Read Jinghpaw Common Language Bible 2009 GA SHAGAWP 19 Bible Online

GA SHAGAWP 19 - Jinghpaw Common Language Bible 2009 bible

GA SHAGAWP 19

¹Hkalem hkalau ga tsun nna angawk ai wa hta, myit malang nna matsan mayan rai nga na gaw, grau nna kaja nga ai.

²Myit katu sharawng ai lam hta hpaji byeng-ya n lawm yang, n kaja nga ai; n hkam sharang lu ai gaw ru yak tsin-yam de woi bang wa na ra ai.

³Masha nkau mi shanhte hkum nan a angawk angak ai amu ni a majaw, jahten sharun la nga ma ai; shaloi, dai MADU hpe mara shagun nga ai.

⁴Sut su ai masha ni gaw tut nawng e jinghku jingyu ningnan mu nga ma ai; matsan ai wa chyawm gaw shi a n law la ai jinghku ni pyi, shi hpe kau da nga ma ai.

⁵Tara rung hta e, nang n teng n man ai sakse ga tsun yang, nang ari jaw ai hkrum na rin dai; dai hta na nang lawt lu na n rai.

⁶Kadai mung ahkyak ai masha hta myi man pa lu hkra, shakut nga ai; kadai mung myi man tau ya ai wa hpe jinghku re ngu tsun nga ai.

⁷Matsan mayan re ai masha wa a kahpu kanau ni pyi, shi hpe n ra sharawng ma ai; shi hta manaw manang n lu ai gaw mauhpa n rai. Shi gade wa shakut shaja nna hkan tam tim, kadai hpe mung n lu hku la nga ai.

⁸Nang dang lu ai lam yawng hte hpe sharin la nna na hkum hpe nang karum la u; shaloi, nang sharin hkam la ai lam hpe dum wa nna, ngamu ngamai wa na rin dai.

⁹Kadai mung, tara rung hta masu sakse hkam ai wa gaw mara ari jaw ai kaw nna lawt lu ai n rai; shi ari hkrum na sha rai sai.

¹⁰Angawk ai ni gaw hkik hkam ai sut gan hta n mai ningngai nga ai; mayam ni mung du ni a ntsa e, n mai up hkang nga ai.

¹¹Nang hta htauli htaula myit rawng ai rai yang na a sindawng ai masin hpe hkang lu na ra ai; marai langai ngai nang hpe shut ai shaloi, dai hpe nang yu shalai kau ya yang, dai gaw na a arawng rai nga ai.

¹²Hkawhkam wa a masin kahtet ai gaw hkanghkyi shabam ai zawn rai nga ai; shi a chyeju myit gaw marang nhpaw hte bung nga ai.

¹³Angawk ai ma gaw shi a kawa hpe hten za shangun lu nga ai; aput angun ai madu jan gaw hte-hte- nga nna kahte hkrat ai hka hte bung nga ai.

¹⁴Masha gaw shi a kanu kawa ni kaw na, nta hte sut gan sali wunli hpe hkam la lu nga ai; dai MADU chyu sha shi hpe htauli htaula myit rawng ai madu jan jaw ya lu nga ai.

¹⁵Lagawn nga u, yup pyaw nga u; rai ti mung, nang kawsi hpang gara hkrum na ra ai.

¹⁶Karai Kasang a hkang da ai tara ni hpe hkan nga u; shaloi, nang asak galu na rin dai; dai lam ni hpe, nang n sawn n sang di hprai kau ai rai yang, nang si wa na rin dai.

¹⁷Matsan mayan wa hpe nang jaw ai gaw dai MADU hpe hkoi ya ai hte bung nga ai rai nna; dai MADU gaw nang hpe bai htang jaw na ra ai.

¹⁸Shanhte gaw sharin la na prat naw ram nga ai aten hta, na a nsha ni hpe hkang sharin u; nang dai lam hpe n hkan galaw ai rai yang shanhte hpe hten byak shangun na ndai.

¹⁹Marai langai ngai myit kahtet ai rai yang, de a akyu hpe shi hkam la na ra ai; Nang shi hpe ru yak shoihpa kata kaw nna kalang mi shapraw la ai rai yang, nang dai hpe kalang mi bai kahtap galaw ra na ndai.

²⁰Hpaji jaw ai ga hpe madat nna sharin hkam la na matu nang sharawng awng nga n yang gaw, lani mi na aten hta, nang hpaji rawng ai masha tai wa na rin dai.

²¹Masha gaw lam magup hpe maw mawn mai nga ai; MADU a myit ra ai hte maren sha byin wa na ra ai.

²²Lawhpa marin marit ai gaw kaya kahpa amu rai nga ai; masu magaw ga tsun ai ni hta, matsan mayam masha ni gaw grau nna kaja nga ma ai.

²³Dai MADU a ga madat mara nga u, shaloi, nang asak aprat ugut gu hkra nga lu na ra ai; myit pyaw myit hkut ai hte hkrithpa aru ara kaw na shim lu na ra ai.

²⁴Ladu lai lagawn ai masha nkau mi gaw shanhte a n-gup kata de, lusha hta bang na pyi n kam nga ma ai.

²⁵Myit tsaw myit dap ai gaw ari jaw ai hkrum sha ra nga ai, shaloi n chye n chyang ai masha ni gaw dai lam hpe sharin la lu na ra ai; nang hpaji rawng ai wa rai yang chyawm gaw shading sharai hkam ai shaloi, nang sharin la na rin dai.

²⁶Kaya kahpa hte sari jahpoi ya ai wa chyu sha, shi a kawa hpe n kaw n law di nna shi a kanu hpe mung nta kaw nna shaden kau nga ai.

²⁷Sha e, sharin hkam la ai lam hpe jahkring kau ai shaloi, nang chye da sai lam ni hpe pyi, hkring mi rai jang, dai hpe n hkan mat na ndai.

²⁸Sakse hkam ai wa gaw marai langai ngai hpe machyi shangun na ngu, myit daw dan ai rai yang, teng man ai tara daw dan lam n byin lu nga ai. Tara n lang ai masha ni gaw n hkru ai namchyim hpe tsaw ra nga ma ai.

²⁹Rai dum nna angawk ai wa gaw anu gayat ai hpe teng teng hkam la na rai nga ai.