Read Jinghpaw Common Language Bible 2009 GA SHAGAWP 18 Bible Online

GA SHAGAWP 18 - Jinghpaw Common Language Bible 2009 bible

GA SHAGAWP 18

¹Kaga masha ni hte n chye kanawn ai ni gaw shanhte a hkum hpe chyu sha, machyu nga ma ai rai nna; kaga masha shagu a jaw ai ngu, chye na ai lam hpe, shanhte myit n hkrum ya na mara ai.

²Angawk ai wa gaw arai lama mi hpe shi chye ai rai tim, n chye ai rai tim, hpa zawn n nawn nga ai; shi hkum shi gade hkik dum ai lam hpe sha, myit shapraw dan ai gaw shi ra sharawng ai lam mahkra rai nga ai.

³Yubak hte kaya kahpa gaw rau kapyawn nga ai, na a arawng sadang sum mat jang, de a malai, nang jahpoi asawng ai hkrum na ra ai.

⁴Masha a n-gup aga gaw hpaji byeng-ya a hka hpawk rai nga nna, dai gaw nammukdara zawn sung nga nhtawm lwi nga ai hka shi zawn katsi nga ai.

⁵Mara lu ai wa hpe myi man tau ya na n ang nga ai; mara n kap ai wa hpe tara dara ai hta sum shangun na n mai nga ai.

⁶Angawk ai wa gaw ndang kalang ga law hpang dat ai shaloi, shi hpe kayat na matu, shingna hpyi nga ai.

⁷Angawk ai wa a n-gup gaw shi a hten byak lam rai nga ai; shi gaw shi a n-gup aga a mahkam hta ahkang la nga ai.

⁸Kadum kahte tsun ai lam gaw grai mu sau nga ai; dai hpe anhte gade sha mayu bang kau dat mayu nga a hka!

⁹Lagawn ai masha gaw sharun jahten ai wa zawn, n hkru n kaja nga ai.

¹⁰Dai MADU gaw ngang ai langchyi zawn rai nga ai; ding hpring ai wa gaw dai shara de sa lu nna, shim nga lu ai.

¹¹Tsaw ai hte ngang ai bunghku ni gaw mare hpe grup hkra kum gawan da ai zawn, sut su ai masha ni mung, shanhte a sut gan gaw shanhte hpe makawp maga ya nga ai nga nna myit nawn la nga ma ai.

¹²Kadai mung shagrit shanem ai myit n rawng ai rai yang, shagrau hkungga hkam la lu ai n rai; myit tsaw myit dap rawng ai masha ni gaw hten byak lam de sa wa nga ma ai.

¹³Nang garai n htan yang, shawng madat la u; dai hku lama nang n hkan ai rai yang, nang gaw angawk ai wa hte masha kaga ni hpe n kaw n law di ai wa rai nga ndai.

¹⁴Nang machyi makaw hkrum ai shaloi, hkrung nga lu na matu myit dating da lu nga ai; rai ti mung, dai myit nang hta n rawng mat jang, na a jahtum na myit mada shara mung n nga nga ai.

¹⁵Zai byeng-ya rawng ai masha ni gaw chye la mayu ai myit, tut nawng e, katu nga ai hte; sharin la na matu jin jin rai nga ma ai.

¹⁶Nang gaw ahkyak ai masha wa hte hkrum shaga mayu n ni? Shi hpang de kumhpaw kumhpa la sa ya u, shaloi, yak hkak ai lam hpa mung n nga mat na ra ai.

¹⁷Tara rung e, shawng sa tsun ai wa gaw shi hpe ninghkap shingdang ai wa shi hpe san sagawn yu ai aten du hkra, tut nawng teng man ai zawn rai nga ai.

¹⁸N-gun rawng ai masha marai lahkawng, tara rung e shada da nhtan shai hkat yang, hpaida da ai hku nna mahtai tam shazim ya lu nga ai.

¹⁹Na a hpu nau wa hpe karum madi shadaw u, shaloi, shi gaw ngang ai mare bunghku zawn nang hpe makawp maga na ra ai; rai ti mung, ga law ga la rai nga yang chyawm gaw na a man e, shi a chyinghka pat kau ya na ra ai.

²⁰Nang tsun shaga ai a jaw e, byin wa ai mabyin masa yawng hpe nang hkam la lu na ndai.

²¹Nang tsun shaga ai ga gaw asak hpe bau maka lu nga ai; shing n rai, dai hpe jahten sharun kau lu nga ai. Dai majaw, na a n-gup aga a majaw pru wa ai mabyin lam ni hpe hkap la ra nga ndai.

²²Num la u, shaloi, mai kaja ai arai hpe nang mu la na ndai; dai gaw na a ntsa e, MADU a chyeju jaw ya ai hpe madun dan nga ai.

²³Matsan mayan re ai masha wa tsun shaga yang, shi gaw sumnung shingdi rai shaga ra nga ai; sut su ai wa htan ai shaloi, shi gaw n kaw n law di nga ai.

²⁴Masha nkau mi hte na na jinghku n hku nga ai, rai ti mung, hpu nau ni manoi ai hta grau sadi dung ai jinghku manang n kau mi mung nga nga ai.