-ya gaw hpaji rawng ai wa a matu, asak hka hpawk rai nga ai; angawk ai wa hpe hpaji jaw shakut ai lam gaw aten hpe majoi mi shama kau ai sha rai nga ai.

²³Zai byeng-ya rawng ai masha ni gaw shanhte garai n tsun shaga yang, shawng myit yu nga ma ai; shanhte tsun shaga ai ga gaw masha hpe grau nna myit gang kayin la lu nga ma ai.

²⁴Matsan dum lama ai ga gaw lagat ntsin hte bung nga nna; de a namchyim namta dwi nga ai hte dai gaw na a hkam kaja lam a matu, mai kaja nga ai.

²⁵Teng man sai ngu nna myit nawn ai lam gaw nang hpe katsan ga de woi sa wa ai lam tai chye nga ai.

²⁶Amu galaw ai wa a n-gup namta gaw shi hpe bungli grau shaja shangun nga ai; hpa majaw nga yang, shi gaw shi a kawsi ai hpe jahkru shakat mayu nga ai majaw rai nga ai.

²⁷N hkru ai masha ni gaw kaga masha ni hpe machyi shangun na ginjang tam nga ma ai; shanhte a n-gup aga ni pyi gaw n hkru ai wan hkru nga ai.

²⁸Kadum kahte ga hpe tara n lang ai masha ni tsun shabra nga ma ai; dai gaw ru yak tsin-yam hpe shalut shalau ya nhtawm, hku hkau ai lam hpe jahten kau ya nga ai.

²⁹Kashun kashe du daw sai hkaw myit rawng ai masha ni gaw shanhte a manang ni hpe masu hkalem nna, tsin-yam tsindam de woi lau sa wa nga ma ai.

³⁰Nang hpe nyin dan ai wa hte myi grip dan ai masha ni hpe yu maja nga u; shanhte gaw n hkru ai amu lama mi hpe maw mawn na, myit nga ma ai.

³¹Asak galu ugut gu ai gaw ding hpring ai a kumhpa rai nna; baw hpraw ai gaw arawng sadang hte seng ai janmau rai nga ai.

³²Daru magam myit rawng ai hta hkam sharang ai myit rawng ai gaw grau kaja nga ai; mare ting a ntsa e up hkang hpareng ai hta tinang a hkum hpe up hkang lu ai gaw grau nna kaja nga ai.

³³Masha ni gaw Karai Kasang a myit ra ai lam hpe sharin la na matu hpaida da nga ma ti mung; Karai Kasang shi nan dai mahtai hpe daw dan ya nga ai.