Read Jinghpaw Common Language Bible 2009 GA SHAGAWP 23 Bible Online

GA SHAGAWP 23 - Jinghpaw Common Language Bible 2009 bible

GA SHAGAWP 23

¹Ahkyak ai masha wa hte rau dung nna lu sha sha yang, shi kadai rai nga ai hpe, na a myit masin hta dum nga u.

²Nang sha mu ai rai yang, na hkum nang shadawn sharam galaw u.

³Shi daw jau ai dwi sau mu mai ai lusha hpe hkum marin nga et, shi gaw nang hpe zai hku nna maw mawn nga nhten!

⁴Sutsu wa lu hkra, na hkum nang hki si ba si hkum galaw et, dai hta hpaji rawng nga u.

⁵Na a ja gumhpraw gaw singkaw tu wa ai zawn rai nna, galang zawn pyen mat wa na ra ai.

⁶Maji ai masha wa a sha ku ntsa na lusha hpe hkum hta sha et; shi daw jau ai dwi sau mu mai ai lusha hpe hkum marin nga et.

⁷Shi gaw, “Sa rit, lu ga, sha ga, jat sha ga,” nga nna tsun ti mung, shi gaw dai hku myit rawng ai n rai, shi kraw e myit ai hte maren shi rai nga ai.

⁸Nang sha bang dat ai lusha hpe nang madawn shapraw kau na ra ai hte na a abawk ai ga mung lahpawt lama rai mat na ra ai.

⁹Angawk ai wa hpe lachyum sung ai ga, tsun dan na hkum shakut et; shi gaw dai hpe manu chye shadan lu ai n rai.

¹⁰Moi moi na madu da lu sai masat shadaw hpe galoi mung hkum sit kau et; jahkrai ma ni madu da lu sai lamu ga hpe, hkum la kau ya et.

¹¹Dai MADU gaw shanhte a matu daru magam n-gun hte hpring nga nna makawp maga ai wa rai nga ai Shi gaw shanhte a amu hpe nanhte hte shai ai hku dara ya na ra ai.

¹²Na sara wa a ga hpe madat u, shing rai nang sharin hkam la na lam yawng mayawng hpe dang lu ai made sharin la u.

¹³Ma kaji hpe hkang sharin na matu, hkum kanung nga et; kaja ai hku gayat sharin ai lam gaw shi hpe si shangun lu nga ai n rai.

¹⁴Dai gaw kaja wa, shi a asak hpe hkye hkrang la na ra ai.

¹⁵Sha e, nang hpaji rawng ai wa tai yang, ngai grai kabu gara na nngai.

¹⁶Nang tsun shaga ai hpaji ga hpe ngai na lu yang, ngai gumrawng lu na nngai.

¹⁷Yubak kap ai masha ni hpe hkum manawn et; Dai MADU hpe na a asak prat tup hkrit kamyin nga u.

¹⁸Dai rai yang, na a shawng lam grai awng dang na ra ai.

¹⁹Ngai sha e, nye a ga hpe madat nna hpaji rawng nga u; nang asak hkrung ai lam hpe sung sung myit yu u.

²⁰Sabyi ntsin lu lai ai ni hte lusha marim ai ni hte hkum kanawn et.

²¹Tsa chyaru nang ai ni hte nakru kinru ai ni gaw matsan chyaren re mat na mara ai. Nang galaw ai lam yawng hta yup ai hte sha ai rai yang, loi hkring mi rai yang, tsupni hpun ai nang hkrum na rin dai.

²²Na nwa a ga hpe madat mara u, shi a majaw n rai yang, nang nga pra lu na n rai; asak kaba sai na nnu hpe shareng hkungga ai lam madun dan u.

²³Teng man ai, hpaji byeng-ya sharin achyin ai hte chye chyang ai ni hpe manu jahpu jaw nna mari la ging nga ai rai tim, dai gaw manu nau dan ai majaw dut kau na lahpawt lama kaba rai nga ai.

²⁴Ding hpring ai wa a kawa gaw kabu gara lu na matu, ging dan nga ai; hpaji rawng ai kasha hta nang gumrawng lu na ra ai.

²⁵Na nnu yan nwa nang hta kabu gumrawng lu mu ga; na nnu hpe kabu gara lam jaw ya u.

²⁶Sha e, atsawm sha madat la u; nye a asak hkrun lam gaw na a matu kasi tai shangun u.

²⁷Shawa num ni hte nse nsa ai num ni gaw si shangun lu ai mahkam rai nga ai.

²⁸Shanhte gaw damya ni zawn nang hpe mayun ala nga nna la law law hpe sadi n dung shangun kau nga ma ai.

²⁹Ladu lai chyaru lu ai hte lu hpa amyu myu hpe chyim ra ai masha langai ngai, ngai hpe madun dan et, shaloi nchyi nmu rai nna, shi hkum shi machyi dum ai wa, tut nawng ru yak tsin-yam shabyin ai hte tut nawng aput angun nga ai marai mi hpe, na a man e, ngai madun dan na we ai. Shi a myi ni hkyeng nga nna, koi yen kau lu mai ai hpe n koi yen kau lu mat ai nma ni shi hta kap nga ai.

³¹Hkyeng hkyeng rai nhtawm gawm hta kabrim kabram rai nga ai hte lu pyaw na nsan ai sabyi ntsin rai tim pyi, dai gaw nang hpe hkum gunglau jahten shangun et.

³²Hpang jahpawt du jang, atuk rawng ai lapu e achye kau ai zawn nang hkam sha na ra ai.

³³Hkrit hpa sumla gaw na a myi hta dan pru wa nna dai hpe nang asan sha n chye myit la ai hte n chye tsun dan na rin dai.

³⁴Nang gaw nammukdara ntsa kaw hka leng e kanawng adawt shatsang hkrum nna tsaw dat nem dat rai nga ai sanghpaw li a sumpan shadaw ntsa e sanghpaw nang let noi goiwat taw nga ai wa zawn, hkam sha na ra ai.

³⁵Nang gaw, “Ngai adup anut hkrum sam ni ai, ngai kayat ahpat ai hkrum ti mung, dai hpe ngai n dum nngai. Ngai hpa majaw n lu hprang ai kun? Ngai bai jat lu ra nga nngai,” nga nna nang tsun na ra ai.