Read Jinghpaw Common Language Bible 2009 GA SHAGAWP 24 Bible Online

GA SHAGAWP 24 - Jinghpaw Common Language Bible 2009 bible

GA SHAGAWP 24

¹N hkru ai masha ni hpe hkum yu manawn et; shanhte hte jinghku hku na hkum shakut et.

²Shanhte myit mang ai lam yawng gaw ru yak tsin-yam shabyin ai lam rai nga ai; lang shagu shanhte a n-gup hpe mahka dat yang, marai langai ngai machyi hkrum nga ai.

³Hpaji byeng-ya hte chye chyang ai hpaji hta dum nta ni hpe gaw gap da nga ai.

⁴Machye machyang hpaji nga ai shara na gawk ni hta manu dan nna, tsawm htap ai arung arai ni hte jahting da nga ai.

⁵Hpaji rawng ai wa gaw n-gun ja ai wa hta grau kaja nga ai; rai sa, machye machyang gaw n-gun atsam hta grau ahkyak nga ai.

⁶Tsun ga nga yang, nang majan garai n baw yang, hpyen zai ladat hpe hkrak hpareng lajang ra nga ndai, kaja ai hpaji daw ga nang lu la magang, awng padang lu la na masa grau pru wa magang rai nga ai.

⁷Hpaji ga gaw angawk ai masha wa chye na hkawn hkrang na matu, nau wa sung la nga ai. Shi gaw ahkyak ai amu ni hpe bawng ban ai shaloi, tsun dan na lam hpa mung n lu nga ai.

⁸N hkru ai hku, tut e nang hpaji daw nga ai rai yang, ru yak tsin-yam hpe shabyin ai wa zawn, n hkru ai lam hta mying gumhkawng wa na ra ai.

⁹Angawk ai wa a myit shapraw dat ai maw mawn lam hpa rai tim, yubak hte seng ai lam rai nga ai. Kaga masha ni hpe jahpoi jahpyak chye ai hta jan nna hpa n lu ai wa hpe masha ni n dawng nga ma ai.

¹⁰Ru yak tsin-yam hkrum ai aten hta, nang gawng kya nga ai rai yang, nang gaw teng sha n-gun kya ai wa rai nga ndai.

¹¹N tara ai hku, sat kau hkrum na wa hpe mawai la na matu hkum kanung nga et.

¹²Nang gaw, dai lam nang hte hpa seng a ta? ngu mai nga ti mung, Karai Kasang gaw na a myit akyang hpe chye nga ai hte jeyang ya nga ai. Shi gaw nang hpe azi yu nga ai majaw shi chye nga ai. Shing rai, shi gaw nang galaw ai amu hte maren, nang hpe kumhpa shagrau na ra ai.

¹³Sha e, lagat ntsin dai kaja nga ai majaw lu u. Gitbaw kaw nna kapya hkrat wa ai lagat ntsin gaw shinglet hta dwi nga ai.

¹⁴Hpaji byeng-ya gaw wenyi a matu mai kaja nga ai hpe nang chye nga ndai. Hpaji byeng-ya hpe mahkyu tawn u, shaloi, nang na a shawng lam hta awng dang ai lam lu la nga ai.

¹⁵Tara malang ai masha wa hpe hpya kau nna, shi a nta hpe kashun la kau ya na matu maw mawn ai, dai tara n lang ai masha wa zawn, hkum rai nga et.

¹⁶Ding hpring ai masha wa gaw gade lang kataw ti mung, shi gaw tut nawng e, bai rawt wa lu nga ai; rai ti mung, tsin-yam tsindam gaw tara n lang ai wa hpe jahten sharun kau nga ai.

¹⁷Na a gumlau hpyen wa tsin-yam tsindam hkrum yang hkum yu kabu nga et; shi ahtu kataw yang hkum yu pyaw nga et.

¹⁸Nang gaw shi a jaw e, kabu taw nga ai rai yang, MADU gaw dai hpe chye ya nna n yu sharawng na ra ai; shaloi shi hpe ari n jaw na nhten!

¹⁹N hkru n kaja ai ni a majaw, myit ru myit tsang hkum rai et; shanhte hpe hkum yu manawn et.

²⁰N hkru ai masha wa hta shawng lam n hku nga lu ai, myit mada shara hpa mung n nga nga ai.

²¹Ngai sha e, dai MADU hpe hkrit kamyin nga u; hkawhkam wa hpe shagrau sha-a nga u, shanhte hte nhtan shai nna gumle gumlau ai masha ni hte hkum kanawn et;

²²Dai zawn re ai masha ni gaw hkring mi na aten hta, hten run mat lu nga ai. Karai Kasang shing n rai hkawhkam wa gaw dai tsin-yam tsindam shabyin dat lu nga ai hpe nang myit dum nga n ni?

²³Hpaji rawng ai masha ni ndai lam ni hpe mung tsun da nga masai; Tara agyi wa myi man lata ai lam gaw shut ai amu rai nga ai.

²⁴Shi gaw mara kap ai wa hpe n kap ai wa re ngu nna, daw dan ai rai yang, masha shagu, shi hpe dagam, kau nna, n dawng n yawt na mu ai.

²⁵Mara kap ai ni hpe, daw dan ari jaw ai tara agyi ni chyawm gaw ngamu ngamai wa nna, mying kaja kajai gumhkawng ai hte kabu lu na mara ai.

²⁶Jaw ai mahtai jaw ai gaw tengman ai jinghku maka kumla rai nga ai.

²⁷Na a yi hkauna makan amu ni hpe shajin ngut nna, kam lu ai kan bau bungli hpe garai n lu dingsa, na a nta hte dinghku hkum gaw gap et.

²⁸Ra n rawng ai sha, marai langai ngai a lam hta sakse hkum hkam et; shi a lam hte seng nna numshe shang shangun ai ga hkum shaga et.

²⁹“Shi ngai hpe di ai zawn ngai shi hpe di na we ai; shi hpe ngai tai na we ai!,” nga nna hkum tsun et.

³⁰Ngai gaw lagawn nna, angawk ai wa a yi hkauna hte sabyi sun hku ga lai mat wa nngai.

³¹Dai ni hta ju hpun sumwum ni hte ga ting atsing ni hte ka-up nga nna, dai ni hpe kum gawan da ai nlung bunghku ni mung kadawng mat nga ai.

³²Ngai gaw dai lam hpe yu nna, myit yu nhtawm, mu mada ai lam kaw nna, lam langai mi hpe ngai sharin la lu ni ai.

³³Gai gai yup la u, ai sha rai, hkring mi gan yup la u; na a lata hkintum kau nna hkring mi ban sa la u,

³⁴rai ti mung, nang yup pyaw nga ai aten hta, matsan mayan ai gaw laknak hpai ai damya wa zawn, nang kaw htim sa wa na ra ai.