Read Jinghpaw Common Language Bible 2009 GA SHAGAWP 22 Bible Online

GA SHAGAWP 22 - Jinghpaw Common Language Bible 2009 bible

GA SHAGAWP 22

¹Arawng lu ai mying hte sut gan lu su ai lam hta na, nang ra ai lata la na rai yang; arawng lu ai mying hpe lata la u.

²Lusu ai wa hte matsan ai wa hpe hpan da ai MADU gaw langai sha rai nga ai. Ndai lam hta shan bung hkat nga ma ai.

³Chye myit chye mang ai masha ni gaw du wa na ru yak tsin-yam hpe tau mu nna, dai hpe koi yen ti mung; nyan tang ai ni chyawm gaw dai tsin yam kata de shang bang wa nna, hpang e she shut dum na mara ai.

⁴Dai MADU a ga madat mara nga u; myit shagrit shanem u, shaloi, sut gan arawng sadang hte asak galu ai nang hkam la lu na ra ai.

⁵Na a asak hpe nang tsaw ra nga n yang gaw, tara n lang ai wa hpe rim na matu, lam dingyang hkam da ai mahkam ni kaw nna tsan nga u.

⁶Ma kaji hpe shi gara hku hkan mai nga ai lam hta sharin ya u; shaloi shi gaw dai hpe shi a asak prat tup adum nga na ra ai.

⁷Matsan mayan re ai masha ni gaw sut su ai masha ni a mayam ni rai nga ma ai; gumhpraw hkoi la ai rai yang, nang gaw hkoi ya ai wa a mayam rai nga ndai.

⁸N teng n man ai atum hpe nang hkai da ai rai yang, tsin-yam tsin dam tu pru wa nna kaga masha ni hpe dip gamyet sha ai lam hkoi mat na ra ai.

⁹Ndaw nhta jaw ya u; Na a lusha matsan mayan wa hpe garan ya u, shaloi dai amu a majaw shaman ai chyeju nang hkam la na rin dai.

¹⁰Rai dum ai wa hpe shaden kau u, shaloi dai shara hta ga law ga la ai, n dang kalang re ai hte n gawn n sawn mying gang ai lam hpa mung n nga mat na ra ai.

¹¹San seng ai myit hte si mani ai ga hpe nang tsaw ra ai rai yang, hkawhkam wa pyi na a jinghku tai na ra ai.

¹²Dai MADU gaw masu magaw ga ni hpe shut ai sakse shatai ai hku nna teng man ai lam hpe shangang shakang ya nga ai.

¹³Lagawn ai masha gaw nta e nga nga nna shi shinggan de pru hkawm na rai yang, hkanghkyi gaw ngai hpe htim amya chye nga ai nga nna chye tsun nga ai.

¹⁴Num shaw la shaw ai amu gaw mahkam rai nga ai. MADU a masin kahtet hkrum ai ni, dai mahkam hta lu taw nga ma ai.

¹⁵Ma ni gaw shingra maka hte maren, shanhte n grin n grang ndum ndam sadi sahka n nga ai amu hpe galaw nga ma ai; shingna hte kayat sharin ai gaw shanhte hpe kaja ai arawn alai hta hkan sa shangun nga ai.

¹⁶Sut gan shalaw na matu, matsan mayan wa hpe dip gamyet da nna sut su ai ni hpe kumhpa nang jaw ai rai yang, nang hkum nan matsan mayan hkrum na ra ai.

¹⁷Ngai nang hpe sharin achyin ya na, dai hpaji rawng ai masha ni a tsun sharin shaga da ai ga ni hpe, madat u. Shanhte a sharin shaga ai ga matsun ni hpe hka ja u.

¹⁸Dai sharin achyin ga hte lakap ai matsun maroi ga ni hpe, nang matsing nna jai lang yang kabu gara ai nang hkrum na rin dai.

¹⁹Dai MADU hta na a kam hpa ai myit shamyet shanat nga na, ngai ra sharawng nga nngai, dai majaw, nang hpe ya ngai tsun dan nga nngai.

²⁰Machye machyang hte kaja ai hpaji daw ga ni hte seng ai hpaji ga sumshi hpe na a matu, ngai ka jahkrat da ni ai.

²¹Dai ni gaw teng man ai ga a lam hpe hkrak chye na lu hkra nang hpe sharin ya na ra ai; shing rai nang hpang de shangun dat ai ni hpe nang gaw jaw ai mahtai madun dan lu na ndai.

²²Nang dang di lu ai a majaw, matsan mayan masha wa hpe zai hku nna hkum dip sha nga et; tara rung hta garen gari nni nkri hkrum sha nga ai wa hpe zai hku nna hkum dip sha et.

²³Dai MADU gaw shanhte a amu hpe tsun karum ya na ra ai; shanhte a asak hpe jahkrit shama ai ni kadai hpe mung, shi sharim kau na ra ai.

²⁴Myit kahtet nna, sheng mareng nga ai masha ni hte jinghku hkum hku et.

²⁵Shanhte a lai akyang ni hpe nang sharin la ai hpang, na a sat lawat hpe n gram lajang la lu na ndai.

²⁶Marai langai ngai a hka hpe hkam la na matu, ga sadi hkum jaw et.

²⁷Dai hka hpe nang n lu wa ai rai yang, na a yup ra hpe pyi, shanhte la kau ya na ra ai.

²⁸Na a nji nwa ni a madu da lu sai masat shadaw ni hpe, galoi mung hkum sit kau et.

²⁹Bungli galaw kangka ai masha ngai hpe madun dan e; shaloi, hkawhkam ni a manang tai ging ai hte kaga ni law law hta kaja htum ai wa hpe nang hpe madun na nngai.